Ịiḅereghi adulhe
141
Mị atu esi ạna, Ọmoogh-we, ụphel ịmi nyịidipho.Ụnaghanan ịmi mem lọ mị ạmagh nyịna.
2 *Sịghe ni ịiḅereghi phọ ạmi ịdipho ịnsens eeḅi eḍu;
rạghaagh phọ ạmi ophoophe bọ ịdipho ẹkia adulhe.
3 Ọmoogh-we, gborori ịyaar ọnhu ạmi;
mẹremi okoriom sịen ọnhu-aḍibuo ịidoronhu phọ ạmi.
4 Ụgbole ịmi oḍighi ịlo ị́nighe,
rꞌọḅophan ịkaraph awe esi eḍighinom ạbidi.
Ịlo ạmi ríḍigh olian ẹyaal rꞌạbidi.
5 Ogey oye atue ni ụliom ịmi ạḅile ụḅaam ịmi rꞌọnma ighirigiir;
kụ ọlo Ẹnaan kímeera dị mị kạsighe rughuenian esi ịkaraph awe
loor esi dị mị agbor rạaḅereghi ghan ọphuenom ẹkaraph eḍighinom mọ ạbidi!
6 Mem dị mosiph bụdaam mọ ạbidi otebeeny ude sịphe ạraaḅaraph asighiigh phọ,
awe phọ komeeraam ni mọ ikpo ọnhu phọ ạmi igey ni.
7 Mụdi ạḍipe dị opol kụ ọoperion,
kụ ẹdi ọwalalami ịḅarara ạbidi ọgbal oḍi phọ.
8 Kụ ọlo mị ạkpasaghi ni emooph ạmi esi ạna, Ọmoogh-we Ẹnaan ạmi,
mị rạwa ghan eekpereghian phọ ạna.
Kámeera mị amugh.
9 Uukpereghi ịmi esi asiphil phọ bịdi mụkpaminaan bọ ịmi,
esi asiphil awe ạsipioghom mọ ạbuphe.
10 Awe ạsipioghom mọ oḅula omeel siphil phọ ạbidi
kụ mị ạḍua sạghaph!