Ọḅaal ologhi ogey oye
112
Boom Ọmoogh-we phọ!Ọḅaal ologhi kụ odianaan oye dị aghueni Ọmoogh-we phọ,
dị ạmoogh ḍịḅeeraan ọnaghanan ghan ịto phọ ọdi.
2 Ạnmuny ogey oye kọmoogh ịikpo sịphe ade phọ;
nmụny ạnmuny ọdi kọseph ni.
3 Eghunotu ọdi kọmoogh ẹelha kụ oḍum iboom,
kụ ọdu egey eḍighinom ịyaar ọdi kaaleghaan ni.
4 Ạḍiḅaal resoor ghan esi ufiri kẹngo bugey awe,
bụphe ọmoogh bọ ọnma ighirigiir rꞌegey eḍighinom ịyaar rꞌiiḅi ịiruen.
5 Ọḅaal ologhi kụ odianaan oye lọ rạ́logh ghan ạaku ạale oye ikpoki,
ọpo rạpam ghan bọ oḍighi ọwa ikpoki ọdi igey areten.
6 Ogey oye kámeel;
kọotughian ni nyọdi oomo amem.
7 Ọdi ọ́moogh oghiilaan ọnaghan ọkaraph ọghaaph;
omeeraam ọdi ạkpar kụ ọdi aḍuom ologhi Ọmoogh-we phọ.
8 Ọdi rạ́aḅaghamian ghan loor ḅịle rákiilaan ghan;
ọdi ạḅem mọ ọno kạmiin bụmulogh-ḍien ọno dị momeel.
9 *Ọdi ranmo ghan inmo kạngo tọrobo oye lọ ị́nighenom,
kụ ọnma ighirigiir ọdi rámuneen ghan;
ọdi kạmoogh ịikpo kụ okueni ghan nyọdi.
10 Ạbukaraph awe phọ ọmiin ịphen phọ kụ repin ologhi;
bịdi ọnmagharan rꞌophin ologhi kụ ope nyanam;
oḍuom-ologhi ạbidi ạḍua bịn óḅula mun.