Ạḍuor oboomiom Ọmoogh-we phọ
111
Boom Ọmoogh-we phọ!Rꞌoomo ologhi ạmi mị kạseph Ọmoogh-we phọ
sịphe ookpomoghan awe phọ ọdi.
2 Pọ eeghe ịikia ạraraar dị Ọmoogh-we phọ aḍighi.
Oomo ạbulo ạraraar phọ ẹḅeeraan rọwa ghan ni ịlo ọnaghanan ạbidi.
3 Oomo ịlo ọdi aḍighi eghuan rꞌigbogh kụ imuza;
aruukuan ọdi edi ghan bịn.
4 Ọmoogh-we phọ ómeera yira owula iiḍighi ịiḍaany phọ ọdi;
ọdi oye iiḅi rꞌọnma ighirigiir.
5 Ọdi ramitiom ghan eḍien kạngo bụphe oghueni bọ nyọdi;
ọdi ówula ịyo phọ ọdi.
6 Ọdi maḍeenaan ịikpo phọ ọdi we phọ ọdi
ịdipho ọdi ạngo bọ bịdi rere aruuruen phọ.
7 Oomo ịlo ọdi aḍighi ị́moogh mabi, ḅịle esel li;
tọrobo ịlo ọdi ạto, ẹkpianaan ni.
8 Iilogh phọ ọdi kẹmeera ni kꞌagee-pọ;
ụlogh bịdi rꞌigey rꞌaruukuan.
9 Ọdi ạtagharan we phọ ọdi
kụ aghiran ịyo dị kẹtol bịn rꞌạbidi.
Iigbia rꞌogbogh kụ ọdi phọ!
10 *Ọlogh eegu Ọmoogh-we phọ — ẹpe kụ eten ọsu ologhi.
Ọnaghan ạḍughum — ọlo oomo ạbulo ooko iilogh phọ ọdi.
Koboom ni nyọdi kꞌagee-pọ.