Ọwa ghan Ẹnaan
63
Ẹnaan, nạ kụ Ẹnaan ạmi,kụ mị rạwa ghan nyịna.
Oomo eye phọ ạmi rẹwa ghan nyịna;
ịdipho ade dị emoopha, ẹgharaghar kụ ạmuum úlho,
uwaloor ạmi rạwa nyịna ịdipho ạmuum ọphughol.
2 Ḍighi ịdi mị kạmiin nyịna sịphe otu eegu phọ ạna,
mị ụmiin ịdi nạ ạbugh ạḅile ạmoogh eghuan.
3 Ẹphomoghian phọ ạna rémuneen ghan bọ kụ ịnighe epu ghuḍum,
kụ iḍighi kụ mị kạseph ni nyịna.
4 Ịduon kụ ịdi mị kạseph ghan nyịna sịen mị ọdi bọ eye;
mị kapoophe rạghaagh ạmi ạkiom ạnyu.
5 Uwaloor ạmi kale kụ ẹper
ḅịle mị kạmoor sụor ọḅaal ologhi ooseenyom ạna.
6 Mị ạmina ẹmina mị rạatughian ghan nyịna;
oomo aḍughul phọ mị rạatughian ghan ịlo ạna,
7 loor esi dị oomo amem nạ kụ rụlhoghonaan ghan ịmi ḍịghaagh,
Sịphe uba araphaaph phọ ạna kụ ẹdi mị ạrol ạmoor sụor iboh.
8 Mị anyoronom nyịna
kụ ạḍighaagh elhiom mọ ạna kụ ịpham ịmi.
9 Bụphe rọwa ghan bọ reten oghiigh ạmi
komuughu okeel ọmar iḍim.
10 Kọze ni bịdi ghisigh ẹgham
kụ ruzu ạbidi ilhom ịnam kụ kẹba.
11 Loor esi dị Ẹnaan ẹngo nyọdi ọkpar opu,
ọdaam mọ kabo ni.
Bụphe oghunyaam bọ ḍien phọ Ẹnaan kooseeny nyọdi,
kụ ịnhu ạbugbaam ọkpe kokpomori ni.