Ọokpara omeeraam esi ạpeleeny Ẹnaan
62
Rꞌọkparam kụ mị akori Ẹnaan ọphel ạmi;mị aḍuom ologhi nyọdi bịn.
2 Ọdi bịn kụ uukpereghi ạḅile ụphel ịmi;
ọdi kụ ọsuaram ạmi,
kụ oye ịmi kụ́kpar úpu.
3 Kꞌapuraḍio kụ ẹdi oomo anyina kezuom ghan oye
dị ụ́moogh ịnyaam úpu ọgbenegbene oghoony dị molhereghi?
4 Ịdi nyina rẹwa, ogboton ọdi dọl eghuan phọ ọdi;
ọgba ọkpe kụ ịḅeeraan inyina.
Nyina rẹḅa ghan ikpo ọnhu ạḍiseph,
kụ ạri sịphe ologhi phọ anyina nyina retonyon ni nyọdi.
5 Mị aḍuom ologhi Ẹnaan bịn;
mị ạkpasi oḍuom-ologhi phọ ạmi esi ọdi.
6 Ọdi bịn kụ uukpereghi ịmi ạḅile ụphel ịmi;
ọdi kụ ọsuaram ạmi
kụ oye kátue ạkpar upu ịmi.
7 Ọphel otene ạmi rꞌeghuan edi esi Ẹnaan;
ọdi kụ ọpelia ạmi dị ạkpar;
ọdi kụ aḍibuo ạmi.
8 Ịkpasi oḍuom-ologhi anyina esi Ẹnaan oomo amem, we ạmi.
Ịḅeni nyọdi oomo ịiḅaghami phọ anyina,
loor esi dị ọdi kụ esi-ịbooghian ayira.
9 Oomo awe ọkigh eniin amem aḍiphooghu;
abugbogh rꞌạbubam iniin phọ ni, ụ́moogh ịyaar oḍighinom.
Ḅạm bịdi ạnyu ọtoom ẹemor, bịdi ịyaar ụ́man;
bịdi oophoogh opu ḍiphooghu.
10 Káseere ologhi ạna loor ọwa-asighiton;
kágbi mọ ạsuo kạrolonaan ni nyịna esi ozirion ạraraar awe;
ghạlamo ẹelha phọ ịḅile kụ ẹbugh,
káḍuom ologhi ịpe phọ.
11 Ịbadi amem mị mạnaghan ni
ịdi Ẹnaan ẹḅem mọ ịikpo ịlo ọno bịn
12 *ḅịle mọ ẹphomoghian ọno edi ghan ni bịn.
Nạ rꞌaloor, Ọmoogh-we, raanmo ghan ni ruunmo tọrotoro oye
ịdi ẹkasian iiḍighi phọ ọdi.