Ịiḅereghi eekpereghian
64
Mị odi esi ịiḅaghami, Ẹnaan — nạghan ịiḅereghi ạmi.Mị rakiilaan ni bụmulogh-ḍien ạmi — pẹl ghuḍum ạmi.
2 Ụphel ịmi loor ịkaraph aruupuruan abuḍighinom ịkaraph,
ạsighe esi ạraghaagh aḍita ạbukaraph awe.
3 Bịdi okola sinem ạbidi ịdipho isiko
kụ ogbonom ịkaraph ikpo ọnhu ịdipho ịkpina.
4 Bịdi úkiil umugholoor oogborion oleenye ọkpe;
bịdi ọkalaghian oogulemi we dị mạar ụ́piom.
5 Oniin ạkparami ologhi oniin rꞌịkaraph aruupuruan.
Bịdi ogbiighi ịlo ọkpamaghi asiphil.
Bịdi ọḅem mọ oye ólho dị kạmiin bụno.
6 Bịdi ọpam ịkaraph aruupuruan kụ ọḅem mọ
“Ịphen yira mogbiighi bọ ẹnighe ni ịikia.”
Arigbiom rꞌịitughian oye ẹkpar ri ọnaghanan.
7 Kụ ọlo Ẹnaan ẹsighe ịkpina ọdi ẹtaph bịdi
kụ ekperenom bịn bịdi oḍighima mạar.
8 Ọdi kapiemi ni bịdi loor ịkponhu phọ ịpe phọ;
oomo ạbulo ọmiin bịdi kooḅoghomi rụmhu ạbidi.
9 Kụ egbi oḍigh aruugu esi oomo awe;
bịdi kọotughian ịlo ịpe Ẹnaan meḍighi bọ,
kụ ọkaaph ịlo iiḍighi phọ ọdi.
10 Oomo awe aruukuan kọmoogh iboh
loor esi ịpe Ọmoogh-we phọ maḍighi bọ.
Bịdi kọmiin esi ịbooghian loor ọdi;
oomo ạbulo iloghi phọ eseleman koboom ni nyọdi.