Ịiḅereghi ịlo ọloghonaan ạḍighaagh
28
Ọmoogh-we, nạ kụ ọdi mị ramoghiom.Ọpelia ạmi, nạghan emoghi phọ ạmi.
Eḍighi mạar dị nạ ịmi ụ́phagharanaan,
mị kạtol rꞌạbuphe kokeel bọ ude ẹpe aḅirini ạbuphe momugh bọ.
2 Ụnaghanan ghan ịmi tọro amem lọ mị ramoghiom nyịna ọloghonaan ạḍighaagh,
mem lọ mị aphoophe rạghaagh ạmi asomori ẹpe Otu Iigbia phọ ạna.
3 Kụ́ḅaram ịmi rꞌạbuo ạsipioghom mọ
rꞌạbuo igborion phọ aphoroghom,
bụphe opu bọ bịn rọkaaph ghan rꞌoduugha-ọnhu
kụ ịpe edi bọ iloghi phọ ạbidi kịro ni.
4 *Dạphan ịdipho iiḍighi phọ ạbidi ẹrol bọ
kụ ạkpiom bịdi;
ạdaphan sịpioghom rꞌịkaraph ạraaghara phọ ạbidi
kụ aḅulemian bịdi.
5 Ịdi eḍighi bọ bịdi ụ́logh elegh ịpe Ọmoogh-we phọ maḍighi bọ
mꞌesi ịpe ọdi mạlhem bọ,
ọdi kanyuughi ni bịdi alereghi apiemi,
bịn káḅerion mun bịdi kꞌagee-pọ.
6 Ạḍiseph ẹrolonaan Ọmoogh-we phọ
ịdi eḍighi bọ ọdi mạnaghan ẹḍogh ịlom ọloghonaan ạḍighaagh phọ ạmi.
7 Ọmoogh-we phọ kụ ịnyaam ạmi rꞌoghoph ạmi.
Mị aḍuom nyọdi ologhi.
Ọdi mụlhoghonaan ịmi ḍịghaagh
kụ iḍighi kụ mị kạlogh ḍụor ạmoor aboom nyọdi.
8 Ọmoogh-we phọ kụ ịnyaam awe phọ ọdi
rꞌỌpelia ọdaam mọ ọdi ạsaḅar bọ.
9 Pẹl we phọ ạna, Ọmoogh-we,
kụ ạseph bụphe oru bọ bụo kꞌạna.
Ḍighi okoriom ạbidi
ạḅile aphogh bịdi kꞌagee-pọ.