Ịiḅereghi oboomiom
27
Ọmoogh-we phọ kụ ạḍiḅaal ạmi, rꞌỌpelia ạmi.Mị rákiilaan oye.
Ọmoogh-we phọ kụ ruuko ghan ịmi esi oomo ịiḅaghami.
Mị rákiil ghan ruugu.
2 Mem dị bụo ạsipioghom mọ uzuom ịmi ịlo oghiigh,
bịdi ghụn ni kụ ukperenom yogh omeleghu.
3 Ghạlamo aḍita ạbuo ẹgham kụ uko ịmi okitonom,
aruugu ịmi kúsiph.
Ghạlamo ạbumulogh-ḍien kụ uzuom ịmi,
mị aḍuom ni ologhi Ẹnaan.
4 Mị rạlom ghan Ọmoogh-we phọ eniin ịyaar bịn;
kụ ịyaar phọ ẹpe phọ kụ ẹdi mị rạwa:
ọrol ịpa otu Ọmoogh-we phọ oomo asuḍughul-otu aghuḍum mọ ạmi,
ophoghoghom ghan ẹnighe phọ ọdi rꞌookia ghan iiḍighi aruugu phọ ọdi
rꞌọlhom ghan ọdi mọ uuko ịmi.
5 Ọdi kughoph ni ịmi mem ịiḅaghami.
Ọdi kuuko ni ịmi sịphe Otu phọ ọdi.
Ọdi kụmeremi ịmi ạnyu aḍighiigh, kụ aḍighi ịdi ịyaar ịmi kíḍighi.
6 Mị kạkpar apu oomo ạbumulogh-ḍien phọ ạmi ukoom bọ ịmi.
Rꞌọḅaal ologhi kụ mị ạphighironom ẹkia sịphe Otu phọ ọdi,
kụ mị ạmoor ghan aboom Ọmoogh-we phọ.
7 Ụnaghanan ghan ịmi, Ọmoogh-we, mem lọ mị ạmagh nyịna,
ụnma ịmi ighirigiir ạḅile ụphagharanaan ịmi.
8 Mem lọ nạ ạḅem mọ, “Tue ụuḅereghi ịmi,”
mị rạpagharanaan ghan mọ, “Mị ratu ni.
9 Kạ́booghian esi ạmi.”
Kụ́ghagham ịmi ologhi.
Kámutonaan otelhedom mọ ạna.
Nạ kụ rụlhoghonaan ghan ịmi ḍịghaagh.
Kụ́wile, kútoka ịmi,
Ẹnaan Ọpelia phọ ạmi.
10 Ghạlamo ọde ạmi rꞌonhiin ạmi kumutonaan ịmi,
Ọmoogh-we phọ kuphogh ghan ni ịmi.
11 Ọmoogh-we, ụtughemi ịmi ịpe nạ rạwa bọ mọ mị uḍighi.
Nạ kurorori ni ịmi eten dị ịyaar ịmi kíḍighi
ịdi eḍighi bọ mị ạmoogh ḍita ạmulogh-ḍien.
12 Ịmi kạ́ḅogh ạngo bụmulogh-ḍien phọ ạmi,
bụphe rụgbaaghiom ghan bọ ịmi ọkpe rꞌịpaaraghan.
13 Mị alegheri ni mọ mị kạtol li ạmiin
ẹnighe Ọmoogh-we phọ sịen aghuḍum mọ ạkuen.
14 Ḍuom ologhi Ọmoogh-we phọ.
Mọogh omeeraam. Kátoph ologhi ạna.
Ḍuom ologhi esi Ọmoogh-we phọ.