Ẹḍogh Ọmoogh-we phọ sịphe oologh phọ
29
*Iboom Ọmoogh-we phọ, nyina ạbuphe edi bọ kꞌạke,eboom eghuan phọ ọdi rꞌịikpo phọ ọdi.
2 Ịngo Ọmoogh-we phọ eghuan dị ẹkasian rꞌaḍien phọ ọdi,
kụ ekpuḍian ghan ẹeḅereghi ghisigh Oye Aruukuan phọ.
3 Ịnaghan ẹḍogh Ọmoogh-we phọ ẹpe ạriphiiny phọ.
Ẹnaan arughuenian ạmaphaan
kụ ẹḍogh ọdi emenyon ạnyu ọphiiny phọ.
4 Ẹḍogh Ọmoogh-we phọ ẹmoogh ni ịikpo;
ẹḍogh Ọmoogh-we phọ ẹḅaram ni rughuenian rꞌeegu.
5 Ẹḍogh Ọmoogh-we phọ rebunughi ghan rạsaga,
rebunughi ghan ghạlamo rꞌạrasaga ịpe ạLebanon.
6 Kụ raḍighi ghan ịdi ạraaḅaraph ạLebanon repeleghu ghan dịadi ạnmuny ạsinam,
ạḅile aḍighi ịdi Eegum ạHermon epeleghu ịdipho onyugheel ạnam.
7 Ẹḍogh Ọmoogh-we phọ remitiom ghan nem ạnian.
8 Ẹḍogh Ọmoogh-we phọ repighemi ghan ẹdala phọ;
Ọmoogh-we phọ rapighemi ghan ẹdala phọ aKades.
9 Ẹḍogh Ọmoogh-we phọ meḍighi ịdi oghunughun rakun ọya ọnuen.
Ẹḍogh Ọmoogh-we phọ reḅonyon ịla ireeny ẹpe ẹekpua phọ.
Kụ sịphe Otu Ịiḅereghi phọ ọdi oomo awe phọ rọmoor ghan koboom rughuenian phọ ọdi,
ọḅile rọkaaph ghan ịlo eegu phọ ọdi.
10 Ọmoogh-we phọ ạtol ạnyu ạmuum-aḍigho phọ;
Ọmoogh-we phọ ạtolom ạgada ạbudaam kꞌagee-pọ.
11 Ọmoogh-we phọ rạngo ghan we phọ ọdi ịnyaam;
kụ ạḅile ạsephom bịdi rꞌẹepho.