Job
26
1-2 Ọpo eeghia ịma ọloghonaan ạḍighaagh dị nạ ụngo ịmi —uwekulom dị ịyaar ụ́moogh ịduon ạmi!
3 Nạ rạngo ghan ịma oroma
kạḅile ạngo aani olegheri ịyaar phọ ạna uwelologhi dị ạrol ịduon ạmi!
4 Nạ ragbiom ghan mọ ạnhian kụ kạpamanam bọ oomo ikpo ọnhu phọ ạna?
Ạnhian kụ anyuughiom nyịna ọghaaph ịduon phọ?
[Bịldad]
5 Aruwaloor ạbuphe momuughu bọ rokpereghaan ghan ni
ẹpe ologhi ạrumuum eeḍian ade phọ.
6 Ọmar iḍim akughuronu ni esi Ẹnaan;
ịyaar íikpereghi ọmar iḍim riḍien ọdi.
7 Ẹnaan ẹetarion okuaḍio ephunom mọ,
ẹḅile ekereri de phọ esi dị ịyaar ílho.
8 Ẹnaan phọ kụ imuzeḍi mụum sịphe ọotu phọ
kụ ẹḅile ẹpam ịlo kátuphaan loor esi ẹemor phọ.
9 Ọdi ạbooghi oomo ụnwanyu phọ ọman ọotu.
10 Ọdi ạgbarion ḍịḅaal rꞌufiri
esi eegida dị ọgoor ạnyu otu-ḅualhe phọ.
11 Mem lọ ọdi ạdegh rọko phọ ẹpham bọ okuaḍio phọ,
bịdi ropiigha ghan kokpereghaan loor oghiilaan.
12 Ịnyaam mọ ọdi kụ ịkpar epu ạbazi phọ;
esi ẹmaar phọ ọdi kụ ọdi aagulemi bọ Rehab phọ úzuan ghan bọ.
13 Aḍiphooghu ọdi kụ regbuurogh ghan bọ okuaḍio phọ,
ḅịle kẹn ạḍighaagh ọdi kụ rekiigh ghan elhom ẹnam dị resuma.
14 Kụ ọlo ịphen phọ eḍeenaan ịikpo phọ ọdi ẹnum bịn,
iiphola phọ bịn kụ ẹdi yira mọnaghan bọ.
Ạnhian kụ katue alegheri ọkar ịpe Ẹnaan phọ ẹbugh bọ ẹman?