Ọnyo aLivai rꞌọganeen ạnir ọdi
19
Mem mọ ạmuphe phọ ọdaam ólho ẹpe Ịzirel; kụ oniin ọnyo aLivai ạrol li dị arugh ẹpe ẹbam ẹmha ẹpe aroogbolom mọ Ifraim dị ạgaany oniin ạnir ọlo ạBetilihem ẹpe eelhe aJuda. 2 Kụ ịyal phọ ạbidi ọmoogh ọgbaragbara kụ ạnir phọ ạwile nyọdi agheel kꞌọde ọdi ẹpe Bẹtilihem ẹpe eelhe aJuda kụ ạrol ẹpe inya ụnwanyu. 3 Kụ olhom ạnir phọ ạḅem mọ ọno kạki ạaḅereghi ọnyani phọ arigheel; ọdi ạpham otelhedom ọdi rꞌịyal ịnam adool. Kụ ạnir phọ ạsighe ọnyo aLivai ạlogh otu. Kụ mem dị ọde ọnyani phọ ạmiin oye phọ, ọde phọ ạsighe ọony phọ aghuraam ịdipho ooruen. 4 Ọganeen ạnir phọ ọdi, ọde ọnyani phọ, ạpham nyọdi kụ ọdi ạrol kꞌọyogo phọ ọdi ịraar aḍughul-otu rolhe rọphughol, kụ ọdi arugh sịphe. 5 Rẹman inya aḍughul-otu kụ bịdi oḅon oḅetenu esoph ạḍiroor ookoroghian ghan ịlo ogheel, kụ ọde ọnyani phọ ạḅeni nyọdi mọ, “Mọony ạmi, sịghe ạbred alhe ạphamam ịnyaam kụ agbi ogheel.”6 Kụ ḍita ạbidi ọrol ude ọḅophoghan olhe eḍien ọphughol. Kụ ọde ọnyani phọ ạḅeni ọyogo phọ ọdi mọ, “Ẹḅeeraan ni nyịna, seseeny, pọ ḅịle ạrol oomo aḍughul phọ sịen, ologhi ạna ạḅaal.”
7 Kụ tọro amem lọ oye phọ aḅetenu ịlo ogheel, ọyogo phọ ọdi amirighan nyọdi mọ kúkeel, kụ ọdi ạḅile ạmina ẹḅaal.
8 Kụ ọdi aḅetenu esoph ạḍiroor dị mẹman oogh aḍughul-otu ịlo ogheel, kụ ọde ọnyani phọ ạḅeni nyọdi mọ, “Seseeny, pạma oḅiom ạna.” Kụ ọdi ạrol ẹteeny ootaany, kụ ḍita ạbidi ọḅophoghan olhe eḍien. 9 Kụ mem dị oye phọ rꞌọyuga phọ ọdi rꞌotelhedom mọ ọdi oḅetenu rokeel, kụ ọyogo phọ ọdi, ọde ọnyani phọ, ạḅeni bịdi mọ, “Ịmiin, nyịidipho aḍughul rekul, ịmina, iḍue kụ eḅon eḅetenu egheel.”
10-11 Kụ oye phọ ómeeraam mun ọḅile ọmina sịphe kꞌọdi, kụ ọganeen ạnir phọ rꞌọdi rꞌotelhedom mọ ọdi ọgban sidool phọ pạ ịnam adool phọ kụ oḅetenu ogheel. Meḍighi ni ẹminighan amem kụ bịdi ọtol ropogh Jebus (ẹpe phọ pọ aJeruselem) kụ otelhedom mọ ạḅeni ọde-otu phọ ọdi, mọ, “Itu yira ọgbatanu oḍigh ẹmha awe aJebusait ẹphen, ọmina sịphe ḍughul phọ.”
12-13 Kụ ọde-otu phọ ọdi ạḅeni nyọdi mọ, “Yira kọ́meera ẹmha dị ítu ẹmha awe Ịzirel. Yira kọḅeeny ni ọki ghisigh kụ ọmina ẹpe Gibia mụghumo aRama.” 14 Kụ bịdi ọḍua oten Jebus ọghi ghisigh. Erumuḍio remeel ighool kụ bịdi ogbi osi aGibia, ẹmha ẹlo eghun ạBenjamin. 15 Bịdi ụgbatanu eten phọ ọghi ẹpe ọrol ọmina ẹḅaal. Kụ bịdi ọghi oḍigh ẹmha phọ kụ ọrol ude sịphe ogbo ẹmha phọ kụ oye ọ́rol dị kạsighe bịdi asiemi kꞌọdi ọmina ẹḅaal.
16 Bịdi odi ni sịphe kụ oniin okumoor oye dị ratigheel rukumuan aru. Oye phọ ọlo eniin ẹbam ẹmha ẹpe aroogbolom mọ Ifraim, kụ atugh ẹpe Gibia. (Ạbunon awe dị odi aani ạbuo eghun ạBenjamin.) 17 Kụ okumoor oye asomori riḍien ọdi aphogh kụ ạmiin oye phọ ạrol bọ ude sịphe ogbo ẹmha phọ. Kụ okumoor oye phọ apuru nyọdi mọ, “Nyina ịḍua ẹghen kụ retu? Kụ nyina rẹki ẹghen?”
18 Kụ ọnyo aLivai phọ ạphagharanaan mọ, “Yoor ụḍua ni ẹpe Bẹtilihem ẹpe eelhe aJuda, kụ nyịidipho yoor rokeel ẹpe ẹbam ẹmha ẹpe aroogbolom mọ Ifraim kụ oye iyoor ụ́magh ụ́logh otu. 19 Yoor ọpam ni roopho ịbiakpa, eḍien ẹlo ịnam adool phọ, rꞌeḍien rꞌamiim ịlo ạmi, ḅịle rꞌọnyani-otu phọ ạna, rꞌonyugheel ọony phọ odi bọ sịphe ogbo abutelhedom mọ ạna. Ịyaar iyira íku.”
20 Kụ okumoor oye phọ ạḅeni nyọdi mọ, “Ẹboroph ịrolonaan inyina! Tọrobo ịyaar lọ nạ ụ́moogh mị kịngo ni inyina. Kẹ́mina ẹḅaal sịen ogbo ẹmha phọ.” 21 Kụ oye phọ ạsighe bịdi asiemi otu, kụ ạngo ịnam adool phọ ịḅal ịnam, kụ bịdi ootola ruwol ạbidi olhe ọphughol.
22 *Bịdi odi ni role rọpughol bịn awe ịsiphe ẹmha phọ, kụ ạruuḍueneen abulhiom ẹmha ọsar oru okoom otu phọ kụ omiigh ọgurogh eghuugh otu phọ oḅonyon, kụ ọḅeni okumoor oye phọ mọ, “Sịghe oye phọ odi bọ kꞌạna amitiom yoor ọrolan esi.”
23 Kụ oye phọ, uwotu phọ, amite ạghi ạteeny bịdi, kụ ạḅeni bịdi mọ, “Eeye, bumor ạmi, kéḍighi ịlo ạsipioghom mọ anyina. Nyina ẹmiin ni mọ oye phọ ọphon phọ aḍigh kꞌạmi. Kéḍighi ọdo ịkaraph rꞌạsiḅaphanya dị ẹrol ịdipho. 24 Ịmiin. Esina ọnyani phọ ạmi rꞌọyuga ọdi odi ni sịen. Mị kamitiom bịdi ẹsighe eḍighi ịlo ịḅeeraan inyina, kụ ọlo, kéḍighi oye phọ ọphon ịlo ạsipioghom mọ rꞌạsiḅaphanya phọ anyina.” 25 Kụ awe phọ nyọdi ụ́wa ọnaghanan. Kụ ọnyo aLivai phọ ạsighe ọyuga phọ ọdi amitiom ạngo bịdi, kụ bịdi oḍighi yogh ọnyani phọ ịlo orue ọphue ọnyani phọ oofolomi oomo aḍughul phọ, úpooghian bịn tụtu ẹḅaal. Kụ ạḍiroor rẹḅaal kụ bịdi ọwile ọnyani phọ mọ agheel.
26 Kụ ạḍiroor retu ọḅaal kụ ạnir phọ aru sịphe ọnhu-aḍibuo otu olhom mọ odi bọ tụtu ẹḅaal, kụ ameel. Ạrol li sịphe phọ kụ ẹḅaal ḍịroor. 27 Olhom aḅetenu ḍịroor phọ ạki akughuron eghuugh phọ kụ amite ạḍua rạki ḍịo odi, kụ ạmiin aani ạnir phọ ọyuga phọ ọdi dị ạmina sịphe eghuugh otu phọ, kụ ạraghaagh ạnir phọ edi sịphe ịbaay ịḅaghaghaam ọnhu-aḍibuo phọ. 28 Kụ ọdi ạḅeni ạnir phọ mọ, “Ḅetenu ogheel.” Kụ ạnir phọ nyọdi ọ́phagharanaan. Kụ oye phọ aḅeton ạnir phọ ạsaany agborori ẹnam adool, kụ amiigh ogheel. 29 *Kụ rosi ologhi otu kꞌọdi, kụ ạsighe ẹleke ạkiriph adi ruzu ọyuga phọ ọdi ḍioph rꞌịyal asibin, kụ ạsighe ạghiomaan oomo arughunughun phọ Ịzirel, bin eghun. 30 Kụ oomo ạbuphe ọmiin bọ ọḅem ghan mọ, “Tạa, ịdo phọ ịphen phọ ke̋mite ghan, ḅịle kẹn yoor kọ̋miin ghan ịdo phọ ịphen kꞌagee-pọ awe Ịzirel ọḍua bọ ẹpe eelhe phọ Ijipt omite kꞌarodon. Ọotughian oopuruan kụ ogbi olegheri ịdi koḍighi ịlo ịphen phọ.”