Josua
Ẹnaan ẹmha Josua oḍiemiom
1
Kụ aMozis otelhedom Ọmoogh-we phọ romugh bọ, kụ Ọmoogh-we phọ ạḅeni Josua ọony phọ ạNon arelhenaan ghan bọ Mozis sidom mọ mọ, 2 “AMozis otelhedom mọ ạmi mamugh. Kụ iḍighi, nyịidipho ḅetenu ạḅeeny Ọphiiny ạJodan aphun, nạ rꞌoomo awe phọ ạbuen ẹghi esi ẹpe ade phọ ạḍiphe mị ạngo bọ bịdi we phọ Ịzirel. 3 *Tọrobo esi phọ ẹpe ạrada aruwol phọ anyina kẹezeghi bọ, pọ kụ ade phọ mị ịngo bọ inyina ịdipho mị ạḅeni bọ Mozis. 4 Emiigh kꞌẹpe ẹdala phọ rꞌịsien Lẹbanon ẹghi esiemi oboom mọ ọphiiny phọ, Ọphiiny aYufratis, oomo ade phọ ạbuo ạHitait, ẹghi esiemi ẹpe Ọphiiny aMeditarenian phọ, ẹsighe ẹghi esiemi ẹpe erumuḍio phọ remeel ghan bọ kụ ọku anyina. 5 *Oye ólho ẹpe phọ dị katue ạkpar apu nyịna oomo asiḍughul-otu aghuḍum mọ ạna. Ịdipho mị ạrolonaan bọ Mozis, ịdipho kụ ịdi mị kạtuugh ạrolonaan nyịna. Mị nyịna kạ́wile; kẹn, mị nyịna kághel. 6 *Kpạrami loor ạna, ạmoogh oḅiom, loor esi dị nạ kụ kaḍighi ịdi awe phọ ạbuen kọmoogh de phọ, ḍịphe mị aghunya bọ esi ạburude phọ ạbidi ọngo ạbidi. 7 Kpạrami loor ạna, ạmoogh oḅiom. Gona loor ạdaph ghan oomo iilogh phọ ịpe aMozis otelhedom mọ ạmi ạlogh bọ ạngo nyịna kụ aḍighi ghan, úkitonu ghan ụ́ki ḍịghaagh elhiom mꞌạḍighaagh ekeeny, ọbo ẹnighenom nyịna tọrobo ekpisi lọ nạ rạki. 8 Ạḍinya Ologh phọ kị́ḍua ghan sịphe ọnhu phọ ạna, ạtuugha ghan ḍughul rꞌootaany, agona loor ạna, ạdaph ghan oomo ịpe ọge bọ sịphe phọ kụ ạtuugh ghan aḍighi, kụ keḍighi ịdi oomo areten phọ ạna kẹmoogh edughom kụ nạ ạmoogh ẹeḍiom. 9 Kụ mịna ḍịen nyịna ologh kọ̋lhogh ọngo ḍụghum? Kpạrami loor ạna, ạmoogh oḅiom, kákpereghaan, ologhi ạna kụ́konono, loor esi dị Ọmoogh-we Ẹnaan phọ ạna kạrolonaan ni nyịna tọrobo ekpisi lọ nạ ạghi.”AJosua ạtooghi ịtooghi rạngo weye phọ
10 Kụ aJosua ạto ạḅeni bụo ạrumhu ẹgham mọ 11 mọ ọḍua ogbogo oten ogbogo kụ ọḅeni we phọ Ịzirel mọ, “Iikoroghian riiḍien lọ nyina kele, ịdi eḍighi bọ esi ịraar aḍughul-otu yira kọḅeeny Jọdan opun, ọki ọsighe de phọ ạḍiphe Ọmoogh-we Ẹnaan phọ anyina ịngo bọ inyina mọ ịmoogh.”
12 *Kụ aJosua ạḅeni eghun aRuben rꞌeghun ạGad rꞌạpakiri eghun kꞌạManase mọ, 13 “Ịitughian ịpe aMozis otelhedom mọ Ọmoogh-we phọ ịḅeni bọ inyina mọ, ‘Ọmoogh-we Ẹnaan phọ anyina kịngo inyina phọ ạḍien edi bọ ạga emitenom ạJodan dị keḍighi ḍịo anyina.’ 14 Ạnmariir phọ anyina, ịbam ạnmuny phọ anyina rꞌịnam otu phọ anyina kọtol sịen, kụ awe ẹgham anyina dị mọnya ịlo ẹgham koḍiemiom bụeri phọ awe Ịzirel ọḅeeny Jọdan esi ọloghonaan ạbidi ḍịghaagh, 15 tụtu bịdi oḍigh aani ọrol de phọ ạḍiphe edi bọ ạga emeelom ạJodan phọ, ḍịphe Ọmoogh-we Ẹnaan phọ anyina rạngo bọ bịdi. Mem dị ọdi mạmaar aseere oomo arughunughun phọ Ịzirel, kụ nyina egbi oḅula sịen ọghelom ade phọ ạḍien ạga emitenom ạJodan, ḍịphe aMozis otelhedom mọ Ọmoogh-we phọ ịngo bọ inyina.”
16 Kụ bịdi ọphagharanaan Josua kụ ọḅem mọ, “Oomo phọ ịphen nạ ụḅeni bọ iyoor, yoor koḍighi ni. Tọrobo ekpisi lọ nạ urom iyoor ọghi, yoor kọki ni. 17 Ịdipho yoor ọnaghanan bọ Mozis oomo ạraraar, ịdipho kụ ịdi yoor kọtuugh ọnaghanan ghan nyịna, ịnon kẹ́tol. Ịdipho Ọmoogh-we Ẹnaan phọ ạna ạrolonaan bọ Mozis, ọdi kạtuugh ni ịdipho ạrolonaan nyịna. 18 Tọrobo oye lọ ạmoogh ịgbagharan esi iilogh phọ ạna kụ ịlo nạ ạghaaph ụ́naghanan, ịlo nạ ạto ạḅeni nyọdi úmeeraam; pọ oghiigh nyọdi ịnon ílho. Kpạrami loor ạna, ạmoogh oḅiom.”