Rut
Ẹlimelek rꞌọto ọdi ọki ẹpe eelhe ạMoab
1
1-2 Mem dị mebia ni iboom, mem dị Ịzirel kőmiigh ọmoogh ọdaam eelhe, kụ ịgbakuro ẹrol ẹmha phọ. Pọ kụ esi dị oye dị oghol mọ Ẹlimelek ọlo ọto Ẹfrat kụ arugh ghan ẹpe Bẹtilihem ẹpe eelhe aJuda. Oye phọ ọphon phọ rꞌạnir ọdi dị oghol mọ aNaomi, rꞌịyal ạnmuny ạbidi dị oghol mọ aMalon rꞌaKilion, oten ọghi ẹpe Mọab kụ orugh. 3 Ẹlimelek aru amugh, bịn esugha aNaomi rꞌịyal phọ ạnmuny phọ ọdi. 4 Ạnmuny phọ ophinogh nmạriir, nmạnyaan ạMoab dị ooghologh mọ Opa rꞌaRut. Mem dị ḍioph ạsia reten, 5 aMalon rꞌaKilion omuughu aani kẹn ni. Sịen phọ ịyal phọ ạnmuny phọ rꞌolhom mọ omuughu bọ, aNaomi bịn kụ asugha.ANaomi rꞌaRut rotigheel Bẹtilihem
6 Mem dị ọony ẹnum amem reten kụ aNaomi ạnaghan mọ Ọmoogh-we phọ mạseph we ẹmha ạbidi ạngo bịdi igeny ibugha. Kụ ọdi rꞌạnmariir ạnmuny phọ ọdi ookolobian ọḍua ạMoab. 7 Kụ bịdi oḅetenu ogheel aJuda. Ẹpe eten 8 kụ aNaomi ạḅeni ịyal phọ ạnmanyaan phọ mọ, “Ikeleghu kꞌaburunhiin anyina. Ọmoogh-we phọ ịkpe ni inyina igey esi ịma ạdol phọ nyina ẹrolan bọ rꞌạmi ḅịle kẹn rꞌạbuphe momuughu bọ. 9 Ọmoogh-we phọ aḍighi ni ịdi nyina kẹḅile ẹbalagh ilom ẹmaraghian; oye ye anyina ạmoogh ni otu kꞌolhom ọdi!”
Kụ aNaomi ạkpun bịdi, kụ ạḅeni mọ, “Egheel anyina ẹnighe.” Kụ bịdi omiigh emoghi. 10 Kụ ọḅeni onhiin-olom mọ ạbidi mọ, “Eeye, yoor kọdaph ni nyịna okeel ọki ọteeny we phọ anyina.”
11 Kụ aNaomi ạḅeni bịdi mọ, “Nmạnyaan ạmi, ikeleghu kꞌanyina. Nyina ighol eeghe kụ kịdaph bọ ịmi? Nyina regbiom ghan mọ mị katue ni ạḅile ạmar nmụny dị nyina kẹbal? 12 Iḅula. Mị mạkpo ạpughan ọḅile ạal ilom. Ghạlamo kẹn mị ạal li ilom rodon kụ ạmaraghi nmụny, 13 nyina ketue ni ẹkparam ẹtol ekori bịdi ọmanam? Nyina kẹbal li ọnon oye ḍụghum? Eeye, nmạnyaan ạmi, nyina elegheri ni mọ kétue eḍighi. Ọmoogh-we phọ muwiririom ịmi ḍịghaagh ọdi kụ ighirigiir anyina edi ni.”
14 Kụ bịdi ọḅile omiigh emoghi. Pọ kụ esi dị Opa ạkpun onhiin-olom mọ ọdi kụ ạḅeni mọ aḍughul ḅọroph bịn ọdi aten agheel ẹpe kꞌạbidi; kụ ọlo aRut ómeera ọ́wile nyọdi. 15 Kụ aNaomi ạḅeni Rut mọ, “Rut, ọnyo-etian phọ ạna magheel ẹpe kꞌawe phọ ọdi rꞌạrumugh phọ ạbidi. Keel aani.”
16 Kụ aRut ạphagharanaan mọ, “Ịmi kúphorogh. Bịle mị ụdaph nyịna ukeel. Tọrobo ekpisi lọ nạ ạghi, mị kẹn kạki aani ni. Kụ esi phọ ẹpe nạ katugh bọ kụ ẹdi mị katugh aani. Awe phọ ạna koḍighi we phọ ạmi. Ẹnaan phọ ạna, pọ Ẹnaan phọ ạmi aani. 17 Esi lọ nạ ạrol kụ amugh, sịphe kụ ẹdi mị kẹn kạtol amugh aani. Ịsiphe kụ ẹdi kuḍi aani ịmi. Ogbogh ạghelhe Ọmoogh-we phọ usoorom ịmi eḍighi mạar dị mị ameera mọ ịyaar ẹgbarion ịyal ayira omuton ḍuugh.”
18 Kụ mem dị aNaomi ạmiin bọ mọ aRut ạnya ni agey ọdaph ọno bịn ọdi ọ́ḅem mun ịyaar.
19 Kụ bịdi orelhian ọghi osi Bẹtilihem. Mem dị bịdi osi bọ, oomo phọ ẹmha phọ iphiigha ni, kụ ạnmariir ẹpe phọ opuru ghan mọ, “Ọphon phọ ọkaraghi aNaomi phọ ni?”
20 Kụ odi ạḅem mọ, “Ịmi kị́magh mun mọ aNaomi. Ịmagh ghụn ịmi mọ aMara, ịdi eḍighi bọ Ẹnaan Oomo Ịikpo phọ metene ghuḍum ạmi eghiḍim. 21 Mem mọ mị ạḍua bọ ẹphen, mị ụmoogh ni amuzeḍi kụ ọlo Ọmoogh-we phọ muḅulemi ịmi oopho ạraghaagh. Iḍighi ika kụ nyina kịmagh bọ ịmi mọ aNaomi sịen Ọmoogh-we Oomo Ịikpo phọ mughel bọ ịmi ạḅile ukpolom ịmi ịiḅaghami?”
22 Ịphen kụ ịdi aNaomi rꞌaRut ạna-oyil phọ ọdi ọlo ạMoabait phọ ọḍua bọ ẹpe eelhe phọ ạMoab origheel Bẹtilihem. Iḍighi mem dị pụruku omiigh ibugha ịbiakpa abali.