Kụ onhiin phọ ọdi ạḅeni nyọdi mọ, “Ọmoogh-we phọ ạseph ni nyịna, mọony ạmi.” 3 Ọdi aḅulemi ni ikpoki phọ, ḍioph rꞌoniin okuron ipoḍi asilva phọ, ạngo onhiin phọ ọdi. Kụ onhiin phọ ọdi ạḅem mọ, “Esi oogbonyon ịkaraph itonyonaan phọ ẹmhu ọony phọ ạmi, mị rꞌaloor ạmi mạḅogh silva kạngo Ọmoogh-we phọ. Kọsighe oreeny kụ ọkaam ẹkaaneen ẹmugh ọḅile ọsighe silva kụ ạdaphariom ạnyu phọ. Kụ nyịidipho mị kaḅulemi ipoḍi asilva phọ ạngo nyịna.” 4 Kụ mem mọ ọdi aḅulemi bọ ikpoki phọ ạngo onhiin phọ ọdi, ạnir phọ ạsighe ịyal okuron ipoḍi asilva ạngo oye dị rạlem ghan silva. Kụ ọdi ạsighe oreeny ạkaam ẹkaaneen ẹmugh kụ ạḅile ạsighe silva phọ ạdaphariom ạnyu phọ. Kụ edi ghan sịphe otu phọ aMaika.

5 Kụ aMaika, oye phọ ọphon phọ, ạmoogh ḍịghom rꞌẹphan ạrumugh, kụ ạsighe oniin ọony ọdi aḍighi oyil ạrikia. 6 ^*Mem mọ ạmuen phọ ọdaam ólho Ịzirel, kụ tọrobo oye aḍighi yogh ghan ịlo ẹḅeeraan nyọdi.

7 Mem mọ ạmuphe phọ onyugheel ọlo eghun aLivai ạrol li dị arugh ẹpe Bẹtilihem ẹlo aJuda. 8 Ọdi ạwile Bẹtilihem kụ ạwa ghan ekpisi orugh, kụ ọdi arelhe ạghi asi ẹpe aroogbolom mọ Ifraim, kụ aru asi kꞌaMaika. 9 Kụ aMaika apuru nyọdi mọ, “Nạ ọlo ẹghen?”

Kụ oye phọ ạḅeni nyọdi mọ, “Mị ọnyo aLivai. Mị ọlo ạBetilihem ẹpe eelhe aJuda, kụ mị rạwa ghan esi orugh.”

10 AMaika ạḅeni oye phọ mọ, “Tue ạrolan rꞌạmi, aḍighi oye oroma rꞌọpinyon rịkia ạmi kụ mị kạkpe ghan nyịna ḍioph ipoḍi asilva lhạ. Mị kạngo nyịna eḍien olhe rꞌarukpe omuuna.” 11 Onyugheel ọlo eghun aLivai phọ ameeraam ni kụ ạrolan rꞌọdi ịdipho ọony. 12 Kụ aMaika ạkoonaan ịko ariil ạrikia onyugheel phọ, kụ ọnyo aLivait phọ aḍighi oyil ạrikia aMaika kụ arugh sịphe kꞌaMaika. 13 Kụ aMaika ạḅem mọ, “Nyịidipho ọnyo aLivai kụ maḍighi bọ oyil ạrikia ạmi, mị alegheri ni mọ Ọmoogh-we phọ kaḍighi ni ịdi ạraraar kịnighenaan ịmi.”