Ja' li' yaloj ti ta sta yora ti oy much'utic chicta sbaic ta xch'unel li sc'op Rioxe
4
Ti Ch'ul Espíritue isyules xa ta joltic ti oy much'utic chicta sbaic ta xch'unel li sc'op Rioxe ti c'alal mu to'ox ta xcha'sut tal ti Jesucristoe. Ja' chlic xch'unic ti c'usitic chalic ti jlo'lovanejetique ti ta xchanubtasatic yu'un ti pucujetique. 2 Ti much'utic ta xchanubtasatic yu'un ti pucujetique, ta xlo'lovanic, ta snopic c'op. Nopem xa'iic spasel li c'usitic chopole. Mu xa xa'i sbaic mi chopol li c'usitic tspasique chac c'u cha'al mu xa'i mi chpicbat sc'aq'uemal ti much'u c'aq'ueme. 3 Chalic ti mu xu' xinupunotique. Chalic ti oy ve'lil mu xu' jlajestique. Pero yaloj onox Riox ti xu' xinupunotique. Scotol li ve'lile Riox yac'oj, xu' jlajestic. Ja' no'ox tsc'an “colaval” chcutic ti Rioxe ti c'alal chive'otique, vo'otic ti quich'ojtic ta muq'ue, yu'un jna'ojtic ti yech yaloje. 4 Li c'usitic yac'oj ti Rioxe lec scotol, yech'o ti chopol mi ta jp'ajtique. Ja' no'ox tsc'an “colaval” chcutic ti Rioxe ti c'alal chive'otique. 5 Yaloj Riox ti lec scotole, yech'o ti xu' jlajestic scotole yu'un “colaval” chcutic ti Rioxe.Ja' li' yaloj c'u x'elan ti much'utic lec chtunic yu'un ti Jesucristoe
6 Mi yech chachanubtas li jchi'iltactic ta xch'unel li sc'op Rioxe, lec chatun yu'un ti Jesucristoe. Ja' chvinaj o ti ach'unoj ti c'usitic yaloj Riox ti ja' ta jch'untic jcotoltique, ti muc bu ch'ayem ta ajol ti c'u x'elan lachanubtasate. 7 Mu me xach'un ti vo'ne lo'ile ti scuenta no'ox sba balamile, ti ch'abal smelole. Ja' tsc'an chach'un ti c'usi chayalbe ti Rioxe yo' xnop o xava'i xch'unele. Ja' chac c'u cha'al ti much'u ta snopes yoc ta anile yu'un ja' tsc'an ti mu xlub c'alal ch-anilaje, yo' xcuch o yu'une. 8 Ti much'u ta snopes yoc ta anile ja' no'ox chtun ti c'u sjalil cuxule. Yan mi ja' ta jch'untic c'usi chiyalbotic ti Rioxe, chtun ti c'u sjalil cuxulotique, chtun ta sbatel osil noxtoc. 9 Li c'op li'i yech. Ac'u jch'untic jcotoltic. 10 Vo'otic ti quich'ojtic ta muc' ti Riox cuxul ta sbatel osile, jna'ojtic ti chba jchi'intic ta sbatel osile, yech'o ti chcac' jvocoltic ta yalel a'yuc li sc'ope. Yu'un istojbe smul scotol crixchanoetic. Pero ja' no'ox ti much'utic ta xch'unic ti itojbat xa smulique chba xchi'inic ta sbatel osil.
11 Ti x'elan lacalbee, ja' me yech xachanubtas li jchi'iltactic ta xch'unel li sc'op Rioxe. 12 Ac'u mi oy much'u chaslaban ti cremot toe, mu me xaxi' o. Vo'ot chavac'be yil ti lec ac'u c'opojicuque, ti ac'u spasic li c'usi leque, ti ac'u c'anvanicuque, ti j'ech'el ac'u xch'unic ti chcoltaatic yu'un ti Cajvaltique, ti ja' ac'u snopic li c'usitic naca leque. 13 Vo'ot chaval a'yuc sc'op Riox, chaloq'uesbe smelol. Ja' me yech xapasulan ti c'u cha'al xiyul o li'toe. 14 Mu me xavicta aba ta xchanubtasel li jchi'iltactic ta xch'unel li sc'op Rioxe. Yu'un ja' sc'oplal chatun o ti c'alal icac' jc'obticotic ta ajol xchi'uc li jchanubtasvanejetic ta sc'op Rioxe.
15 Sjunul me avo'on xapas li c'usi lacalbee, mu me xavicta aba. Ja' chil o scotolic ti yantic xa lec c'usi chapase. 16 P'ijan me, mu me soc avu'un smelol c'usi yaloj ti Rioxe. Nopo me lec ti c'usi chavale. Mi yech chapase, chacuxi ta sbatel osil. Ja' no'ox yech ta xcuxiic uc ti much'utic ta xch'unic li c'usi chavale.