3 Ja' tsc'an ti “colaval” chcutilanticotic ti Rioxe yu'un más xa chach'unic ti chascoltaic ti Cajvaltic Jesucristoe, más xa chac'an abaic noxtoc. Ja' tsc'an ti yech chcalbeticotic scotol c'ac'ale yu'un ti Rioxe ta spas scotol. 4 Yu'un ti yech avo'onique, jun co'onticotic chcalbeticotic li jchi'iltactic ta xch'unel li sc'op Rioxe ti butic ta stsob sbaique. Chcalbeticotic ti sjunul avo'onic ach'unojique, ti chcuch avu'unic ilbajinele. 5 Ti Rioxe xvinaj ti lec c'usi tspase. Vo'oxuc ti chcuch avu'unic ilbajinele, yu'un ti chac'an chabatic yo' bu tspas mantal ti Rioxe, ta onox xabatic. 6 Yan ti much'utic chayilbajinique ta onox x'ac'batic castico. 7 Li vo'oxuque abol abaic lavie, pero ja'o ta xlaj sc'oplal ti abol jbatic jcotoltic ti c'alal xcha'sut tal ti Cajvaltic Jesucristoe. Ta xchi'in tal yaj'anjeltac ti oy syu'elique. 8 Xchi'uc xojobal ta xyal tal chac c'u cha'al bu lec xtil c'oq'ue. Ja' chtal yac'be castico ti much'utic mu xich'ic ta muc' ti Rioxe, ja' ti much'utic mu xch'unic ti ja' chac' jcuxlejaltic ta sbatel osil ti Cajvaltic Jesucristoe. 9-10 Ti castico chich'ique ja' ti ch-ochic ta c'oc' ta sbatel osile. Mu xilbeic o sat ti Cajvaltic Jesucristoe xchi'uc ti slequilale. Vo'otic ti slecubtasoj co'ontique, ta xquich'tic ta muc' ti c'alal xtale. Mu xa c'u yech o li co'ontique yu'un lec tajmec ta xquiltic. Ja' yech chavilic uc yu'un ach'unic ti c'alal lacalbeic ti c'usi yaloje.

11 Yech'o ti scotol c'ac'al ta jc'oponticotic ti Jtotic Riox ta vinajele yo' lec xayilic o vo'oxuc ti yic'ojoxuque, yo' más xascoltaic o ta spasel li c'usitic lec chac'an chapasique xchi'uc ti ach'unojic xa ti ja' yech tsc'an chapasique. 12 Ja' yo' lec xbat o sc'oplal avu'unic ti Cajvaltic Jesucristoe, yo' lec xbat o ac'oplalic uque, ja' ti ta slequil no'ox yo'on chascoltaic ti Jtotic Riox ta vinajele xchi'uc ti Cajvaltic Jesucristoe.