22
―Jtotic moletic, jchi'iltactic, a'yic me li c'usi chacalbeique ―xi la.2 Ti c'alal iya'iic ti ic'opoj ta sbats'ic'opic li Pabloe, ch'ab xi la scotolic.
3 ―Li vo'one jurioon uc. Tey li'ayan ta jteclum Tarso ta estado Cilicia pero li' lich'i ta Jerusalene. Li' ijchan vune, ja' lixchanubtas li Gamaliele. Lixchanubtas ti c'u x'elan yich'ojic mantal ti vo'ne moletique. Ja' to'ox ta co'on xch'unel uc li smantaltac Rioxe chac c'u cha'al ach'unojic lavie. 4 Ja' to'ox yech iquilbajin uc ti much'utic yich'oj ta muc' ti Jesuse. Ti caloj uque, j'ech'el ta jmilic. Ta ants ta vinic ijtic' ta chuquel. 5 Li totil palee xchi'uc li jmeltsanejc'opetique sna'ojic ti ja' yech ijpase. Yu'un ja' liyac'beic ech'el orten yo' jtsac o tal ti much'utic yich'oj ta muc' Jesús ta Damascoe. Ti caloje, chba ox jchuc tal scotol yo' xich'ic o castico li'toe.
Ja' li' yaloj ti iyal c'u x'elan lic xch'un sc'op Riox ti Pabloe
6 ’Lec nan ta oltic c'ac'al, po'ot xa'ox xic'ot ta Damasco, oy c'usi xlebluj tal ta vinajel yo' buyone. Sac tajmec. 7 Liyal ta lum, ica'i ti oy much'u lisc'opone: “Saulo, ¿c'u yu'un ti chacrontainon ya'ele?” xi. 8 “Cajval, ¿much'uot che'e?” xcut. “Vo'on Jesus Nazareton ti chacrontainone”, xi. 9 Ti much'utic jchi'uc ech'ele iyilbeic ti xojobal uque, pero muc xa'iic ti c'usi li'albate. 10 “Cajval, ¿c'usi chac'an ti ta jpase?”, xcut. “Ochan ech'el ta Damasco. Tey cha'albat li c'usi chcac' apase”, xi. 11 Sac tajmec xojobal ti c'usi iquile, itup' o jsat. Snitojicon xa ochel ta Damasco ti jchi'iltaque.
12 ’Tey nacal ta Damasco jun jchi'iltic ta jurioal, Ananías sbi. Sjunul yo'on yich'oj ta muc' ti Rioxe. Lec x'ile yu'un scotol ti jchi'iltactic ta Damascoe. 13 Ti Ananíase tal sc'oponon. “Saulo, jamuc lasate”, xiyut. Ora ijam li jsate, iquil ti Ananíase. 14 “Ti Riox iyich'ic ta muc' ti vo'ne moletique last'uj yo' xana' o ti c'usi tsc'ane, yech'o ti avil ti much'u lec yo'one, ja' ti Jesuse. Ava'i atuc ti c'usi iyale. 15 Yu'un chavalbe crixchanoetic ti avile, xchi'uc ti c'usi layalbee. 16 Ich'o vo' ta ora. Jamal xaval ti avich'oj xa ta muc' ti Cajvaltic Jesucristoe, ja' chayac'be o pertonal yu'un lamule”, xiyut ti Ananíase.
Ja' li' yaloj ti iyal ti itaque ech'el ta yalel a'yuc sc'op Riox ta namal balamil ti Pabloe
17 ’Ti c'alal lisut tal li' ta Jerusalene, ay jc'opon Riox ta ti' muc'ta templo. Pero oy c'usi liyac'be quil ti Rioxe. 18 Iquil ti Cajvaltic Jesucristoe, lisc'opon. “Loc'an me ta ora li' ta Jerusalene. Yu'un lachi'iltac li'toe mu xich'ic ta muc' li jc'oplal chavale”, xiyut. 19 “Cajval, ja' ta jc'an ti li'on toe, yu'un sna'oj scotol jchi'iltac ti ijtic' ta chuquel, ijmaj ti much'utic yich'ojot ta muc' ta jujun stemplo li jchi'iltaque. 20 Ti c'alal imile ti ánima Estebane ti jamal iyal ac'oplale, tey va'alon jq'ueloj uc. Lec, ac'u chamuc, xichi uc. Vo'on ijchabibe spimilc'u'ic ti much'utic imilvane”, xcut ti Jesuse. 21 “Persa chabat, yu'un chajtac ech'el ta nom ta slumal ti much'utic ma'uc achi'ile”, xiyut ―xut la xchi'iltac li Pabloe.
Ja' li' yaloj ti iyal ti totil solteroe ti ac'u chucatuc ti Pabloe
22 C'alal iya'iic chac taje, icap o la sjolic ti xchi'iltaque. X'avlajetic xa la:
―¡Mu me xacoltaic le'e! ¡Milic! ―xiic la.
23-24 Ti x'elan tey x'avlajetique, ti tslich'ulan sc'u'ique, ti tsjipic muyel pucuc ta toyole, ti totil solteroe iyalbe la mantal ti yajcapitane ti ac'u yiq'uic ochel ta yut cuartel li Pabloe. Iyal la noxtoc ti ac'u yac'beic arsiale yo' la xal o c'u yu'un ti chcrontainat yu'un ti xchi'iltaque. 25 Ti c'alal laj chucbatuc yoc sc'ob ta nucule ti chich' ox arsiale, ja'o la iyal li Pabloe:
―Li vo'one jromaon. ¿Mi'n ameltsanojic xa jc'oplal ya'el ti chavac'becon arsiale? ―xut la ti jun capitan soltero tey va'ale.
26 C'alal iya'i ti capitane, ba la yalbe ti totil solteroe:
―Nopo me c'usi chanop yu'un li vinic ti aval chich' chuquele, jroma la uc ―xi la.
27 Ti totil solteroe ora la ital, tal la sjac'bel li Pabloe:
―¿Mi yech ti jromaote? ―x'utat la.
―Yech ―xi la li Pabloe.
28 ―Li vo'one ep ijtoj yo' liscuentain o li Romae ―xi la ti totil solteroe.
―Li vo'one jromaon onox ti c'alal li'ayane ―xi la li Pabloe.
29 Ti solteroetic chaq'uic ox arsiale iyicta la sbaic, ixi'ic la. Ixi' la ti totil soltero uque, yu'un la ja' iyal ti ac'u chucbatuc yoc sc'ob li Pabloe.
Ja' li' yaloj ti ic'ot ta stojol yajmeltsanejc'opic ti Pabloe
30 Ta yoc'omal ti totil solteroe tsc'an la cha'i c'u yu'un ti x'elan ta x'albat yu'un xchi'iltac ti oy smul li Pabloe. Ijitunbat la ti yoc sc'obe. Ti totil solteroe istac la ta iq'uel ti totil paleetique xchi'uc la ti jmeltsanejc'opetic yu'un li jurioetique. Ti c'alal iyulique, iloq'uesat la li Pabloe, i'iq'ue la tal yo' bu stsoboj sbaique.