Ja' li' yaloj ti iyac' sba iluc ta stojol vucvo' yajchanc'optac ti Jesuse
21
Vo'oticotic ti yajchanc'opoticotique, ts'acal to iquilticotic ta ti'nab Tibérias ti Jesuse. Ja' yech iquilticotic chac li'i: 2 Teyoticotic ta ti'nab xchi'uc jchi'iltac, ja' ti Simon Pedroe, xchi'uc ti Tomase ti vach xcuticotique, xchi'uc ti Natanaele ti liquem tal ta jteclum Caná ta estado Galileae. Tey jbanquil uc ti Zebedeo sbi ti jtoticotique. Tey otro cha'vo' jchi'ilticotic ta yajchanc'op ti Jesuse. 3 ―Chba jtsac tal choy ―xiyutoticotic ti Simon Pedroe.
―Batic, chba jchi'inoticotic uc ―xcuticotic.
Li'ochoticotic ta canova, libatoticotic. Sjunul ac'ubal ijsa'ticotic ti choye pero mi jcot muc bu ijtaticotic. 4 Ti c'alal isacube, iquilticotic ti tey ta ti'nab ti Jesuse. Muc xcojtiquinticotic mi ja'.
5 ―Jcremotic, ¿mi ataic xa li choye? ―xiyutoticotic.
―Ch'abal to ―xcuticotic.
6 ―Jipo ochel ta abats'ic'obic lanuti'ique, tey chataic ―xiyutoticotic.
Ti c'alal ijipticotique, inoj tajmec ta choy. Muc xlic cu'unticotic ochel ta yut canova. 7 Vo'on li Juanone ti más sc'anojon ica'i ti Jesuse,
―¡Ja' li Cajvaltic Jesuse! ―xcut ti Pedroe.
C'alal iya'i ti Simon Pedroe ti ja' ti Cajvaltic Jesuse, ora islap sc'u' yu'un sloc'oj to'ox. Isjip sba ta nab, ba sta ti Jesuse. 8 Li vo'oticotique ta canova liloc'oticotic, tey jquilojticotic loq'uel ti jnuti'ticotique yu'un noj ta choy. Mu másuc nom li ti'nabe, oy no'ox nan cien metrouc snamal.
9 Ti c'alal liloc'oticotic ta ti'nabe, iquilticotic ti tey tsoybil c'oq'ue, bats'i lec yac'lel. Tey chta'aj jcot choy. Oy tey pan noxtoc.
10 ―Ich'ic tal cha'cot oxcotuc lachoyique ―xiyutoticotic ti Jesuse.
11 I'och ta canova ti Simon Pedroe, ba snit loq'uel ta ti'nab ti jnuti'ticotique. Noj ta muc'tic choy. Oy ciento cincuenta y tres. Ac'u mi ep ti choye pero muc xjat ti stsacobile.
12 ―La' ve'anic ―xiyutoticotic ti Jesuse.
Mi jun muc jac'ticotic ti much'ue yu'un icojtiquinticotic ti ja' ti Cajvaltic Jesuse. 13 Ti Jesuse istam ti pane xchi'uc ti vobil choye, liyac'boticotic.
14 Ja' yox'ech'elal o iquilticotic ti Jesuse ti c'alal cha'cuxiem xa'ox loq'uel ta smuquenale.
Ja' li' yaloj ti i'albat ti Pedroe ti c'u x'elan chtune
15 Ti c'alal laj ve'iconticotique, ja' yech lic albatuc ti Simon Pedroe:
―Simón, screm Jonás, ¿mi más to ac'anojon chac c'u cha'al lachi'iltac li'i? ―x'utat yu'un ti Jesuse.
―Cajval, ana'oj ti jc'anojote ―xut.
―Ti much'utic ach' to lic yich'icon ta muq'ue, q'uelbon me chac c'u cha'al tsq'uel smimi'ic li jchabichijetique ―x'utat.
16 ―Simón, screm Jonás, ¿mi ac'anojon? ―x'utat noxtoc.
―Cajval, ana'oj ti jc'anojote ―xut.
―Ti much'utic vo'ne xa lic yich'icon ta muq'ue, chabibon me chac c'u cha'al ta xchabi xchijic li jchabichijetique ―x'utat.
17 ―Simón, screm Jonás, ¿mi ac'anojon? ―x'utat ta yox'ech'elal.
Ti Pedroe iyat o yo'on ti yox'ech'elal xa ijac'bate.
―Cajval, ana'oj scotol. Ana'oj ti jc'anojote ―xut.
―Scotol ti much'utic yich'ojicon ta muq'ue, sa'bo sve'elic chac c'u cha'al tsa'be sve'el xchijic li jchabichijetique. 18 Ta melel chacalbe, ti c'alal c'oxot to'oxe mu c'u vocol ava'i; atuc alap ac'u', labat ti bu sc'an avo'one. Pero ti c'alal xamolibe, chachuque. Alich'oj ac'ob ta te' chacham ―x'utat yu'un ti Jesuse.
19 Ti i'albat chac taje, ja' iya'i o ti Pedroe ti c'u x'elan ta xchame. Ti ja' yech ta xchame, ja' chac' o ta ich'el ta muc' ti Rioxe.
―Ich'on o me ta muc' ―x'utat yu'un ti Jesuse.
Ja' li' yaloj ti yech scotol ti c'usitic ists'iba ti Juane
20 Ti Pedroe iyil ti nap'alon ech'el ta spatique, vo'on li Juanone ti más sc'anojon ica'i ti Jesuse, ti tey ts'eelon ta xocon ti c'alal live'oticotique, ja'o ti c'alal ijac'be ti much'u junucal ch-ac'on o entrucale. 21 C'alal liyil ti Pedroe ―Cajval, li jchi'il li'i ¿c'u x'elan ta xcham uc? ―xut ti Jesuse.
22 ―Mi sc'an co'on ti cuxul chul jta ti c'alal xicha'sut tale, mu acuentauc. Li vo'ote ich'on o me ta muc' ―x'utat.
23 Ora iya'iic ti jchi'iltactic ta yich'el ta muc' ti Cajvaltic Jesucristoe ti muc bu chicham ti yalojique. Ti Jesuse muc xal ti muc bu chichame. Ja' no'ox iyal: “Mi sc'an co'on ti cuxul chul jta ti c'alal xicha'sut tale, mu acuentauc”, x'utat ti Pedroe.
24 Scotol ti c'usitic ijts'iba li'i yu'un iquil ica'i jtuc, vo'on li Juanone, ti yajchanc'opon to'ox ti Jesuse. Ja' yech ispas, ja' yech iyal ti Jesuse.
25 Toj ep c'usitic ispas ti Jesuse. Ti iyich'uc ts'ibael scotole, toj ep libroetic ti yechuque. Ti c'u yepal ts'ibabil li'i, xu' chicuxiotic o ta sbatel osil.