Ja' li' yaloj ti i'ay ta nupunel ta jteclum Caná ti Jesuse
2
Yoxibal xa'ox c'ac'al jc'otelticotic ta estado Galilea xchi'uc ti Jesuse, oy much'u inupun ta jteclum Caná. Tey talem ta ch'amunel ta sna jnupunel ti sme' Jesuse. 2 Ti Jesuse xchi'uc li vo'oticotique li'iq'ueoticotic uc. 3 Ti c'alal teyoticotique, ilaj ti yuch'bolique, ja' li ya'lel uvae.―Ilaj xa li yuch'bolique ―x'utat yu'un sme' ti Jesuse.
4 ―¿C'u yu'un ti x'elan tal avalbone? Yu'un mu to tsta yora ta jtam li cabtele ―xut ti sme'e.
5 Ti sme'e ja' yech lic yalbe ti jcholve'liletique:
―Ti c'usi chayalbeic li cole, xach'unic me ―xut.
6 Tey vuchajtic vaquib sp'inal ya'alic naca ton. Tey tspulic loq'uel vo' ti tspoc o sc'obic li jchi'iltac ta jurioale, yu'un stalelic ti jal tspoc sc'obique yo' lec x'ileic o yu'un Riox ti yalojique. Ti jujun p'inal vo'e x'och o cha'p'ej oxp'ej q'uib vo'. 7 Ti Jesuse iyalbe ti jcholve'liletique ti ac'u snojesic ta vo' scotol li p'inal vo'e.
Isnojesic lec.
8 ―Pulic ech'el jset'uc, ba ac'beic spas proval li much'u scuentainoj ve'lile ―x'utatic yu'un ti Jesuse.
Ispulic ech'el, ba yac'beic. 9 Ti much'u scuentainoj ti ve'lile, iya'i ti más to leque, ora istac ta iq'uel ti jnupunel creme yu'un mu sna' bu ital, yu'un vo' no'ox ti ipas ta ya'lel uvae. Stuc sna'ojic ti jcholve'liletique ti vo' no'ox ispulic ech'ele. 10 Ti much'u scuentainoj ti ve'lile lic yalbe ti creme:
―Li vo'otique jtaleltic ti ja' ba'yi chcac'tic ta uch'el ti bu más lec li ya'lel uvae. Mi ep xa'ox iyuch'ique, ja'to chcac'tic ta uch'el ti bu siclamane. Li vo'ote ja' anac' li más leque, ja'to chavac' ta uch'el ―xut.
11 Ja' yech ispas tey ta Caná ta estado Galilea ti Jesuse. Ja' sliqueb iyac' iluc slequilal syu'elal ti Jesuse. Vo'oticotic ti yajchanc'opoticotique ijch'unticotic ti ja' Xch'amal ti Rioxe.
12 Ts'acal to libatoticotic ta jteclum Capernaum xchi'uc ti Jesuse, xchi'uc ti sme'e, xchi'uc ti yits'intaque. Chib oxib no'ox c'ac'al tey lipajoticotic.
Ja' li' yaloj ti isnuts loq'uel scotol jchonolajeletic ta ti' muc'ta templo ta Jerusalén ti Jesuse
13 Po'ot xa'ox sq'uinal ti c'alal iloq'uic ta mozoil ti ba'yi jtot jme'ticotic, vo'oticotic li j'israeloticotique. Ja'o ibat ta Jerusalén ti Jesuse. 14 Ti c'alal ic'ot ta ti' muc'ta templo ta Jerusalene, tey ista jchonvacaxetic, xchi'uc jchonchijetic, xchi'uc jchonpalomaetic. Tey chotajtic jeltaq'uinetic noxtoc yu'un ja' tspasic o canal. 15 Ti Jesuse ixchuquilan ch'ojon co'ol xchi'uc arsial. Ja' isibtas o loq'uel scotol ti jchonchijetique xchi'uc ti jchonvacaxetique ti tey ta xchonolajic ta ti' muc'ta temploe. Ti jchonc'usiticuque sibtasbil iloq'uic ech'el xchi'uc ti xchijique xchi'uc ti svacaxique. Ti Jesuse isbutq'uinbe smexaic ti jeltaq'uinetique, itanij ti staq'uinique.
16 ―Iq'uic loq'uel lapalomaique. Mu xapasic ta ch'ivit li sti' sna Jtote ―xut ti jchonpalomaetique.
17 C'alal yech ispas ti Jesuse, vo'oticotic ti yajchanc'opoticotique iyul ta jolticotic ti yech onox ts'ibabil ta sc'op Rioxe: “Tot, ja' chlic quich' o crontainel ti sjunul co'on ta jc'an ti tey chac'oponat ta templo yo' bu sc'oplal onox chac'oponate”, xi onox ts'ibabil.
18 Ti cajmeltsanejc'opticotique tal sjac'beic ti Jesuse:
―Lavi x'elan chapase, ¿c'usi seña chavac' quilticotic ti oy ayu'ele? ―xutic.
19 ―Lomeso avilic li templo li'i, ta oxib c'ac'al ta jcha'va'an ―x'utatic yu'un ti Jesuse.
20 ―Ta cuarenta y seis jabil iva'i o li temploe. ¿C'usi chacha'le ti ta oxib c'ac'al chacha'va'ane? ―xi ti jmeltsanejc'opetique.
21 Li templo ti iyal ti Jesuse, ja' isjoy'al sba stuc ti ta xcha'cuxi ta yoxibal c'ac'al ti c'alal xich' milele. 22 Yech'o un ti c'alal icha'cuxie, iyul ta jolticotic ti ja' onox yech iyalbe ti jmeltsanejc'opetique. Ijch'unticotic ti ja' onox yech ts'ibabil sc'oplal ta sc'op Rioxe. Ijch'unticotic noxtoc ti sc'oplal no'ox stuc ti iyalbe ti jmeltsanejc'opetique.
Ja' li' yaloj ti yilojbe yo'on scotol crixchanoetic ti Jesuse
23 Ti c'alal teyoticotic ta Jerusalén xchi'uc ti Jesuse ti c'u sjalil ti sq'uinal ti c'alal iloq'uic ta mozoil ti ba'yi jtot jme'ticotique, ep jchi'iltac ta jurioal ixch'unic ti ja' st'ujoj Riox ti tspasvan ta mantal ti Jesuse ti c'alal iyilbeic slequilal syu'elale. 24 Ti Jesuse sna'oj ti mu scotoluc ti sjunul yo'onic ixch'unique. 25 Mu persauc oy much'u x'albon c'u x'elan yo'onic li crixchanoetique yu'un yiloj scotol.