Jaiye Co'amaña Pacohua'ire Quëaye
5
Iye jaiye co'amaña pacohua'i asajë̱'ë.
Oijë̱'ë cui'ne cuijë̱'ë,
mësaru ai yo'o ja̱'ñere asa quëquëjë.
2 Mësaru jai do'i co'amaña tsoe ja̱'juse'e a'ë cui'ne de'o ju'i ca̱ñaje pu'jupi a̱ni huesose'e a'ë.
3 Mësaru oro cui'ne curiquëje̱ yoco ne huesëse'e a'ë.
Ja̱je yoco ne huesëyepi i̱ñoji,
mësaru co'aye yo'oyere.
Ja̱je pa'ina,
ja̱pi mësaru ca̱pë̱a toa ëoyeje̱ pa'yerepa peo hue̱'ña ëo huesoja̱'coa.
Mësaru tëji mu'señare pare jaiye co'amaña de'huani teaye payë.
4 Mësaru tsi̱ña co'amaña necohua'ire sa̱ima'pë pa'ise'epi yure mësarute sa̱ñope i̱ñoji.
I̱ñoquëna,
Ëjaërepa tutu quë'ipi i̱ohua'i nesi do'ire sa̱ijë'ë,
cayere asapi.
5 Iye yeja pa'i maca mësaru de'o hue̱'ñare pare pa'ijë si'aye mësaru yëyere yo'ojë sihuajë paë'ë,
duruhue̱quë hui'yape jujuyeje̱ pa'ye jujuhuë.
Ja̱je pa'ina,
yure mësarute huai mu'seña ti̱'api.
6 Mësarupi huani je̱ohuë,
ti co'aye yo'oma'cohua'ini,
co'acohua'i a'ë cajë,
mësarute sa̱ñope yo'o tutu ti peocohua'ini.
Yo'o Jujahuë Cama'pë Quëcojë Uteye
7 De'oji.
Maija'quë do'ijë.
Mësaru cato yo'o jujahuë cama'pë quëcojë utejë̱'ë,
Ëjaë dai macaja̱'a,
tsio ta̱quë je̱'quë oco tëcahuë̱are utequë pa'iquë a'ë,
ocosi maca ta̱se'epi mëani quë̱cona tëasi'i caquë.
8 Ja̱je cui'ne mësaruje̱ quëcojë o̱cue pa'i macarepa pa'ijë̱'ë,
mai Ëjaë daiye ti̱'a tëji do'ire.
9 Maija'quë do'ijë mësaruja̱'a sa̱'ñe ja̱ë do'ire ai yo'oyë cajë pë̱ti coca cama'pë pa'ijë̱'ë,
Maija'quëre nejo cua̱ñoñe pa̱ñu'u cani.
Tsoe caca sa'rore pa'iji Diusu pa̱i yo'ose'e ñani ca tëji ëjaërepa.
10 Ja̱je pa'ina,
Maija'quë do'ijë ye'yejë̱'ë,
Maija'quë yëye quëacai do'ire tsoe acohua'i ai yo'ojë quëcose'ere.
11 Ai yo'onije quëcosicohua'ire mai cato cayë:
ai sihuacohua'i pa'iyë,
ja̱ohua'i cato.
Mësarupi Job ai yo'oquë quëcose'e cui'ne tëji hue̱'ñana Maija'quë i̱te co̱caise'e asacohua'i a'ë.
Ja̱je pa'ina,
Maija'quë cato,
teaye ñani oi co̱caiyepi i̱ni pa'iye sëte co̱caija̱'quë api.
12 Maija'quë do'ijë,
mësaru cayepi do'i quë'ye pa'ija̱quë cajë Maija'quëna se ca co'ija̱ijë care payë cama'pë pa'ijë̱'ë.
Ja̱je pa'ina,
nuñerepa cajë̱'ë,
yecohua'i asajëna.
“Ja̱je pa'iji” casicohua'i pani,
ja̱re “ja̱je pa'iji” case'e pa'ija̱quë,
cui'ne yecohua'i asajëna,
“pa̱ñë” casicohua'i pani,
ja̱re “pa̱ñë” case'e pa'ija̱quë.
Ja̱je yo'onita'a mësaru nejo cua̱ñoñe pa̱ja'cohua'i a'ë.
Jujucaija̱'quë Api, Asajë Se̱ñe
13 Mësaru aquëpi ai yo'oquë pani Maija'quëre se̱ja'quë,
mësaru aquëpi sihuaquë pani Maija'quëre sihuaquë jë̱jëja'quë.
14 Mësaru aquëpi ju̱'iquë pani sehuosicohua'i ëjaohua'ini soija̱'quë,
mai Ëjaë mamipi cajë se̱cacaija̱'cohua'ire,
hui'yapepi dojë.
15 Maija'quëpi ju̱'iquëre jujuja̱'quë api.
Ta̱'ñe cuasajë se̱to ju̱'iquëpi co'yaja̱'quë api.
Co'aye yo'osiquë pa'itoje̱ i̱ co'aye yo'ose'ere sa̱i de'huacaise'e pasipi.
16 Ja̱je pa'ina,
tayo yo'ose'ere pa̱i ñape yecohua'ina se quëajë,
pa̱i ñape yecohua'ire se̱cacaijë̱'ë,
Maija'quëre si'aohua'i juju cua̱ñosicohua'i pañu'u cajë.
Ja̱je pa'ina,
nuñe pa'iquëpi Maija'quëre se̱ñe cato ai tutu pa'iji,
yecohua'ire co̱caiye.
17 Ja̱je pa'ina,
tsoe aquë Maija'quëre quëacaiquë Elías maije pa'ipi ocoma'o pa'ija̱co caquë Maija'quëre se̱quëna,
toaso̱ o̱metëca cui'ne jopo ocoye pa̱o,
iye yeja.
18 Pa̱cona,
cui'naëpi Maija'quëre ocoja̱co caquë se̱quëna,
oco ocona cui'naopi,
yeja de'oye mëaco de'o.
19-20 Maija'quë do'ijë,
mësaru aquëpi nuñerepa yo'o ma'are hua saquëna,
yequëpi,
de'o ma'ana cui'naëni ne co'ya co̱quë pani ju̱tira'siquëni huasoji,
cui'ne jaiye i̱ co'aye yo'oroja̱ise'ere sa̱i de'hua cua̱ñoji.