Ti Co'aquë
2
1-2 Mai Ëjaë dai ja̱'ñere cui'ne mai i̱ ja̱'re tsioja̱i ja̱'ñere asacohua'ipi,
Ëjaë dai mu'se tsoe ti̱'api,
yëquë toyase'e a'ë cajëna,
asani so'o dai cocare asani pa̱nita'a ja̱je Maija'quë i̱ñopi cayena asani ai cuasa huesëma'pë pa'ijë̱'ë,
cajë mësarute Maija'quë do'ijëre ja̱je cuasama'pë cayë.
3 Coso cua̱ñoma'pë pa'ijë̱'ë.
Ja̱ yë'ta'a Ëjaë dai mu'se ti̱'ama'në du'ru macarepa cato Maija'quëre ai sa̱ñope yo'oyepi pa'ija̱'coa.
Pa'ina,
ne huesë hue̱'ña mamaquëre papi co'aquëre papi etaja̱'quë api,
iye yejana.
4 Ja̱ëpi ai jerepa pa'i a'ë caquë sa̱ñope yo'oja̱'quë api,
si'aye Diusu mami hue'eyere pa̱nita'a pa̱i se̱ñere.
Ja̱je yo'oquë Maija'quëre se̱ huë'ena cacani ja'runi yë'ë a'ë,
Diusu caquë yo'oja̱'quë api.
5 Yë'ë iye ayere tsoe mësarute quëahuë,
mësaru ja̱'re pa'i maca,
cuasajë̱'ë.
6 Yure mësarupi tsoe asayë,
co'aquërepa eta mu'se ja̱ ti̱'ama'ëna,
i̱ etaye ë̱sequëre.
7 Ja̱je pa'iquëta'are tsoe yo'o huëose'epi pa'iji,
co'ayerepa yo'o ja̱'ñe,
yahuese'e pa'iye,
coa i̱te ë̱sequë Maija'quë joyo iye yejapi eta saiyese'e carapi.
Ja̱ maca tsoe co'aquëre papi pa'ija̱'quë api.
8 Pa'ina,
Ëjaë Jesucristopi dai i̱ yë'opo tutupi sëco hue̱aquë,
i̱ dai miañepi i̱te peo hue̱'ñarepa nejoja'quë api.
9 Iquë co'aquërepa cato Satanás co̱caiyepi yo'oquëpi daija̱'quë api,
si'a huati tutu paquëpi,
cui'ne pa̱i yo'o ti̱'a ma'ñe co'a tutupi yo'o i̱ñoquëpi.
10 Ja̱ tutupi yo'oquë nejo hue̱'ña saicohua'ire cosoja̱'quë api,
nuñerepa cocare asani huaso cua̱ñoni pa'iye coesicohua'ire.
11 Ja̱je pa'ina,
Maija'quë ë̱sema'ë coa ñaji,
ja̱ohua'ire,
nuñerepa cocare sehuoye coesicohua'ipi tayose'ere i̱tire pa'ë cajë cosoyere sehuoja̱jë caquë.
12 Sehuoni co'ayese'e sihuacohua'ipi si'aohua'i nejosicohua'i pa'ija̱jë caquë.
Sahuasicohua'i Pa'iye
13 Maija'quë do'ijë,
Ëjaë oicohua'irepa,
Diusupi mësarute sahuani soipi,
mësarupi nuñerepa coca asa do'ipi,
cui'ne Maija'quë joyopi,
de'ocohua'ire necai do'ipi du'ru huasosicohua'i pa'iye ti̱'ajajë caquë.
Ja̱je pa'ina,
yëquë mësaru do'ire,
si'anë Maija'quëre de'oji cajë pëpaye pa'iji.
14 Ja̱je pa'ina,
iyere caquë mësarute yëquë i̱ huaso coca quëayeja̱'a soipi,
mai Ëjaë Jesucristo de'oyerepa paja̱jë caquë.
15 Ja̱je pa'iye sëte Maija'quë do'ijë,
yëquë mësaruna ñajë ye'yase'ere,
cui'ne yëquë toya saose'ere hua̱nëyema'pë o̱cue pa'i macarepa tuijë̱'ë.
16 Mësarute Diusu,
Maija'quëpi cui'ne mai Ëjaë Jesucristopi maire oi de'oye necaiquëpi,
maire ti ca yë'huaye i̱sisiquëpi,
cui'ne de'oyere pare utejë pa'iye i̱sisiquëpi,
17 ja̱ëpi mësaru joñoana jerepa yëjë neñe i̱siquë,
mësarute o̱cue pa'i macarepa ñacai paquëna,
mësaru cayepi,
cui'ne mësaru neñepi de'oyerepa pa'ija̱quë.