Pa̱ini De'oye Yo'ojë̱'ë, Më'ëja'a Co'ye Oima'ë
15
Maipi tutu quë'iohua'ipi Maija'quëre necaiquëre pare cuasacohua'ita'a jopo carasicohua'ipi de'oye yo'oma'cohua'ire quëcojë co̱caiye pa'iji,
tutu peocohua'ire.
Maise'e de'oye pa'iyere cuasaye pa̱ñu'u,
Ja̱je pa'ina,
maipi co̱caiye pa'iji,
ja̱ohua'ire.
2 Ja̱je pa'ina,
pa̱i ñape mai cajeohua'ire de'oye yo'oye pa'iji,
i̱ de'oye pa'i ja̱'ñere cajë.
Cui'ne i̱ Maija'quëre ai se̱ña maca jaiye cuasaquë mëi ja̱'ñere co̱caiye pa'iji.
3 Ñajë'ë,
Cristo i̱ de'oye pa'iyere cuasama'ë paji'i.
Coa ai jerepa toyase'e cayere yo'o ti̱'api,
ñeje cayere:
“Më'ëre pë̱icohua'i pë̱iñe yë'ëna to̱mepi.”
4 Si'aye iye ja̱'në tsoe toyajë pa'ise'e toyase'e a'ë,
mai ye'ye ja̱'ñere cuasajë.
I̱tina ñajë ai yo'oye pa'itoje̱ quëcoja̱jë cui'ne huaso cua̱ñoñe uteye paja̱jë cajë toyase'e a'ë.
5 Ja̱je pa'ina,
Maija'quëpi yo'o juja ma'ñe cui'ne yëhuo huasoye i̱siquëpi,
co̱caija̱quë mësarute yecohua'i ja̱'re co̱ni de'oye yo'ojë pa'i ja̱'ñe Cristo Jesús pa'ise'eje̱ pa'ija̱'cohua'ire.
6 Ja̱je pa'ijë si'aohua'i te'e Maija'quë Diusure de'oquëre pa'ni cajë sihuaja̱'cohua'ire,
mai Ëjaë Jesucristo pëca ja'quëre.
Judío Peocohua'ire Quëaye
7 Ja̱je pa'iye sëte pa̱i ñape yecohua'ire de'oye tsiojë̱'ë,
Cristo mësarute de'oye tsiose'eje̱ pa'ye,
si'aohua'i Maija'quëre de'oquëre pa'ni caja̱jë caquë.
8 Ja̱je pa'ina,
cayë.
Cristo cato judío pa̱ire necasi'i caquë daji'i,
mai aiohua'ire ca nëoquë pa'ise'ere yo'o ti̱'asi'i caquë.
Ja̱je yo'oquë Maija'quë i̱ ca nëose'ere nuñerepa yo'o ti̱'aquë pa'iyere i̱ñosi'i caquë.
9 Daji'i,
cui'ne judío pa̱i peocohua'ireje̱,
Maija'quëre de'oquëre pa'ni cajë sihuaja̱jë caquë,
teaye ñani oni yejesi do'ire.
Toyase'e cayeje̱:
Ja̱je pa'ina,
më'ëre de'oquëre pa'ni casi'i si'a yeja pa̱i pa'i hue̱'ñana.
Cui'ne më'ë mamire sihuaquë jë̱jësi'i.
10 Cui'ne yequë hue̱'ña toyase'epi caji:
Sihuajë̱'ë,
pa̱i daripë̱a,
Maija'quë tse̱cohua'i ja̱'re co̱ni.
11 Cui'ne yequë hue̱'ña toyase'epi caji:
De'oquëre pa'ni sihuajë cajë̱'ë,
Ëjaëre.
Pa̱i yejaña cui'ne si'a pa̱i daripë̱a maña,
judío pa̱i peocohua'ipi.
12 Cui'ne Isaíasje̱ toyapi:
Isaí tsëcapë aquëpi Ëjaë pa'ija̱'quë api.
Pa'i ja̱ëpi si'aohua'i judío pa̱i peocohua'ire cua̱ñeja'quë api.
Cua̱ñequëna,
ja̱ëpi necaija̱'quë api cajë uteja̱'cohua'i a'ë.
13 Maija'quëre se̱ñë,
mai utejë pa'iye i̱siquëre,
sihuaye cui'ne ti se co'a ju̱'iñe peoyerepa pa'iye i̱sija̱'quë caquë,
mësarute i̱te necaiquëre pare cuasacohua'ire.
Ja̱re i̱siquëna,
pa'ijë Maija'quë joyo tutu quë'iohua'ipi Maija'quë ca nëose'ere de'oyerepa utejë pa'ija̱'cohua'ire caquë se̱cacaiyë.
14 Maija'quë do'ijë,
yë'ë tsoe asayë,
mësaru de'oye yecohua'ire cuasayena ti̱mësicohua'ipi pa'iye,
cui'ne si'aye ta̱'ñe asacohua'ipi pa'iye,
cui'ne de'oye cuasajë yecohua'ire yëhuocohua'ipi pa'iye.
15-16 Ja̱je pa'iquëta'are ca'rama'quëpi nuñerepa quëasi'i caquë iyere toya saoyë,
mësarute tsoe asa maña co̱ni,
mësarupi hua̱nëyema'pë pa'ija̱jë caquë.
Yë'ë cato judío peocohua'ire caquë Jesucristore necaiquëpi yo'oyë,
Maija'quë oi do'ipi yë'ëre cua̱ñese'eje̱ pa'ye.
Ja̱je pa'i do'ire iyere caquë toyayë,
mësarute.
Yë'ë Maija'quëre necai yo'oye cato iye a'ë.
Judío pa̱i peocohua'ire huaso cocare quëaye a'ë.
Ja̱je yo'oyë,
ja̱ohua'i Maija'quë joyo yo'o do'ire Maija'quë tse̱cohua'i pa'ija̱jë caquë.
Ja̱je pa'ina,
ja̱ohua'i de'ocohua'ire pani i̱na i̱sisi'i,
Maija'quë tse̱cohua'i pa'ija̱jë cajë,
cui'ne Maija'quë sihuaja̱'quë cajë.
17 Maija'quë co'amaña necai yo'osi do'ire de'oyerepa yo'ohuë caye pa'iji,
yë'ëpi,
Jesucristore sehuosiquë sëte.
18 Ja̱je pa'ita'are coa yequere caye coeyë.
Coa Cristopi yë'ë ja̱'re tsioni nese'ere caye yëyë,
judío pa̱i peocohua'ipi Maija'quëre asani de'oye sehuocaise'ere.
Iye cato yo'ohuë,
coa quëayepi cui'ne ne i̱ñoñepi co̱ni.
19 Pa̱i yo'oma'a tutupi yo'o i̱ñoquë cui'ne Maija'quë joyo tutupi yo'oquë i̱ñoquë quëahuë.
Ja̱je yo'oquë huaso coca quëacaiye de'oye quëa ti̱'ahuë,
Jerusalén huëosiquëpi cui'ne si'a hue̱'ña Ilirico yeja quë'rore paja̱'ana.
20 Ja̱je yo'oquë quëahuë,
huaso coca Cristo mami ti asama'cohua'i quë'rona,
yecohua'i tsoe quëasicohua'ini cui'na ë̱mëje'ena meñe quëa co̱ñere coequë.
21 Coa ai jerepa de'oye yo'ohuë,
toyase'e cayeje̱ pa'ye:
Ñaja'cohua'i a'ë,
i̱ pa'iye aye ti asama'pë pa'isicohua'ipi.
Cui'ne asa ti̱'aja'cohua'i a'ë,
i̱ caye ti asama'pë pa'isicohua'ipi.
Pablopi Roma Quë'rona Saiyere Cuasapi
22 Ja̱je iyere yo'oquë pa'i do'ire ja̱ro do'i sani ñama'ë paë'ë,
si'anë sani ñañe yëquëta'a.
23 Yure yë'ë i̱ño yo'oye ne saosiquë sëte,
yë'ë Españana sai maca de'hue mësarute do'i ñasi'i,
ai tsoe mësarute ña ëa ju̱'isiquëpi.
24 Mësarute ña huajësi jeteyo'je mësarupi yë'ëreje̱ jëjo saocaiye pa'iji,
España quë'rona.
25 Ja̱je pa'iquëta'are yure cato Jerusalénna saiyë,
sehuosicohua'i ja̱ro pa'icohua'ire co̱cai ja̱'ñere saquë.
26 Jerusalén sehuosicohua'i curiquë peocohua'ire i̱si ja̱'ñere,
Macedonia cui'ne Acaya pa'icohua'ipi i̱ohua'i cuasayepi curiquë tsi'soñu'u cuasahuë,
jëjo sao ja̱'ñere.
27 Ja̱ohua'ipi sihuajë curi tsi'soni jëjo saohuë,
Jerusalénna,
judío pa̱i sehuosicohua'ire,
judío pa̱ipi Maija'quë coca quëa do'ire judío peocohua'ipi Maija'quë joyo pa'iyere ti̱'ahuë,
huaso cocare.
Ti̱'asicohua'ipi iye yeja ayere curiquëpi judío pa̱i sehuosicohua'ire co̱caiye pa'iji.
¿Me pa̱ñe'ni?
28 Ja̱je pa'ina,
si'aye iye yo'o tëjini cui'ne curiquë sehuosicohua'i tsi'sose'e Jerusalén pa̱ina i̱sisi maca sai huëoja̱'quë a'ë,
Españana.
Ja̱rona sai mësarute do'i ñaquë sasi'i.
29 Iyere cuasayë.
Yë'ë mësaru quë'ro saisi maca ti̱'aja'quë a'ë,
Cristo coca quëaye ti̱mësiquëpi mësarute quëa huaso ja̱'ñere saquë.
30 Maija'quë do'ijë,
mai Ëjaë Jesucristo do'ipi cui'ne Maija'quë de'o joyo mësarute oi do'ipi mësarute se̱ñë,
yë'ëre co̱caijë̱'ë,
mësaru Maija'quëre se̱cacaiyepi.
31 Maija'quëre se̱cacaijë̱'ë,
Judea pa'icohua'i sehuoma'cohua'ipi yë'ëre co'aye yo'oye pa̱ja'cohua'ire cui'ne yë'ë sacaise'e de'oye sihuajë i̱se'e pa'ija̱'core Jerusalén sehuosicohua'i pa'icohua'ipi.
32 Ja̱je se̱cacaijëna,
Maija'quëpi yëna,
mësaru quë'rona sihuaquë saija̱'quë a'ë,
mësaru ja̱'re co̱ni pëa huajësi'quë pa'ija̱'quë caquë.
33 Maija'quë de'oye pa'iye i̱siquëpi si'aohua'ire mësarure pa'ija̱quë.
Ja̱je pa'ija̱quë.