13
Si'aohua'i iye yeja cua̱ñe ëjaohua'ire de'oye sehuocaiye pa'iji.
Ja̱je pa'ina,
peoji,
coa Maija'quë yëma'ëna ëjaë de'osiquë.
Ja̱je pa'ina,
Maija'quëpi iye yeja cua̱ñeja'cohua'ire nepi,
ja̱ohua'ire.
2 Ja̱je pa'ina,
pa̱i ëjaohua'i cua̱ñeñere sa̱ñope yo'oni Maija'quë de'oye yo'o ja̱'ñe caquë je̱ose'ere sa̱ñope yo'oyë.
Ja̱je sa̱ñope yo'ocohua'i cato sa̱ija'cohua'i a'ë,
co'ayepi.
3 Ja̱je pa'ina,
ëjaohua'i cato pa'ima'pë pa'iyë,
de'oye pa'icohua'ipi ca'raja̱jë cajë.
Coa ai jerepa co'aye yo'ocohua'ire yo'o quëcoja̱'cohua'ipi pa'iyë.
Më'ëpi ëjaohua'ire ca'raye peoye pasi'i cani de'oye yo'oquë pa'ijë̱'ë.
Ja̱je pa'ina,
ëjaohua'ipi më'ë pa'iye neñani de'oye pa'iquë api caja̱'cohua'i a'ë.
4 Ja̱ohua'i cato Maija'quëni necaijë pa'iyë,
më'ë de'oye pa'iyere cajë.
Ja̱je pa'iquëta'are më'ëpi co'aye yo'oquë pani ca'rajë̱'ë.
Ja̱ohua'i cato coa hua'ti mëama'cohua'i a'ë ja̱re co'aye yo'oquëni sa̱iñu'u cajë yo'ocohua'i a'ë,
Maija'quëre necaicohua'i sëte.
5 Ja̱je pa'iye sëte de'oye a'ë,
ëjaohua'i cua̱ñeñe sehuoye.
Pa̱ni i̱ohua'ipi co'aye yo'oma'cohua'ini cajë,
coa ai jerepa tayose'e peoye nëina,
mai cuasajë pa'iyere cajë de'oye pa'iye pa'iji.
6 Ja̱je pa'ina,
mësaru pa'i do'i sa̱iñë,
ëjaohua'i Maija'quëre necaicohua'ini cajë.
Ja̱ohua'i cato ja̱se'e yo'ocohua'i a'ë.
7 Pa'i do'ire pa̱i ñape sa̱iñe pa'ito sa̱ijë'ë,
pa̱i ñapere i̱ohua'ire do'i paye ja'ye.
Yeja pa'i do'ire sa̱iñe pa'ito sa̱ijë'ë.
Ëjaohua'i pa'ito ëjaohua'ire ñajë pa'ijë̱'ë.
Coa si'aye do'i quë'iohua'i pa'ito do'i quë'iohua'ire ñajë de'oyerepa i̱ohua'ire cuasajë pa'ijë̱'ë.
8 Debe pama'pë pa'ijë̱'ë,
yecohua'ire.
Coa ai jerepa yecohua'ire oiyere debeje̱ pa'ye pajë̱'ë,
yecohua'ire.
Ja̱je pa'ina,
coa pa̱ini oiquë pani tsoe cua̱ñese'e cayere yo'o ti̱'api,
si'aye.
9 Cua̱ñese'epi caji:
Ë̲jëre cui'ne nëjore pacohua'ipi yecohua'ini yo'oma'pë pa'ijë̱'ë.
Huani je̱oma'ë pa'ijë̱'ë.
Yahuerepa co'amaña i̱ma'ë pa'ijë̱'ë.
Ëa ñama'ë pa'ijë̱'ë.
Si'aye iye cui'ne yeque cua̱ñese'ere co̱ni yo'o ti̱'añu'u cani coa më'ë cajeire oijë̱'ë,
më'ëja'a co'ye cuasayeje̱ pa'ye.
Ja̱ caye ayere yo'oni pa'ito si'aye yo'o ti̱'añe pa'iji,
cua̱ñese'e cayere.
10 Ja̱je pa'ina,
pa̱ire oiquëpi co'aye yo'oye pa̱ji.
Ja̱je pa'ina,
oiyepi si'aye cua̱ñese'e ne ti̱'añe pa'iji,
tayoye peoyerepa.
11 Si'aye yure mai pa'i tëcahuë pa'iyere ñani cuasajë̱'ë,
tsoe sëta maca'ë huëo ca̱icohua'i.
Yureta'a maire huasoye ai ja'yere pa'iji.
Ja̱'në so'o macare paji'i,
mai i̱tire pa'ë cuasajë i̱ coca asa maca.
12 Tsoe jai ñamire pa'ë.
Yure je̱'nërepa ñata to̱me huëoji.
Ja̱je pa'ina,
je̱oñu'u,
nea hue̱'ñana co'amaña yo'oye.
Je̱oni su̱ñañu'u,
mia ca̱'core pana,
soldado huajo saquë su̱ñañeje pa'ye.
13 Nuñe de'oye ñare pajë yo'oñu'u,
mu'sere yo'oyeje̱ pa'ye.
Cu'ima'pë pañu'u,
co̱nore cueperoja̱ijë,
jaiye a̱o a̱ijë.
Tsi'sini jo̱sa pi̱siye yo'ojë cayere yo'oma'pë pañu'u.
Nuñerepa yo'oye pa'ina,
coa co'aye si'sire yo'oroja̱ima'pë pañu'u.
Coa si'aye co'ayere ye'yesicohua'ipi pa'ima'pë pañu'u.
Te'e cuasama'pë do'ire uihuayere pa'ima'pë pañu'u.
Cui'ne yecohua'i payere ëa ñajë oima'pë pañu'u.
14 Coa ai jerepa mësaru cato su̱ñajë'ë,
Ëjaërepa Jesucristona,
i̱je pa'i pa'ija̱jë cajë.
Ja̱je yo'oni ca̱pë co'aye yëyere ne huasocaiye pa̱ja'cohua'i.