Maija'quë Sahuaye Israel Pa̱ire
11
Yure cui'ne se̱ñë,
ja̱je pa'ina:
¿Ja̱je pa'ito Maija'quë Israel pa̱ire i̱ pasicohua'ire je̱ocou?
Pa̱ni nejoñe pa̱pi.
Ja̱re yë'ë i̱ Israel pa̱ipi pa'iyë,
Abraham tsëcapë aquëpi cui'ne Benjamín pa̱i aquëpi.
2 Ai tsoe ja̱re i̱ Maija'quëpi Israel pa̱ire i̱ tse̱cohua'i a'ë ca huesopi.
Ja̱je pa'ina,
yure je̱ocoma'ë pa'iji.
¿Huesëye mësaru Maija'quëre quëacaiquë Elíaspi Maija'quëre se̱i,
Israel pa̱ire co'acohua'i a'ë cuasaquë se̱i case'ere toyase'e quëaji?
3 Se̱i capi:
“Ëjaë më'ëre quëacaicohua'ire si'aohua'ire huani je̱ahuë.
Cui'ne më'ëre i̱sijë tëojë se̱ hue̱'ñaje nejo saohuë.
Ja̱je yo'ojëna,
yë'ëse'e te'i maca nëasiquëni cui'ne yë'ëreje̱ huani je̱oñu'u cayë.”
4 Ja̱je caquëna,
Diusupi capi,
i̱te:
“Siete mil pa̱ire yë'ëre oicohua'ire hua nëohuë,
de'huasi diusu Baalre do're ja'rujë se̱ma'cohua'ire.”
5 Ja̱je ja̱'në yo'ose'eje̱ pa'ye yureje̱ judío pa̱i acohua'i a'ri ja'i pa̱i nëahuë,
Maija'quë i̱ oiyepi sahuasicohua'i.
6 Ja̱je pa'ina,
Maija'quë maire coa i̱siyepi ti̱'añe pa'iye sëte,
pa̱i tutu yo'oyepi ti̱'añe peoji.
Yure pa̱i yo'o tutupi ti̱'añe pa'ito Maija'quë oi maire coa i̱siye peora'pi.
7 ¿Ja̱je pa'ito me yo'ore'ni?
Israel pa̱i mañapi i̱ohua'i co'ese'e ti̱'añe pa̱huë.
Pa̱jëna,
Maija'quë sahuasicohua'ise'e ti̱'ahuë.
Yecohua'ipi jëa joyo ne hueso cua̱ñohuë.
8 Toyase'e cayeje̱ pa'ye ñeje:
“Diusupi i̱sipi cuasa ti̱'a ma'a joyore cui'ne ñaco ca̱je ña ma'ñere cui'ne ca̱jo yacaje̱ asa ti̱'a ma'ñere.
Ja̱je pa'ina,
yure iye mu'seje̱ ja̱je pa'iohua'i pa'iyë.”
9 Cui'ne Davidje̱ capi:
Ja̱re i̱ohua'i si'aye payë,
cuasayepi co'ye i̱ohua'ire ne ta̱oñe,
Cui'ne hua̱tenëa de'osipi,
mësarupi i̱ona ju'ajë si'se cua̱ñosicohua'i pa'ija̱jë caquë.
10 Ñaco ca̱je ñama'cohua'i de'oja̱'cohua'i a'ë.
Cui'ne jete në me huesësicohua'i pa'ija̱'cohua'i a'ë,
jaiye hue'e do'ire.
Judío Pa̱i Peocohua'ipi Huaso Cua̱ñoñe
11 Cui'ne yure se̱ñë:
¿Si'aohua'i judío pa̱i ju'ajë peo hue̱'ñarepa to̱me sare?
¡Pa̱ni.
Ja̱je yo'oye pa̱huë!
Coa ai jerepa,
ja̱ohua'i de'oye sehuoma'pë ne huesë do'ire yecohua'ipi de'hue ti̱'ahuë,
huaso cua̱ñoñe,
Israel pa̱ipi ñani cui'neje pañu'u cajë oija̱jë cajë.
12 Ja̱je pa'ina,
judío pa̱i co'aye yo'ose'epi si'a yeja pa'icohua'i jerepa de'oye pa'iye po̱nëpi,
cui'ne i̱ohua'i yo'ojë co'a de'ose'epi judío pa̱i peocohua'i de'oye pa'iye po̱nëpi.
Ja̱je pa'iye sëte judío pa̱ipi Cristore sehuoni cui'naohua'ipi caca co̱cohua'i pa'ito ai de'oye pa'ija̱'coa,
cuasayë.
13 Ja̱je pa'iquëta'are mësarute judío peocohua'ire caye payë,
yeque maña.
Yë'ëre Maija'quëpi jëjo daopi,
judío pa̱i peocohua'ina.
Ja̱je pa'ina,
yë'ë yo'oye Maija'quë i̱sise'e a'ë asaquë si'a yë'ë tutupi yo'oyë.
14 Ja̱je yo'oquëna,
mësarupi sehuojëna,
ñani yë'ë tsëcapë acohua'ije̱ ñajë cui'ne ëa ñajë oijë huasosicohua'i pa'ija̱jë caquë yëyë.
15 Ja̱je pa'ina,
judío pa̱ipi ña'nosicohua'i pa'ijëna,
iye yeja pa'icohua'i de'hue Maija'quë ja̱'re de'oye pa'iye ti̱'añe pa'iji.
Ja̱je pa'ina,
merepa pa'ija̱'coa'ni cui'naohua'ini Maija'quëpi i̱to,
judío pa̱ipi sehuojë pa'i maca ai sihuaye pasipi.
Ja̱ cato ju̱'ise'eje̱ pa'iohua'ipi pa'iyena huëiye a'ë.
16 Ja̱je pa'ina,
pan së̱pë aye poni du'ru nese'ere Maija'quëna i̱sito si'a i̱ti së̱pëje̱ Maija'quë i̱sise'e pa'iji,
de'ocore pare.
Cui'ne Olivo so̱quë yë tsitamopi Maija'quëna i̱sisico pa'ito i̱ti capë̱aje i̱sise'e pa'iji.
17 Yecohua'i judío pa̱i acohua'i Olivo so̱quë yë capë̱a pa'isicohua'ipi të'ca tëte cua̱ñohuë,
noni i̱o ja̱'re pa'icohua'ipi.
Ja̱ohua'i peo sa'ro pa'i do'ire mësarupi airo olivo so̱quë capëje̱ pa'ipi sëo cua̱ñohuë.
Ja̱je yo'ouna,
mësaru de'hue ti̱'ahuë,
i̱ti tsitapi pa'iye i̱siye cui'ne olivo pa'iyepi mësarute pa'iye i̱siye.
18 Ja̱je pa'ina,
cuasama'pë pa'ijë̱'ë,
yë'ë a'ë i̱ti ñërepa capë̱a jerepa de'oquë.
Ja̱je pa'ina,
më'ëpi de'oquë a'ë cuasani,
de'hua cuasa ñajaijë'ë.
Më'ëpi tsita pa'iye i̱sima'ë pa'iyë caquë coa tsitamoapi më'ë pa'iye i̱siji.
19 Ja̱je pa'iquëta'a yeque më'ëpi ca'ñe pa'i a'ë:
“Ja̱je pa'ijë̱'ë,
yë'ëpi olivona sëa cua̱ñosiquë pa'ija̱quë caquë të'ca tëtepi ja̱ohua'ire i̱ti capë acohua'ire pare.”
20 Ja̱ cayere nuñerepa caye a'ë.
I̱ohua'i i̱te coa necaiquëre pare cuasama' do'ire të'ca tëte cua̱ñohuë.
Ja̱je pa'iquëta'are më'ë cato i̱te coa necaiquëre cuasa do'ire de'hue i̱ti ñëre pana tsiosiquë pa'iyë.
Më'ë ja̱je pa'iye sëte yë'ë a'ë jerepa pa'i cuasama'ë,
coa airepa ca'raquë ñaquë pa'ijë̱'ë,
mësarute të'ca tëte cua̱ñoñe.
21 Maija'quë i̱ti ñërepa pa'isi capë̱are të'ca tëte je̱osiquëme,
me pa̱quë'ni,
mësaruje̱.
22 Ñajë'ë.
Maija'quë nuñerepa de'oye yo'oquë api.
Ja̱je pa'ita'a nuñe yo'oma'cohua'i cato tuturepa yo'oquë api.
Co'aye yo'osicohua'ire sa̱ipi,
i̱ohua'i yo'osi do'ire.
Ja̱je pa'iquëta'are mësarure de'oye yo'opi.
Ja̱je pa'ina,
më'ëpi de'oye i̱ yëyeje̱ pa'iye pa'iji.
Ja̱je pa'iye pa̱to më'ëreje̱ cui'ne tëto tëaja̱'quë api.
23 Cui'ne yequeje̱,
judío pa̱ipi i̱ohua'i jëa coeyere je̱oni sehuocohua'i pani,
cui'na olivo so̱quë yëna sëo co̱ cua̱ñoñë,
ti̱jupë.
Maija'quëpi paji,
tutu cui'naohua'ini sëo co̱ñe cui'na ñëna.
24 Më'ëre judío peoquëta'are airo olivo so̱quë capëje̱ pa'ini ti̱'ani de'o olivo so̱quë yëna de sëosiquë i̱ ¿me neni de'o olivo so̱quë yë acohua'ire judío pa̱ire sëoye pa̱quë'ni?
Sëoja̱'quë api,
de'o olivo so̱quë yëna cui'naohua'ini.
Israel Pa̱ire Tëjiyerepa Huasose'e
25 Ja̱je pa'ina,
Maija'quë do'ijë,
Maija'quë i̱se'e nesi'i cuasase'ere mësarute quëaye yëyë,
mësarupi jerepa ta̱'ñe asajë pa'iohua'i a'ë cuasama'pë pa'ija̱jë caquë.
Israel pa̱i cato jai pa̱i jëa joñoa ne cua̱ñosicohua'i pa'iyë,
Israel pa̱i peocohua'ipi si'aohua'i Maija'quë ca nëosicohua'ipi cacaja̱jë cajë.
26 Ja̱ maca yureta'a si'aohua'i Israel pa̱ipi huasosicohua'i pa'ija̱'cohua'i a'ë,
toyase'e cayeje̱:
Sión daripëpi daija̱'quë api,
huasoquë.
Dani ja̱ëpi Jacob pa̱i co'aye yo'ose'ere nejocaija̱'quë api.
27 Ja̱je yë'ëpi i̱ohua'i co'aye yo'ose'ere nejocaisi maca,
Ja̱ maca ja̱ohua'ini caquë iye ca nëose'ere pasipi.
28 Ja̱je pa'iquëta'are huaso coca asaye coecohua'ipi Maija'quëre sa̱ñope yo'ocohua'i a'ë,
mësarupi i̱ohua'i coe do'ire de'hue asaja̱jë cajë.
Ja̱je pa'iquëta'are ja̱ohua'i judío pa̱ire Maija'quëpi ja̱ yë'ta'a oiji,
i̱ohua'i aipëni i̱ tse̱cohua'ire nesiquë sëte.
29 Ja̱je pa'ina,
Maija'quë i̱sise'e jioye pa̱quë api cui'ne i̱ soisicohua'ire ti̱ohua'ire nema'quë api.
30 Ja̱'në tsoe mësarupi Maija'quëre sa̱ñope yo'ohuë,
de'oye sehuocaima'pë.
Ja̱je yo'osicohua'ini yure judío pa̱ipi de'oye sehuocaiye pa̱ do'ire Maija'quëpi mësarute teaye ñani oi co̱caji'i.
31 Mësaru ja̱'në de'oye sehuocaiye pa̱se'eje̱ pa'iohua'i a'ë,
yure judío pa̱ipi.
Ja̱je pa'iyë,
Maija'quëpi mësarute teaye ñani oi co̱caija̱quë cajë cui'ne i̱ohua'ireje̱ oi ñani co̱caija̱quë cajë.
32 Ja̱je pa'ina,
Maija'quëpi caji si'aohua'ire i̱te de'oye sehuocaima'cohua'ire ne huesopi,
si'aohua'ire i̱pi oi teaye ñaquë co̱casi'i caquë.
33 ¡Airepa ta̱'ñe pa'i a'ni,
Maija'quë si'aye asaquë pa'iquërepa!
I̱ cuasaye asani quëaquëje̱ peoji.
Maija'quë yo'oquë pa'iye asa ti̱'aquë peoji.
34 “¿Nepi Ëjaë cuasaye asa ti̱'añe pa'iquë'ni?
Pa̱nita'a ¿nepi i̱te ñeje yo'ojë̱'ë cajë ye'yaye pa'iquë'ni?”
35 ¿Nepi du'ru Ëjaëre co'amaña i̱sini yure i̱sisi do'ire sa̱ijë'ë,
cua̱ñeñe pa'iquë'ni?
36 Ja̱je pa'ina,
si'aye Maija'quë tse̱ a'ë,
i̱ nesi do'ire.
I̱ni pacacaiji,
si'anë.
Sihuayë,
Maija'quëre jerepa pa'ire.
Ja̱je pa'ija̱quë.