Huati Quë'ire Gadara Aquëre Quëaye
5
Jaira je të'huina ti̱'areña,
Gadara quë'rona.
Marcos 5.1-20
2 Yohuëpi Jesús ja̱'a tu̱maquëna,
ju̱'isicohua'ire ta̱ hue̱'ñapi te'i ë̱më huati quë'ipi sa̱ñope daquëña.
3 Huati quë'i cato,
ju̱'icohua'ire ta̱ hue̱'ñare pa'iquë paquëña,
quë̱na meapi hue̱ñu'u cajëta'a hue̱ñe peoquëpi.
4 Jë̱ña nëcañoa co̱ni jaiye hue̱toje̱ i̱pi naë tëte je̱aëña.
I̱ jerepa tutu neñe peouña.
5 Ñami,
mu'se ju̱'isicohua'ire ta̱ hue̱'ñare ai cu̱tihuëre pa'i cuiquë quë̱na pë̱api co'ye huai yo'oquë paquëña.
6 So'opi Jesure ñani huë'huëni Jesús nëca macana ti̱'ani Jesús më'ëpi jerepa tutu paquë cani do're ja'ruña.
7-8 Do're ja'runa Jesupi caëña,
huatire:
“Iye ë̱mëre etajë̱'ë.”
Caquëna,
ai tutu caquë se̱quëña:
“Jesús,
Diusu ti ëjaërepa mamaquë ai yo'oyete yë'ëre i̱sima'ë pa'ijë̱'ë.”
9 Se̱ina,
Jesupi ja̱ëte caëña:
“¿I̱que mami a'ni?”
Caquëna,
sehuouña:
“Yë'ë mami cato jai pa̱i a'ë.”
10 Cani Jesure ai se̱quëña:
“Iye huatiohua'ire yequë hue̱'ñana jëjo saoma'ë,
i̱ñore pa'ija̱jë.”
“Se̱se quë'rona jëjo saojë̱'ë.
Yëquëre ja̱ohua'ina cacañu'u.”
13 Careña,
de'oji saijë̱'ë caëna,
etani sani se̱sena cacareña.
Cacarena,
si'a dos mil se̱se huë'huëjë jai hua'que të̱'tëpapi to̱mejë jairana dutu ju̱teña.
14 Ju̱tena,
se̱sere ñacaicohua'ipi ñani huë'huëni pa̱i daripëna si'aye quëareña,
i̱ti yo'ose'e.
Quëarena,
pa̱ipi asani dateña.
15 Jesús pa'i hue̱'ñana ti̱'ani ñajëna,
huati quë'i pa'isiquëpi ca̱ña su̱ñasiquëpi de'o cocare caquë ñuquëña.
Ñu'ina,
i̱te ñani si'aohua'i ca'rareña.
16 Ca'rajëna,
se̱se ñacaicohua'ipi Jesús yo'ose'ere quëareña,
huati quë'ire yo'ose'e cui'ne se̱sere yo'ose'e co̱ni.
17 Ja̱je quëajëna,
asani Jesure saijë̱'ë,
i̱ño pa'ima'ë cajë,
se̱ huëoreña.
18 Carena,
Jesupi yohuëna aya mëni sai huëoquëna,
huati quë'i pa'isiquëpi ai se̱quëña,
Jesure më'ë ja̱'re co̱ni sani pasi'i caquë.
19 Caquëna,
Jesupi pa̱ni sehuouña:
“Më'ë huë'ena saijë̱'ë.
Sani më'ë cajeohua'ire quëajë̱'ë,
më'ë ëjaëpi oi ñani necaise'ere.”
20 Caëna,
saquëña.
Sani si'a jë̱ña daripë̱a quëa huëouña.
I̱re Jesús necaise'ere quëaquëna,
asani ai de'oye yo'ose'e pa'iji,
careña.
Ju̱'icopi Jairo Mamaco Jesús Ca̱'core Patoye
21 Jesupi yohuëja̱'a cui'naëpi yequë te̱'tena je̱'esi maca jai pa̱i tsi'si dateña.
Ja̱je yo'ojëna,
jaira të̱'tëpare pa'ina.
Marcos 5.21-43
22 Ja̱ maca pa̱i tsi'si hue̱'ña cua̱ñequëpi Jesús pa'i hue̱'ñana Jairo hue'equëpi i̱te ñani do're ja'runi,
23 caëña:
“Yë'ë mamacopi ju̱ni huesëco.
Sani më'ë jë̱tëpi pato co'yacaijë̱'ë.”
24 Se̱ina,
Jesupi i̱ ja̱'re co̱ni saquëña.
Saina,
jai pa̱i cui'ne sateña.
Ja̱je pa'ijë i̱te qui'i huesoreña.
25 Ja̱je jai pa̱i pa'i hue̱'ñare te'o nomio doce o̱metëca ju̱'ico pacoña.
Si'anë tsie cajequëna,
ai yo'oco pacoña.
26 I̱ote si'a jujucohua'i yo'o jujajëna,
ai yo'oco pa'ico pacoña.
Si'aye i̱o paye juju do'ina sa̱i saosico pacoña.
Si'aye ja̱ co̱ñe pa̱ëña,
i̱ote.
Coa ai jerepa ai yo'oco pacoña,
co'yaye peoyerepa.
27 Ja̱je pa'iopi Jesús cayere cajëna,
asani dani jeteyo'jeja̱'a i̱ ju'i ca̱na patoña.
28 Coa i̱ ju'i ca̱na patoni co'yasico pa'ija̱'coa'ë,
caco.
29 Pato macarepa tsie cajeye je̱ouña.
Ja̱ maca asaoña,
tsoe i̱o ca̱pë co'yasico pa'iye.
30 Ja̱je yo'osi maca Jesupi asaëña,
i̱ tutupi ju̱'icore jujuse'e.
Ja̱je pa'ina,
co'ye po̱nëni pa̱ire ñani caëña:
“¿Nepi yë'ë ju'i ca̱na patore'ni?”
31 Caquëna,
i̱ ye'yacohua'ipi careña:
“Tsoe më'ëpi pa̱i qui'iyerepa pa'iye ñaquëta'a,
¿nepi patore'ni se̱quë'ni?”
32 Ja̱je catoje̱ Jesús cato si'a hue̱'ña po̱nëquë ñaëña,
nepi patore'ni caquë.
33 Ñaquëna,
ti co'yasicopi asani ca'raco tsasico dani i̱ nëca hue̱'ñana ta̱ni i̱o yo'ose'e nuñerepa quëaoña.
34 Quëacona,
Jesús ja̱ore caëña:
“Huau maca yë'ëre cuasase'epi ne co'yahuë.
Se̱ñaco saijë̱'ë.
Iye ju̱'iñe ti ne co'yahuë,
më'ëre.”
35 Ja̱ caquëna,
yecohua'ipi dateña,
pa̱i tsi'si huë'e cua̱ñequë huë'epi.
Dani Jairore careña:
“Më'ë mamaco tsoe ju̱'isico paco'ë.
Ye'yaquëre jerepa jo̱sa cama'ë pa'ijë̱'ë.”
36 Caquëna,
Jesupi asasiquëta'a asa ma'ñeje pa'ipi tsi'si huë'e cua̱ñequëre caëña:
“Ca'rama'pë pa'ijë̱'ë.
Maija'quëpi necaiquë api cuasajë̱'ë.”
37 Jesupi saina,
Pedro co̱ni Jacobo co̱ni cui'ne Jacobo yo'jei Juan co̱ni sateña.
Yecohua'i co̱ni saiye ë̱seiña.
38 Tsi'si huë'e cua̱ñequë huë'ena ti̱'ani ai yo'oye ñaëña,
pa̱ipi ai cuijë oijëna.
39 Ja̱je oijëna,
huë'e cacani ja̱ohua'ire caëña:
“¿Me neni mësaru ai yo'ojë cajë cui'ne ai oiye'ni?
I̱ mamaco ju̱'ima'o paco'ë.
Coa ca̱ico.”
40 Caquëna,
ja̱ohua'ipi i̱re soreña.
Sojëna,
Jesús si'aohua'ire hue'sena eto saouña.
Coa pëca ja'quëpi cui'ne pëca ja'copi co̱ni ju̱'isico pa'i hue̱'ñana cacareña.
41 Cacani ju̱'isico jë̱tëna tse̱ani i̱ote caëña:
“Talita cumi.”
Mai coca cato “tsihua'o huëijë̱'ë” caye a'ë.