Yawe koro kho uniyó ŋuro mande
42
Yaweko ŋande yete, “Ŋuko neneŋo kho unine. Naru rokóŋo nondo ene wimbu inoyoteno.Neneŋombo naŋge rokóŋanowó, ko naru rokóŋoro nondo eneŋo niŋgu-niŋgu hamó eneno teyoteno.
Nondo yuqane eneno rewe kini taró,
ko enendo murí roneneŋowí mu howero unipare soso nokono yoteŋgo qu wiri yereweya.
2 Maŋgómbo ki parámi kama teyoweya.
Ko enendo khewore ŋuno kaŋero mande kama yeweya.
3 Enendo tamá wimbí moré kini ŋu soso kama riní toqeweya,
ko suru koro wiki piyimi worotutu teyote ŋu kama winzumoweya.
Otete meté mu hamó howero murí roneneŋowí ŋuwore unipare wiri yereweya.
4 Ko ene newonde quhurí kama teweya ko quhurí ŋundo ene kama riní umbuweya tero wimbí tiní
murí roneneŋowí mu nokono tunoqeweya.
Unipare yendé sewemo qu sopoyoyi enendo mahero iŋo-iŋo yunoní hutuŋo mandí ŋu howero murí metémo kunditewaŋgo.”
5 Yawe, Anutu hamó ŋundo koporé toworo rotaró,
ko noko ŋuya o ŋuno woteyote ŋuya toworo rotaró,
ko unipare ŋuro yuqa yunaró,
kumi ŋuno yoteŋgo qu yoto-yoto yunaró,
ŋuko ŋandiro yete,
6 “No Yawe, nondo otete roneneŋowí howero neko kerenowó,
keŋo kandeke towowano.
Neneŋombo sopo kerewe
ko keto naŋge uniparetoro mande kondé tunoqe yunoweya.
Ko ke korewe unipare soso nokono yoteŋgo quro hiyóye tunoqeweya.
7 Ŋunde tero keto toŋeye piyimi mu yori toŋetewaŋgo,
ko kusi-kusi yano yoteŋgo qu yori kinaŋge toŋewaŋgo,
ko huriri yendémo yoteŋgo qu yori meté tewaŋgo.
8 Nondo naŋge Yawe, ŋuko nene owéne.
Uni meyowo nene hiyó kekere ŋu kama inowano
ko owéne parámi ŋu anutu qota-qota kama inowano.
9 Ye qenoyi, komo o tunoqeweya ŋuro yanowó ŋu hamó tunoqaró.
Itaka o keta quro yeteno.
O keta ŋu kama tunoqeyoní
nondo ŋuro yimirowe teteno.”