O soso samboko qu kono-kono qu Yawe owí seré ti.
148
Yawe owí hokoyi!Ye o soso samboko koreko ono yoteŋgo,
ye Yawe owí hokoyi!
2 Ye sambo simó soso eneŋo owí hokoyi!
Ye kuma uni samboko yoroteŋgo, ye owí seré ti!
3 Kosa koya kombo koya, ye ene owí hokoyi!
Ko tutu soso hiyó parámi teyoteŋgo qu, ye ene owí hokoyi!
4 Sambo koreko horé, ene owí hokoyi!
Sono koporé saŋano yorote, ke eneŋo owí seré ti!
5 O soso ŋunde kundo Yawe owí hokoyi,
dokaro eneŋombo yiní o soso ŋu tunoqero yoroteŋgo.
6 Enendo yiní ene naru soso yorowero quno naŋge yoroteŋgo,
ene maŋgó kama wendaqewaŋgo.
7 Ye sono qare pará-pará ko o soso windi quroko kimanimo amuna,
8 Ko koporé sine koporéko tunoqeyote ko sono koko taŋgo
ko koporé kumi ko matú wimbí moré qu enendo Yawe maŋgó howeyoteŋgo, ye eneŋo owí hokoyi.
9 Ye mira purí pará-pará, ko purí tomó ta-ta,
ko ye eŋgé teyoteŋgo qu ko siku te,
10 Ko núqare unindo sopo yereyoteŋgo qu
ko sikuno qu ko soró ko nú, ye Yawe owí hokoyi!
11 Ye wiri yerete uni ko unipare wini soso,
ko wiri yerete uni pará-parámboya tomó-tomómboya,
12 ko uni keta ko pare keta,
ko koŋgomu ko simó ono, ye soso Yawe owé seré ti!
13 Hamó horé, o soso Yawe owí hokoyi.
Eneŋo owí Yawe ŋundo unipare soso ŋuro owéye ŋu hamó taka yerete.
Eneŋo owí ŋuko koreko ona, ŋundo sambo koya noko koya taka yerete.
14 Enendo Israel koro hamó horé iŋoyote ko enendo uni pareyó hamó,
samaka yerero wimbu yunoyote.
Ŋunde ŋuro enendo ene owí hokoyoteŋgo.
Yawe koro owí hokoyi!