Anutuko samaka yereyaró ŋuro hariri tero niŋgu-niŋgu mande taŋgurí.
118
Nore Yawe koya yuŋguna mande yewato. Dokoro enendo murí meté noreya taró.Naru suki-suki noreŋo iŋoyote.
2 Israel nore ŋande yato,
“Enendo noreŋo kondé iŋoyote naru suki-suki.”
3 Anutu koro o qa-qa ŋundo ŋuya ŋande yewaŋgo,
“Enendo noreŋo hamó suki-suki iŋoyote.”
4 Unipare soso Parámimboro soreyoteŋgo ko ene ŋande yeyoteŋgo,
“Enendo noreŋo hamó naru rokóŋo iŋoyote.”
5 No quhuríne parámi ko no Parámimo hariri teteno,
ko ene none haririne ŋu iŋoro ko kuhurí ŋu riní kini teyote.
6 Parámi ŋu noya yote, ko no kama sorewano
Ko uni kato noya o ka kama teweya.
7 Parámi eneŋombo samaka nereyote.
Ŋunde ŋuro no Parámi qenewe enendo saŋgirí yoriní umbuyi ko rambaruru yereweya.
8 Ŋu meté kowe nore Parámi iŋondutuworo,
ko uni kama iŋondutu yerewato.
9 Ŋu meté nore Parámi iŋondutuworo,
ko nore wiri yereteŋgo ko uni kembé kama iŋondutu yereyoteto.
10 Saŋgirí wata no wuriri nereyoteŋgo,
quko Parámi wimbímo nondo yorewe kini tewaŋgo.
11 Ene wuriri nerero mira soso yoteŋgo,
quko Parámi wimbímo yorewe kini tewaŋgo.
12 Ene puni ŋundiro wuriri nereyaŋgo.
Quko ene waka ta kumoyoteŋgo, kewaŋgo suru qa khumote ŋundiro.
Parámi wimbímo yorewe kini teyoteŋgo.
13 Ene noya kuma kondé teyoteŋgo ko no kini tewero teyoteno.
Quko Parámimbo samaka nereyote.
14 Yaweko no noriní kondé horé teyoteno.
Eneŋombo no samaka nereyote.
15 Iŋoyi Anutu koro unipareyó kiweteŋgo eneŋo tuwi yamaruye qurokoŋgo.
Ene ŋande yeteŋgo, “Yawe koro wimbí ŋundo naŋge ŋu taró.”
16 Yawe koro wimbu ŋundo nore samaka nereyote.
Ko nore kuma takatowó.
17 Noko kama khumowano. Kini. No keta yowano,
yotoro no sowo mande Yaweko o taró ŋuro yewano.
18 Yaweko kuhurí parámi te nuna
quko kama norotoní no kama khumano.
19 Anutu koro ya makoyó kosoní ko no quroyómo owano oro ko eneŋo owí hokowano.
20 Ŋano mako ŋako Yawe koro mako qu.
Unipare roneneŋowí qundo naŋge ŋuro quroko owaŋgo.
21 Yawe, ke haririne iŋaró, ŋuro tero no samaka niri no meté yoteno.
Ŋuro tero no oweŋge hokoteno.
22 Ŋa wondo ŋando ya towowero qu piyimi yero se rotaŋgurí,
Quko ŋundoko yaye towowero wondo korete-korete qu ŋundo ya hoŋgoyó riní kondé yoweya.
23 Yawe eneŋombo o ŋu taró,
ko nore qeneteto quko ŋuko meté horé.
24 Yaweko ŋa naru ŋa re nore yunote.
Ŋunde ŋuro itakako nore niŋgu-niŋgu tato.
25 Anutu, nore ke osese keretoka keto nore kowe yore.
Ke nore samaka yereka ko o soso tewato ŋu meté tunoqeweya.
26 Yaweko uni ŋuya o meté tiní Anutu owémo maheweya.
Nore owí seré tero Anutu yayómo yowato.
27 Anutu ŋundo naŋge Yawe hamó.
Enendo nore hamó sopo yereyote.
Kewá kandí ŋu soso kondé towoya
ko khete-khete uya wondo yakutí ŋu huririwoyi.
28 Ke none Yawe ŋuro tero ko no keya niŋgu-niŋgu mande yeteno.
Keqo nene Anutune, ko ke oweŋge seré tewano.
29 Ye Yawe koro niŋgu-niŋgu mande ti. Enendo noreya murí meté teyote.
Enendo noreŋo hamó iŋoyote, ko nore newonde ime suki-suki yunoyote.