Unindoro tendoye ŋuko quhurí ko yambo yero niŋgu-niŋgu Anutuko tewero qu.
22
Anutune, Anutune, dokoro norotote?Dokoro keto kama samaka nerete?
Ke dokoro no tendone kama iŋoyote?
2 Anutu, no kosano ke neko kereyoteno, quko mandene kama iŋoyote.
No suwono neko kereyoteno quko imaqewero mepémo kini.
3 Quko dokoro ke Anutu ke murí meté teyoweya ŋuko soso meté.
Ke sopo-sopo yoroyi, Israel unipareto oweŋge hokowaŋgo.
4 Komo nore usisambananimbo ke wore hamó iŋondutu kereyaŋgo.
Enendo hamó ke wore iŋoyi keto samaka yereyaró ko uni saŋgirí ŋundo kama yori umbuyaŋgo.
5 Eneko keno yambo hariri teyaŋgo ko keto uni saŋgirí kandeye moŋgo yoraró.
Ke wore hamó iŋoyato ko iŋondutuye kama kini teyara
6 Quko no sire tomó ta-ta nokono ku kembé, no o kaka kini.
Uni soso noya saŋgirí tero no huwó nere yoteŋgo.
7 Unipare soso no niyoro yesará nerero yeyoteŋgo.
Enendo no mipi kiyó nerero kembaye ituqeyoteŋgo.
8 Ŋande yeyoteŋgo,
“Ke Anutu iŋondutuwoyote.
Dokoro enendo kama samaka kereyote ko kama sopo kereyote?
Asa Anutuko keŋo iŋoyote quko dokoro kama samaka kereyote?”
9 Anutu, keto ná qahí moŋgo nori no meté tunoqanowó.
Keto no nori ke iŋondutu kereyano
Ko keto sopo nereyoyi no susí neyano.
10 No Anutu keŋo iŋondutu teyowe.
No námembo keta pisi nereró kuno ŋunoŋgo yate itaka none Anutune yote
11 No quhurí itaka nono mahete ŋa,
ŋunde ŋuroko no ma norotowero.
No uni gato no samaka nereweya qu mepémo kini.
12 Saŋgirí parámimbo nohoweteŋgo ŋuko makao urumuni ŋunde kembé.
Yende parámi Basani ŋuro makao wimbí ŋundiro. Wimbuye kondé ŋundiro.
13 Ene no soponere rambaruru nerewero teteŋgo,
laioni ŋunde kembé ki parámi tero ko aŋgero none nekoyoteŋgo.
14 Wimbune soso kini tete. Ŋundiro sono kina windoroŋoyi hamó soso kini tete ŋundiro.
O soso potóne ŋuro wimbí soso kini tete.
No qahune ŋuko hamó muniŋo.
Kiruwone ŋuko sono qembe tete.
15 Puŋene ŋu hare kini tete,
ko mipine ŋu maŋgonemo womote.
Ko no hamó khumowe teteno.
16 Ŋu uni piyimi ŋundo no mira soso ŋuno nohoweyoteŋgo
ŋunde isako siku núqare wuririyoteŋgo ŋundiro.
Enendo no khene ko kandene metoyembo saŋgawoteŋgo.
17 Wimbune soso tunoqete.
Ko ŋu uni ŋundo niyoyoteŋgo, ko ene piyotiní ye ŋuro iŋoro niŋgu-niŋgu teyoteŋgo.
18 Enendo kowe punu-punune ŋu rondaŋero siyaŋgurí,
ko kowe punu-punune ŋu dando reweya ŋu rokóŋowero satu kundo taŋgurí.
19 Parámi, keto noroto kapiyano ma yowero,
keto naru rokóŋoro no soponereyoteno. Ke waka ta maheya no itaka samaka nere.
20 Keto ko no nore ko enendo no kama nuri khumowano.
Samakanere, ŋu uni ŋuko isa kembé kama nuri khumowano. Quko no keta yowano.
21 No enendo kindo nuri kini tewano laioniko núqare sikuno qu neteŋgo.
Eneko makao sikuno yoteŋgo ŋundiro ŋundo soroyó ŋundo saŋganerewero teyoteŋgo. Keto ene kandeye moŋgo pitu nore.
22 Keto ŋunde tiqo no mandeke yero uni topo wore yewano ŋuko keto qho wimbí taró.
Ke seréŋge tewano naruko huruwoyi no keweroyewore yorero oweŋge hokowano.
23 No ŋande yeteno, ye Anutu koro winiyó!
Yawe owí hokoyi, ye Yakop koro winiyó ye uni Parámi owí hokoyi.
Iyo, ye Israel koro unipare ye owí seré ti.
24 Enendo uni onoŋoye moré kini ŋu kama huwó yereyote.
Enendo quhurí ko kowe surumíye ŋuko o ka kini ye kama iŋoyote.
Eneko ene yorotoro kapiyano kama yorote.
Kini, ene haririye ŋu iŋote!!
25 Seréŋge tero huru-huru parámi ŋuno ke kanata naŋge nondo oweŋge hokowano. No mandeke yesowowano ŋuko o soso keto taró ŋuro.
Komo no o qa-qa kunowero mande kondé kusiyanowó. Ŋuko tewano unipare toŋeyemo keŋo soreyote ŋu.
26 Uni onoŋoye moré kini ŋuko o nero qahuye hamó tinditeyoweya.
Ko uni ŋu eneno iyarewaŋgo eneko ene owí hokowaŋgo. Enendo meté teyunoní naru rokóŋoro meté yorowaŋgo.
27 Unipare wini soso nokono ŋundo seré tewaŋgo.
Anutu iŋondutuworo
ko eneno pitu mahewaŋgo.
Unipare wini sosopo koporo ene seré tewaŋgo.
28 Dokoro Yawe ŋuko wiri yerete,
ŋundo unipare wini soso sopo yereyote.
29 Uni onoŋoye moré ŋundo potoruku te inoro owí seré tewaŋgo.
Uni kumoyoteŋgo ŋuko keta kama yowaŋgo,
ene soso potoruku tero Yawe owímo seré tewaŋgo.
30 Unipare tukú tunoqewaŋgo ŋundo ene kho ku tewaŋgo.
Unindo Yawe koro mandí usisiye tukú tunoqewaŋgo ŋuno yesowowaŋgo.
31 Ŋu wini ŋu kama tunoqeyuri,
ŋande yimirowaŋgo,
Yawe, eneŋombo unipareyó kowe yoreyote.