Lazarus kaa puunipimaatisiit
11
1 Chiih taau naapaau Lazarus aa ishinihkaasut, naashch aa chii aahkusit. Anitaah Bethany kaa ishinihkaataayich ihtaawiniyiu chii wiichiu. Uwiichishaaniskwaam Mary kiyaah Martha chii wiichimikuu.
2 Aaaukw uu Mary kaa kutipinimwaat kaa miyumaakuniiyich tipaayihchichaasiu usitiyich kiyaah ushtikwaanipiiwii kaah aapichihtaat aa kaasiihamwaat usitiyiuh. Aaukw uu iskwaau wiichishaan Lazarus kaah aahkusiiyich.
3 Anichii maak wiichisaaniskwaaumaauch chii iitishuwaauch iiyiyiuh chaa chii wiihtimuuwaayich Jesus, aniyaayiu uwichaawaakiniyiu Lazarus Jesus kaa saachihaat aah aahkusiiyich.
4 Iishpih maak Jesus piyaahtihk uyaayiu aakw iyaat, “aat aniyaayiu naashch aah aahkusit nimui kiti uhchi puunipimaatisiiu. Iispiyiu uu chaa chii nuukuniiyich Chishaaminituu uchistaayihtaakusiwin, kiyaah maak aakutaah chaa uhchi chistaayihtaakuhaakiniwiyich Chishaaminituu ukusish.”
5 Jesus chii saachihaau aniyaayiu Martha kiyaah aniyaayiu wiichishaaniskwaamiyiuh kiyaah aniyaayiu wiichishaaniyiu Lazarus.
6 Iishpih maak kaa wiihtimuwaakinuut aah aahkusiiyich Lazarus ayaapich miin niishu chiishikaauh chii iisp taau anitih aniyaayiu kaah taat.
7 Aakw aataat uchischinihamuwaakinh, “iituhtaataau miin naataah Judea aschiihch.”
8 Aakw aatikut aniyaayiuh uchischinihamuwaakinh, “chiskutimaachaasiu, nimui waashkich kaa wii nipihiisch aa paahpimusinaatihuusch anichii Jew iiyiyiuch ayaapich maak miin kaau chiwiih iituhtaan anitaah.”
9 Aakw Jesus aataat, “niishushaapwaau tihtwaa aachinikwaanihtaat chiishikaau paayikwaau aa chiishikaach. Awaan pimuhtaachaa aa chiishikaayich nimui chiki uhchi pihchishin waash waapihtim aniyaayiu waashtaawiniyiu utih aschiihch kaah tikuniiyich.
10 Pimuhtaachaa awaan aa tipiskaayich chiki pihchishin waash nimui tikuniyiu waashtaawiniyiu anitih aah taat.”
11 Jesus aakw aataat, “shaash nipaau chiwiichaawaakiniu Lazarus. Niki nituupaakunaau.”
12 Aakw chischinihamuwaakinich aah iitaach, “Tipaayihchichaayin, naapaakwaa, miin waash chiki miyu pimaatisiiu.”
13 Jesus maak shaash chii chischaayihtim Lazarus aa chii puunipimaatisiiyich, mikw maak uchischinihamuwaakinh nimui uhchi chischaayihtimiyiu uyaayiu, aakw kaa iitaayimaach Jesus nipaau aah iitaayimaayich aniyaayiu Lazarus.
14 Aakw Jesus muushaa aataat, “shaash nimui pimaatisiiu Lazarus.
15 Chiiyiwaau uhchi nimiywaayihtaan aahaakaa uhchi taayaan maakwaach aakaa waahchi miyupiyit Lazarus aakw maak chaa chii taapwaayaayimiyaakw. Maachiitaau nitiwaapimaataau.”
16 Aakw Thomas, paayikw an kaa niishich wiichishaan kaa ishinihkaataakinuut, aataat aniyaayiu wiichichischinihamuwaakin, “misiwaa aakush aa tishiyihkw wiichaawaataau Jesus kiyaah chiiyaaniu chaa chii nipihiikiwiyihkw nipihaakinuuchaa.”
Jesus aaukw winishkaawinuwaat nipiwinihch uhchi
17 Iiishpih maak Jesus taakushihk anitaah chii wiihtimuwaakiniu shaash naau chiishikaauh aa chii ishpish nihiihkaamaakiniwiyich Lazarus.
18 An maak ihtaawin Bethany kaa ishinihkaataach paashuch Jerusalemihch chii tikun, wiyaash niishu aschiiyiu tipihiikin chii ishpishinaakun anitaah uhchi.
19 Mihchaatu maak Jew iiyiyiuch chii paachi nitiwaapimaauch Martha kiyaah Mary aa paachi nituunaanihaawiihkuwaach, wiichishaaniyiu aa chii puunipimaatisiiyich.
20 Iishpih maak Martha piyaayihtihk Jesus aa tikushiniiyich chii wiyiwiiu chaa nituunichihaat, aakw wiiyi Mary aakutaah anitih kaah taat wichiwaahch.
21 Aakw Martha aataat Jesus, “Tipaayihchichaayin, shaash utih chii taauhpinaa nimui chipih uhchi puunipimaatisiiu niichishaan.
22 Mikw maak nichischaayihtaan ayaapich aashkw anuuhch Chishaaminituu chaa tutimaask mikw taan chaa iishi nitutimuwaautaa.”
23 Aakw Jesus aatikut, “miin chiki pimaatisiiu chiichishaan.”
24 Aakw Martha aataat, “nichischaayihtaan taapwaah miin chaa winishkaat maahchich chiishikaayichaa.”
25 Aakw Jesus aatikut, “aaukw niiyi waanishkaanaat awaayiuh aa chii puunipimaatisiiyich kiyaah maayiwaat pimaatisiiwiniyiu. Awaan chaa paachi taapwaayaayimikwaa chiki pimaatisiiu aati aa chii puunipimaatisiit.
26 An awaan kaa pimaatisiit aa paachi taapwaayaayimit nimui nihtaa chiki puunipimaatisiiu. Chii taapwaahtaan aa uu kaa iititaan?”
27 Aakw aataat Martha, “aahaa, Tipaayihchichaasiu, nitaapwaahtaan chiiyi aah aawiyin aniyaayiu Chishaaminituu kaa paachi iitishihwaat, kiyaah chiiyi aah aawiyin Chishaaminituu ukusish, aniyaayiu kaah iyit chaashtinaash chaa tikushiniiyich utih aschiihch.”
Jesus kaa maatuut
28 Iishpih Martha kaah iyit uyaayiu chii nitiwaapimaau wiichishaaniskwaamh Mary aah iitaat, paahkaach aa ayimit, “chischinuhamaasuu shaash utih taau. Chii nituumihkw.”
29 Iishpih piyaahtihk Mary uyaayiu chii pisikushipiihtaau aakw kaa wiyiwiit chaa nituunichihaat Jesus.
30 Mikw maak aashkw nimui uhchi tikushin Jesus anitih aniyaayiu ihtaawiniyiu, anitih kaa nichihiikut Martha aashkw aakutaah kaa paachihtaat Jesus.
31 Anichii maak Jew iiyiyiuch kaa wiitipimaach Mary aa wiih naanihaawiihkuwaach chii nuushipiyistuwaauch iishpih wiyaapimaach naashch aa iyaasichipiyihuyich aah aati wiyiwiiyich waash chii iitaayihtimuch anitaah aniyaayiu kaa nihiihkaamaakiniwiyich wiichishaaniyiu anitaah aah iituhtaayich chaa nituumaatuuyich.
32 Iishpih maak Mary taakushihk anitih Jesus kaah taayich wiyaapimaat maak chii uchihchiihkunipiyihuu anitaah usitiyich, aah iitaat, “Tipaayihchichaayin, shaash chii taauhpinaa nimui chipih uhchi puunipimaatisiiu niichishaan.”
33 Iishpih Jesus wiyaapimaat Mary aa maatuuyich kiyaah aniyaayiu kaa paachi wiichaaukuyich aa maatuuyich naashch chii taahkihukuu aayiuh maak naashch chii misimitaahaau.
34 Aakw iyaat, “taanitaah kaa nihiikiwaakinuut?” “Aashtim tipaayihchichaasiu paachi waapihtii,” chii iitaauch.
35 Chii maatuu Jesus.
36 Aakw anichii iiyiyiuch iyaach, “taapwaah chii saachihaataakupin aniyaayiu Lazarus.”
37 Chiih taauch maak paasch aah iitaach, “chiih tutiwaau aniyaayiu aakaa kaa waapihtimiyich naapaau chaa chii waapihtimiyich. Taanitaah waahchi aakaa uhchii tutiwaat Lazarus aakaa chaa chii puunipimaatisiiyich?”
Jesus kaa waanishkaanaat Lazarus nipiwinihch uhchi
38 Jesus maak miin chii muushihtaau naashch aa kisikutaahaat. Aakw kaa iituhtaat anitaah aniyaayiu kaa waatikwaapiskihiikiniwiyich anitaah kaa nihiihkaamaakiniwiyich Lazarus, chii chipikaapuhiimaakiniwiyitaakupin aa misichistiiyich asinii anitaah aa uhchi piihchaaniwiyich.
39 Aakw Jesus iyaat, “iichaatihtipinaahkw an asinii.” Aakw aatikut Martha, aniyaayiu Lazarus wiichishaaniskwaamh, “Tipaayihchichaayin, shaash chiki miyaakun, waash shaash naau chiishikaauh kaa ishpish puunipimaatisiit.”
40 Aakw Jesus aataat aniyaayiu Martha, “nimui aa shaash kuhchi wiihtimaatin, taapwaahtiminaa chaa waapihtimut Chishaaminituu uchistaayihtaakusiwin.”
41 Aakw kaa iichaahtihaach aniyaayiu asinii. Jesus maak ishpimihch kaa iitaapit chii iyiu, “Nuuhtaa chii ninaaskumitin aa paachi nituhtiwiyin.
42 Nichischaayihtaan muush aa paachi nituhtiwiyin, mikw maak nishin uu chaa chii taapwaahtihch uchii iiyiyiuch chiiyi aa chii paachi iitishuhuyin.”
43 Iishpih maak uyaayiu kaah iyit Jesus chii chishwaawaau aah iyit, “laasaarus, paachi wiyiwiih.”
44 Chii paachi wiyiwiiu an naapaau kaa puunipimaatisiit, utihchii kiyaah usit aa wiishkwaayaapihkaataayich pichiwiyaanaachiniyiu kiyaah utaastimihkw aa chii piskuyaachinikinuwiich. Aakw Jesus aataat, “aapihkunaahkw, chaa pichistinaahkw.”
Jew iiyiyiu kaa niikaanishkiwaach kaah aayimwaahiikuch chaa nipihiimaakiniwiiyich Jesus
Matthew 26:1-5; Mark 14:1, 2; Luke 22:1, 2
45 Mihchaatu maak Jew iiyiyiuch kaa paachi maauutitaach Mary, chii waapihtimuch taan kaa iyihtiyich Jesus kiyaah chii taapwaayaayimaauch.
46 Iyaapich maak pisch chii nitiwaapimaauch aniyaayiuh Phariseeh aa wiihtimuwaach taan kaa iiyihtiyich Jesus.
47 Aakw anichii Phariseech kiyaah kaa niikaanishiich ayimihaauchimaauch chii nishtuunaauch kaa uchimaawiiyich kaa maamuupiyich, aah iitaach, “taan chaa tiyihkw. Naashch mihchaatu maamishkaach iyihtuwiniyiu aah tutihk an naapaau.
48 Nihaayimaahkwaa chaa chiih tik uyaayiu taan aahtik misiwaa awaayiuh chaak chiki taapwaayaayimikuu kiyaah maak anichii rwaam tipaayihchichaasiwich chaa tikusich chaa iyaayuhtaach anitaah aniyaayiu maauch kaa piyaahkiniiyich chichishaaayimihaaukimikunaayiu kiyaah misiwaa chiiyaaniu Jew kaah iitiskaanaasuuhkw chiki nishiwinaachihiikunuuch.”
49 Paayikw maak an ayimihaauchimaau Caiaphas kaa ishinihkaasut maakwaach kaa chishaaayimihaauchimaaut aniyaayiu kaa pipuniiyich chiih iitaau, “taapwaah nimui chichischaayihtaanaawaau chaakwaan.
50 Nimui aa chichii nistuhtaanaawaau austaa chaa miyupiyaakw paayikw naapaau chaa chii pichistinihk upimaatisiiwin iiyiyiu chaa chii pimaachihuyich ishpish wii misiwaa chiiyaaniu aah iitiskaanaasiihkw chaa chii nishiwinaachihiikiwiyihkw.”
51 Nimui wiiyi waachihch Caiaphas kaah iyit aniyaayiu kaah iitaat, waash wiiyi maakwaach aa chii chishaaayimihaauchimaaut aniyaayiu kaa pipuniiyich aaukw uyaayiu waahchi miyikut Chishaaminituu uyaayiu chaa chii iyit aa chischiwaahiichaat, chiih iitaau Jesus chaa pichistinimiich upimaatisiwiniyiu Jew kaah iitiskaanaasiiyich iiyiyiu uhchi.
52 Nimui maak mikw Jew iiyiyiu uhchi chaa pichistinimiyich upimaatisiwiniyiu, misiwaa kiyaah aniyaayiu Chishaaminituuh utiiyiyimiyiuh paahpiitush kaah taayich chaa maamuunaayich, chaa chii paayikutaauusinaaniwich.
53 Aniyaayiu maak kaa chiishikaayich aakutaah kaa uhchi chihchipiyihtaach aa naanitu chischaayihtihch taan chaa tich chaa chii nipihaach Jesus.
54 Aayuwikw maak uyaayiu waahchi aakaa uhchi taat Jesus anitaah aa mihchaatinaaniwiyich anitaah Judea aschiihch. Chii chistuhtaau aakw anitaah ihtaawiniyiu Ephraim kaa ishinihkaataayich paashuch pikutiskimikaahch kaah tikuniiyich aakutaah anitih kaah taat kiyaah uchischinihamuwaakinh aakutaah kaah taayich.
55 Chii paashunaakun maak an Jew miyaashkaachaau mikushaawin. Mihchaatu iiyiyiuch chii paachi iituhtaauch Jerusalemihch ninaahkiu ihtaawinihch aa uhtuhtaach aa paachi tikushihch chaa chiih tutihch taan kaa iishi wiishtaayich ayimihaau wiishuwaawinihch chaa tutimuwaakupinaa chaa chii piyaahchisiiyich.
56 Mihchaatu maak uchii iiyiyiuch chii maausuukuch anitih chishaaayimihaaukimikuhch aa naanituwaapimaach Jesus uyaayiu aa iishi kukwaachimituch, “taan aa iitaayihtimin chiiyi, chiki paachi naachi mikushaau aa chitiiitaayimaau?”
57 Anichii maak kaa niikaanishiich ayimihaauchimaauch kiyaah anichii Phariseech chii iitishuwaahtaawaakupin yaayitaa chaa wiihtimiyich awaayiuh chischaayimaayichaanihii taanitaah aah taayich Jesus chaa chii nituuutinimaakiniwiyich.