Kaa miywaayihtaakusit kaanumaanishchaanishiwaasiu kaah aayimuumaakinuut
10
1 Jesus kaah iitaat, “taapwaah chiwiihtimaatinaawaau, awaan aa chimutischiwit nimui anitaah aa ishkwaahtimiwiyich maanishchaanishiukimikuyiu uhchi piihchaau. Iyihch anitaah uhchi paastaahtiwiyiu aa wiih piihchaat.
2 Aakw an anitaah aa ishkwaahtimiwiyich maanishchaanishiukimikuyiu kaa uhchi piihchaat aayuwikunh uyaayiu ukinumaanishchaanishiwaasimiwaau anichii maanishchaanishich.
3 Aapihamaakuu maak aniyaayiu kaa kinuushkwaahtiwaayich anitih maanishchaanishiukimikuhch. Aniyaayiu maak maanishchaanish nistuhtimiyiu upaahtaakusiwin iishpih tiyaapwaataach utishinihkaasuwiniyihch, waash wiiyi aniyaayiu umaanishchaanishiim. Aakw maak piyaachi wiyiwiiyich aakw aati nuushuushkaakut.
4 Aniyaayiu maak aah aati wiyiwiihtihaat wiiyi niikaanihtaau. Nuushuushkaakuu maak aniyaayiu maanishchaanish waash nistuhtimiyiu upaahtaakusiwin.
5 Kutik awaayiuh nimui chiki uhchi nuushuushkuwaauch anichii maanishchaanishich. Chiki ushimaauch, waash taapaa nistuhtimwaauch maanitaau upaahtaakusiwiniyiu.”
6 Jesus chii wiihtimuwaau uyaayiu chiskutimaachaau tipaachimuwiniyiu mikw maak nimui uhchi nistuhtaakuu aniyaayiu kaa iishi aayimuutimuwaat.
7 Aakw Jesus miin aatikuch, “taapwaah chiwiihtimaatinaawaau, niiyi aaukw ishkwaahtaam anitaah waahchi piihchaach kiyaah anitaah waahchi wiyiwiich anichii maanishchaanishich.
8 Misiwaa kutikich kaa tikushihch aa wiih wiyiwiihtihaach aniyaayiu maanishchaanish aashkw aahaakaa uhchi tikushiniyaan, chimutiskich wiiyiwaau. Mikw maak nimui uhchi nituuhtaakuuwich wiiyiwaau aniyaayiu maanishchaanish.
9 Niiyi aaukw ishkwaahtaam. An awaan niiyi aahtaauch kaa uhchi piihchaat chiki pimaachihuu. Mikw maak waah ishpish paachi piihchaat kiyaah waah ishpish wiyiwiit kiyaah chaa miskihk anitih chaa uhchi miyumiichisuut.
10 Chimutisk tikushin mikw chaa chii kichaamutit kiyaah maak chaa chii nipihiiwaat kiyaah maak chaa chii iiyaayiwihiiwaat. Niiyi maak wii nichiitikushin chaa chii miyiwaayaan an pimaatisiiwin waayuch aahtikuch.”
11 “Niiyi aaukw kinumaanishchaanishiwaasiu kaa miyu kiniwaayimaat umaanishchaanishiim. An awaan kaa miyu kiniwaayimaat umaanishchaanishiim chiki pichistinim upimaatisiiwin aniyaayiu umaanishchaanishiim chaa chii uhchi pimaachihuyich.
12 Aakw an mikw kaa utaaskunaakinuut chaa chii kiniwaayimaat aniyaayiu maanishchaanish aahaakaa maak chihchiwaa kinumaanishchaanishiwaasiwit, aahaakaa tipiyiwaawisiit aniyaayiu maanishchaanish ushimuu wiyaapimaach mihiihkin aa tikushiniiyich. Aakw aniyaayiu mihiihkin kuywaaskuhtutiwaayich aniyaayiu maanishchaanish aakw saachaapihiituyich.
13 Ushimuu, waash mikw chii utaaskunaakiniu. Nimui chihchiwaa iyaapitaayimaau aniyaayiuh maanishchaanishh.
14 Niiyi aaukw kinumaanishchaanishiwaasiu kaa miyu kiniwaayimaat umaanishchaanishiim. Nichischaayimaauch nimaanishchaanishiimich kiyaah maak wiiyiwaau nichischaayimikuch,
15 Muuyaam uhtaawiimaau aa iishi chischaayimit kiyaah maak niiyi aa iishi chischaayimik. Mitun maak nitiiitaayihtimihiikuwaan chaa chii pichistinisiwich chaa chii nipihiikuwich wiiyiwaau uhchi anichii nimaanishchaanishiimich.
16 Kutikich maanishchaanishich nitiyaawaauch aahaakaa utih uyaayiu maanishchaanishiukimikuyiu uhchiich. Kiyaah wiiyiwaau maak yaayitaa niki paashuwaauch. Chiki nituhtimuch kiyaah wiiyiwaau nipaahtaakusuwiniyiu aakw maak paayikunihch chaa maamuushiich anichii maanishchaanishich kiyaah chiki paayikusiu an kinumaanishchaanishiwaasiu.”
17 “Aayuwikw uyaayiu waahchi naashch saachihiit uhtaawiimaau mitun aa pichishtaayihtimaan nipimaatisiiun chaa chii uhchi miin pimaatisiiwich.
18 Nimui awaan kiti utinim nipimaatisiiuniyiu. Niiyi nikaawiyaayihtaan chaa pichishtaahyitimaan nipimaatisiiun. Nichii miyikuun suuhkaatisiiwin chaa chii pichishtaayihtimaan nipimaatisiiuun kiyaah nichii miyikuun suuhkaatisiiwin miin chaa chii pimaatisiiyaan. Nuuhtaawii uyaayiu kaah iitishumit chaa chiih tuuwich.”
19 Aakw miin kaa pihkaanipiyihuyich aniyaayiu Jew iiyiyiu iishpih piyaahtaakut uyaayiu aah iyit.
20 Mihchaatu maak aakw iyaach, “michiahchaahkw piihchishkaakuu. Chiiskwaau. Chaakwaayiu waahchi nituuhtiwaakw?”
21 Kutikich wii aakw iyaach, “nimui chipih uhchi ishpish miyuhtaakusuu awaan aa ayimit aa piihchishkaakut michiahchaahkw aa ishpish miyuhtaakusit uu naapaau. Taanitaah chipih chii uhchi isinaakuniyiu awaan aa piihchishkaakut michiahchaahkw chaa chiih tutiwaat awaayiuh aahaakaa waapihtimiyich chaa chii waapihtimiyich maak.”
Jesus aakaa kaa taapwaayaayimikut aniyaayiu Jew iiyiyiu aa Christwit
22 Maakwaach chii pipun anitih Jerusalemihch, chii aati utihchipiyiu maak anitih aashikum pipun kaa chii mikushaach aa chishchisich anichii Jew iiyiyiuch anitih kaa chischinuwaachitaakiniwiyich uchishaaayimihaaukimikuwaau Chishaaminituu iishi aah taayich.
23 Jesus maak maakwaach chii pipaamuhtaau anitaah pihtuskwaach aniyaayiu chishaaayimihaaukimikuyiu, Solomon upihtuskwaam kaa ishinihkaataayich.
24 Aakw kaa paachi waaskaakaapushtaakut aniyaayiu Jew iiyiyiuh. Aakw aatikut, “taayishpish aakw chaa miyaahch chaa chii chischaayimitaahch awaan chiiyi iyaawiyin? Kuiskw maah paachi wiihtimuunaan, aau aa chiiyi Christ an Chishaaminituu kaa paachi iitishihukut?”
25 Aakw Jesus aataat, “shaash kuiskw chichii wiihtimaatinaawaau nimui maak kuuhchi wiih taapwaahtuunaawaau. Misiwaa aniyaayiu kaa iishi paachi miyit nuuhtaawii chaa chii iishi maamishkaach ayihtuwich tipiyiwaa utih aah taayaakw aakutaah nuukuhch awaan niiyi iyaawiyaan.
26 Chiiyiwaau maak wii nimui chiki uhchi taapwaahtuunaawaau waash taapaa anitaah nimaanishchaanishimich aah taach chiti iishi wiichihiiwaanaawaau.
27 Nituhtimuch nipaahtaakusuwiniyiu nimaanishchaanishimich. Kiyaah maak nichischaayimaauch, aakw maak piyaachi nuushuushkuwich.
28 Nimiyaauch kaachich pimaatisiiwiniyiu, nimui maak nihtaa chiki uhchi nishiwitisiwich. Kiyaah maak nimui awaan niki chii miskimukw aa tihkunimich.
29 Nuuhtaawii, an kaa paachi miyit aniyaayiu, aaukw maauch aatituu suuhchaayihtaakusit ishpish kutik awaayiuh. Nimui maak awaayiuh taayiuh chaa chii miskimikut aa tihkunaat.
30 Niiyi kiyaah nuuhtaawii nipaayikunaan.”
31 Aakw anichii Jew iiyiyiuch kaa uhchi utinaachh asinii miin aa wiih pimushinaatihwaach Jesus aa wiih nipihaach.
32 Aakw Jesus aatikuch, “mihchaatwaau chichiwaapihtaanaawaau taan kaa ishpish chii miyututimaatikuch. Ninaahkiu chichii nuukuhtwaatinaawaau miyututimaachaawin Chishaaminituu aa chii paachi miyit chaa chii waapihtiitikuch. Taan an kaah tutimaan waahchi wiih pimushinaatihuyaakw?”
33 Aakw aataach aa niskwaashihaach, “nimiyaau wii miyututimaachaawin waahchi wiih pimushinaatihutaahch, chii maayaayihchaan aaukw waahchi wii nipihiitaahch. Chishin aa chishaaminituuwiyin mikw maak aa naapaawiyin.”
34 Aakw Jesus aatikuch, “akwaachishtaach chiwiishuwaawinuuwaahch,
Nichiih iyin, muuyaam aa chishaaminituuyaakw.
35 Chichischaayihtaanaaniu kaachich aa taapwaamikihch taan aatishtaach chihchimisinihiikin. Minituuch chii ishinihkaataau Chishaaminituu aniyaayiu kaa miyaakiniwich utiyimuwin. An maak chihchimisinihiikin nimui chik chii aahtinikiniu.
36 Niiyi maak, uhtaawiimaau nichii wiyaayimikw kiyaah nichii paachi iitishihukw utih aschiihch. Taanitaah chaa chii uhchi iyiyaakw aa maayaayihchaayaan aa iyaan, aaukw niiyi Chishaaminituu ukusish?
37 Aakaa aatuutimuwaauchaa aniyaayiu kaa iishi nitiwaayimit nuuhtaawii chaa chiih tutimuch aakw kiyipwaa nimui tikun chaa chii taapwaayaayimiyaakw.
38 Aat aakaa wiih taapwaayaayimiyaakw aa iyaan aah aawich Chishaaminituu ukusish mitun chipih chaashtinaataayihtimihiikunaawaau aa piihchishkut uhtaawiimaau kiyaah niiyi maak aa piihchishkuuk an uhchi aa maamishkaach ayihtiyaan.”
39 Aakw miin kaa wiih utinikut aniyaayiu Jew iiyiyiu, wiih maak mikw shaash chii iichaahtaau anitih.
40 Aakw Jesus miin kaau kaah aashuukaamaahaahk aniyaayiu Jordan siipiiyiu. Anitaah kaa chii siikihaahtaachaayich John aakutaah kaa iituhtaat. Aakutaah anitih kaah taat.
41 Mihchaatu maak awaayiuh chii paachi nitiwaapimikuu aah iiyiyich, “nimui nihtaa uhchi maamishkaach ayihtuu John, mikw maak misiwaa taapwaamikiniyiu taan kaa iitaachimaat uyaayiuh naapaauh.”
42 Mihchaatu maak awaayiuh anitih kaah taayich chii taapwaayaayimikuu Jesus.