Niyaaywaau chishaamitaahtumitiniu iiyiyiu kaa ashimaat Jesus
Matthew 14:13-21; Mark 6:30-44; Luke 9:10-17
6
1 Paatimaa Jesus chii chiskaamuhamuuch aniyaayiu Galilee saakihiikiniyiu. Tiberias saakihiikin kiyaah chii ishinihkaataakiniu uu Galilee saakihiikin.
2 Chii mihchaatiyiu maak awaayiuh kaa naanuushuushkaakut waash shaash chii waapimikuu aa maamishkaach aa ihtik aa miiniwaachihaat awaayiuh aah aahkusiiyich.
3 Jesus maak chii shaakichuwaau aa piskwaapiskaayich aakutaah anitih kaa uwaayipit uchischinihamuwaakinh aa wiitipimaat.
4 Shaash chii paashunaakuniyiu aniyaayiu Jew iiyiyiuch kaa chii mikushaach miyaashkaachaau mikushaawin kaa ishinihkaataayich.
5 Jesus maak chii ayitaapiu kaa waapimaat mihchaatu awaayiuh aa paachi nitiwaapimikut, aakw kaah iitaat aniyaayiu Philip, “taanitaah chaa chii uhtinihk aaihkunaau misiwaa chaa chii ashimikuch uchii iiyiyiuch?”
6 Aayuwikw uyaayiu kaa iishi kukwaachimaat Philip mikw aa chii wii nituchischaayimaat taan chaa iyikwaanihii aati shaash aa chii chischaayihtihk Jesus taan chaa tik wiiyi.
7 Aakw aatikut Philip, “aat mikw apishiish ashimihkw paahpaayikw awaan, iyaapich mishtiih shuwiyaan chipih iispiyiu aaihkunaau utinichaanuuchaa.”
8 Aakw paayikw aniyaayiu kutik uchischinihamuwaakinh Andrew, aniyaayiu Simon Peter wiichiiiyiyiu chii iitikuu,
9 “Taau utih naapaash niyaayu aaihkunaau kiyaah niishu nimaas aa iyaawaat. Nimui maak kiti iispiyiu uu miichim aah iishpih mihchaatihch uchii iiyiyiuch.”
10 Aakw Jesus iyaat, “iitaahkuch anichii iiyiyiuch chaa chii uwaayipich.” Naashch chii miskiwisiiyiu anitih aniyaayiu kaah taach. Aakw misiwaa anichii iiyiyiuch kaa uwaayipich, wiyaash niyaaywaau chishaamitaahtumitiniu chii iitishuch naapaauch.
11 Aakw Jesus kaa utinaat aniyaayiu aaihkunaau, kaa ninaaskumaat Chishaaminituu kaah aati maamaatinimuwaat aniyaayiuh uchischinihamuwaakinh aakw kaah aati maatinuwaayich. Aaukw kaah tutiwaat kiyaah aniyaayiu nimaas. Misiwaa maak mikw waah ishpish miichisuch chii ishpish miichisiwich.
12 Iishpih maak misiwaa awaan kaa taapishkuyit, aakw Jesus kaah iitaat aniyaayiuh uchischinihamuwaakinh, “maamuushichinimukw misiwaa taan aa ishpish iiskupiyich miichim, akaawii mitun iyaayuhtaataau chaakwaan.”
13 Aakw kiyipwaa kaa maamuushichinaayich, niishushaap maak utipiiwit chii saakischinitaauch aniyaayiu kaa iiskupiyich ishpish kaa chiish michisuuyich iiyiyiu, aa chii paahpikwaanimaakiniwiyich aniyaayiu niiyaayu aaihkunaau.
14 Anichii maak iiyiyiuch anitih kaah taach, anichii kaa waapimaach Jesus aniyaayiu maamiskaach waapihtiiwaawin aah tutimiyich aakw iyaach, “Chaashtinaash aaukw uu uchischiwaahiichaasiu an kaa ashuwaapimihkw chaa paachi iitishihwaakinut utih aschiihch.”
15 Jesus maak chii chischaayimaau aayihkw chaa paachi nitiwaapimikut aayihkim chaa wiih chihchiuchimaauhiikut, aakw kaa chistuhtaat aa piskwaapiskaayich kaa iituhtaat, mikw wiiyi chaa chii paayikushit.
Nipiihch kaa pimuhtaat Jesus
Matthew 14:22-33; Mark 6:45-52
16 Iishpih maak aati utaakushiyich Jesus uchischinihamuwaakinh chii naasipaayiu.
17 Chii puusiwich chiimaaniyiu aa chii wiih tiskaamihach, naataah Capernaum aa chii wiih ischimaauch. Shaash maak chii aati aukaayiu aashkw aahaakaa uhchi niichihiikuch Jesus.
18 Chaak naashch chii yuutiniyiu kiyaah chii maamihkaahaaniyiu.
19 Nishtu kiyaah maak naau tihtu aschiiyiu tipihiikin chii ishpish pimiskaachaanichii aakw kaa waapimaach Jesus. Chii paachi naatikuch anitaah chiimaanich aah taach nipiihch aa pimuhtaayich. Naashch maak chii kushtaachuuch.
20 Mikw maak aatikuch Jesus, “akaawii kushtaachikw, aaukw waash uu niiyi.”
21 Aakw maak kaa naahaayimaach chaa chii puusitaakuch. Tiiwaahch shaash chii mishikaauch naataah kaa ischimaach.
Mihchaatu iiyiyiuch kaa wiih waapimaach Jesus
22 Miin wiyaapiniiyich mihchaatu iiyiyiuch aashkw chiih taauch anitaah kwaastaa iitaahchaakaam aniyaayiu saakihiikiniyiu anitaah Jesus kaa ashimaat mihchaatu awaayiuh. Chii chischuuch maak anichii iiyiyiuch mikw aa chii paayikushiiyich chiimaaniyiu aa chii aapichihtaayich chischinihamuwaakin kiyaah aahaakaa uhchi puusiiyich Jesus anitih.
23 Kutikh maak chimaanh chii paachi naatikaamaapiyiu anitaah Tiberias aa uhchipiyiyich, paashuch anitih kaa ashimaakiniwich anichii iiyiyiuch, ishkutik Jesus kaa ninaaskumuut.
24 Nimui maak uhchi waapimaauch Jesus kiyaah maak uchischinihamuwaakiniyiu chaa chiih taayich anitih, aakw kaa puusich chimaanh anitaah Capernaum kaa ischimaach chaa naanituwaapimaach Jesus.
Jesus aaukw pimaachihiiwaau aaihkunaau
25 Iishpih maaskuwaach Jesus anitaah kwaastaa iitaahchaakaam aniyaayiu saakihiikiniyiu aakw aataach, “Chiskutimaachaasiu taayishpish kaa tikushiniiyin utih.”
26 Aakw Jesus aatikuch, “taapwaah chiwiihtimaatinaawaau, nimui an aa chii waapimiyaakw maamishkaach waapihtiiwaawin aah tutimaan waahchi paachi naanituwaapimiyaakw. Waash mikw an aa chii muwaakw aaihkunaau kiyaah aa chii chiishpuyaakw aaukw waahchi naanituwaapimiyaakw.
27 Akaawii aapitisiikw mikw aa wiih pikuhtimaasuuyaakw miichim an chaa iyaayuhch, tiyikuch wiih pikuhtimaasuukw an kaachich chaa tikuhch. Iiyiyiukusisaan chiki miyikuwaau miichimiyiu aakaa nihtaa chaa iyaayuniiyich. Waash Chishaaminituu uhtaawiimaau chii nuukuhtaau taapwaah aahaawiyich aniyaayiu kaa nihaayihtimiihiikut.”
28 Aakw aah iitaach, “taan maak chaa tiyaahch chaa chii aapitishiishtuuchiht Chishaaminituu?”
29 Aakw Jesus aatikuch, “aayuwikw uyaayiu aa iishi nitiwaayihtihk Chishaaminituu chaa chii iishi aapitishiishtuuwaakinuut, chaa chii taapwaayaayimimihkw aniyaayiu kaa paachi iitishihwaat.”
30 Aakw aataach Jesus, “taan chaa chii iishi maamiskaach waapihtiiwaawin chaa ayihtiyin anitih chaa chii uhchi taapwaayaayimitaahch maak.
31 Anitaah waashkich nitaaniskuusiminaanich chii muwaauch aniyaayiu aaihkunaau kaa miyaakiniwich maakwaach anitaah pikutiskimikaahch kaah taach. Akwaachishtaach chihchimisinihiikinihch,
Chii miyaakiniwich aaihkunaau chihchichiishikuhch uhchi.”
32 Aakw Jesus aatikuch, “taapwaah chiwiihtimaatinaawaau, aniyaayiu aaihkunaau Moses kaa miyitaakw nimui anitaah chihchichiishikuhch uhchi uhchipiyiu. Chishaaminituu, nuuhtaawii aaukw an maayitaakw aniyaayiu chihchiwaa aaihkunaau chihchichiishikuhch kaa uhchipiyihch.
33 Waash an aaihkunaau Chishaaminituu kaa miyiwaat aaukw an chihchichiishikuhch kaa uhchipiyit, kiyaah aaukw maayaat mistaaskimiihch kaah taayich awaayiuh pimaatisiiwiniyiu.”
34 Aakw aataach Jesus, “Tipaayihchichaayin, muush maah paachi miyinaan an aaihkunaau.”
35 Aakw Jesus aatikuch, “Niiyi aaukw an aaihkunaau anitih chaa chii uhchi pimaatisiit awaan. Awaan maak chaa paachi naasikwaa kiyaah chaa paachi taapwaayaayimikwaa, nimui nihtaa miin chiki uhchi shiiutaau kiyaah nimui nihtaa miin chiki uhchi nuuhtaayaapaakwaau.
36 Shaash maak chichii wiihtimaatinaawaau, shaash chichii waapiminaawaau ayaapich maak nimui kuuhchi wiih taapwaayaayiminaawaau.
37 Misiwaa aniyaayiuh awaayiuh uhtaawiimaau kaa paachi miyit niki paachi naatikuch. An maak awaan chaa paachi naasit nimui nihtaa niki uhchi iichaanaau.
38 Waash nichiitikushin chihchichiishikuhch aa uhchi paachi yaasiyaan chaa chiih tutimuch Chishaaminituu utitaayihtimuwin, an kaa paachi iitishuhut. Nimui nuuhchi tikushin utih aschiihch mikw niiyi nitiiitaayihtimuwin chaa chiih tutimaan.
39 Aayuwikw maak uyaayiu Chishaaminituu utitaayihtimuwin an kaa paachi iitishuhut, aakaa chaa chii winihiimich waawaach paayikw aniyaayiuh awaayiuh kaa paachi miyit, kiyaah maak chaa chii winishkaanimich maahchich chiishikaayichaa kaachich chaa chii pimaatisiiyich.
40 Waash aaukw uyaayiu nuuhtaawii utitaayihtimuwin, misiwaa awaayiuh kaa waapimaayich kiyaah kaa taapwaayaayimaayich ukusisimaau kaachich pimaatisiiwiniyiu chaa iyaayich. Niiyi maak chaa winishkaanik maahchich chiishikaachaa.”
Taanitaah chaa chii uhchi chischaayimaakw Jesus
41 Iishpih kaa chiish ayimit Jesus, anichii iiyiyiuch wiyaas chii iitaayimaauch uyaayiu aa chii iiyiyich, “niiyi aaukw an aaihkunaau chihchichiishikuhch kaa uhchi pichistinaakinuut.”
42 Aakw iyaach maak, “Nimiyaau aa uu Jesus, Joseph ukusish? Nichischaayimaanaan uhtaawiih kiyaah ukaawiih. Chaakwaayiu maak waahchi iyit chihchichiishikuhch aa uhchiit?”
43 Aakw Jesus aataat, “Aakun aakw ishpish pukunuumukw.
44 Nimui niki chii paachi naatikw awaan paatish uhtaawimaau aniyaayiu kaa paachi iitishihuyich tutaakuchaa chaa chii paachi naasit. Maahchich chiishikaachaa misiwaa awaan aa chii paachi naasit niki winishkaanaau.
45 Maauyaayiu kaa iitisinihiichaawaakupinaa aniyaahkaa uchischiwaahiichaasuch,
Chishaaminituu chiki chiskutimuwaau misiwaa awaayiuh.”
Aakw Jesus aataat, “Misiwaa maak anichii kaa niihtutiwaach kiyaah kaa utinimwaach uchiskutimaachaaawiniyiu uhtaawiimaauh niki paachi naatikuch.
46 Nimui awaan uhchi waapimaau uhtaawiimaau mikw aniyaayiu Chishaaminituu kaa paachi iitishihwaat aaukw an mikw kaa waapimaat uhtaawiimaau.
47 Taapwaah chiwiihtimaatinaawaau, an awaan kaa paachi taapwaayaayimit iyaau kaachich pimaatisiiwiniyiu.
48 Niiyi aaukw aaihkunaau kaa miyiwaat pimaatisiiwiniyiu.
49 Anitaah waashkich chii chitaaniskuusiimiwaauch chii muwaauch aniyaayiu aaihkunaau maanaa aa chii ishinihkaatimaakiniwiyich, maakwaach anitaah pikutiskimikaahch kaah taach. Iyaapich maak chii nipiwich.
50 Mikw maak an awaan chaa muwaakwaa aniyaayiu aaihkunaau anitaah chihchichiishikuhch kaa uhchi pichistinaamaakiniwiyich, nimui nihtaa chiki uhchi puunipimaatisiiu.
51 Aaukw maak niiyi an pimaachihiiwaau aaihkunaau chihchichiishikuhch kaa uhchi pichistinaakinuut. Awaan maak chaa muwaakwaa uyaayiu aaihkunaau kaachich pimaatisiiwiniyiu chiki iyaau. An maak aaihkunaau chaa miyiwaayaan aaukw uu niyaas anitih chaa chii uhchi iyaach iiyiyiuch pimaatisiiwiniyiu.” Aaukw uyaayiu Jesus kaah iyit.
52 Anichii maak iiyiyiuch chii ushtaapiyuuch aa ayimihiituuch, aakw iyaach, “taanitaah chaa chii uhchi miyiwaat uu naapaau wiyaas chaa chii uhchi miichinaaniwiyich?”
53 Aakw Jesus aatikuch, “taapwaah chiwiihtimaatinaawaau, nimui chiki chii iyaanaawaau kaachich pimaatisiiwin aakaa michiwaakwaa iiyiyiukusisaan wiyaas kiyaah aakaa minihkwaawaakwaa umihkw.
54 An maak awaan chaa miichikwaa niyaasiyiu kiyaah chaa minihkwaakwaa nimihkuyiu iyaau kaachich pimaatisiiwiniyiu, kiyaah maak niiyi niki winishkaanaau maahchich chiishikaayichaa.
55 Waash niyaas aaukw chihchiwaa miichim kiyaah nimihkw chihchiwaa minihkwaaun.
56 An maak awaan chaa miichikwaa niyaasiyiu kiyaah chaa minihkwaakwaa nimihkuyiu, nipiihchishkaakw kiyaah niiyi nipiihchishkiwaau.
57 Nuuhtaawii an kaa miyiwaat pimaatisiiwiniyiu nichii paachi iitishihuukw kiyaah nimiyikw pimaatisiiwiniyiu. Aakw maak muyaam kiyaah wiiyi an awaan kaa miichit niyaasiyiu, niki miyaau chaa chii pimaatisiit.
58 Aaukw uu aaihkunaau chihchichiishikuhch kaa uhchi pichistinaakinuut. Awaan maak chaa muwaakwaa uyaayiu aaihkunaau kaachich kiti pimaatisiiu. Nimiyaayiuh aniyaayiu aaihkunaau aanischaa chii waahkumaakinuwaauch kaa muwaach anitaah waashkich, aati aa chii muwaach aniyaayiu aaihkunaau ayaapich chii puunipimaatisiiwich.”
59 Aayiukunh uyaayiuh chaakwaayiuh kaah aayimuutihk Jesus kaa chiskutimaachaat anitaah Jew ayimihaaukimikuhch anitaah Capernaum ihtaawinihch kaah taat.
Jesus utiyimuwinihch aakutaah chaa uhchi pimaatisiit awaan
60 Iishpih maak kaa paahtaakut mihchaatu aniyaayiu kaa nuushuushkaakut aniyaayiu aah iyit, aakw iyaayich, “Taapwaah aayiminiyiu aniyaayiu kaah iyit, awaayiuh chaa chii niskwaayaayihtimiich wuyaa uchiskutimaachaawin?”
61 Jesus maak chii chischaayimaau, aah aat aakaa uhchi wiihtimuwaakinuut, taan aah iitituyich, chiih iitaau, “Kuushtiwaayihtimihiikunaawaau aa uu kaa iyaan?
62 Taan maak chaa iitaayihtimaakw waapimaakwaa iiyiyiukusisaan aa uhpiskaat anitaah iishi kaa chii taat aamwaayaa uhchi paachi iitishihwaakinut utih aschiihch?
63 Mikw kaa piyaahchisiit ahchaahkw miyiwaau pimaatisiiwiniyiu, nimui wii naapaau chiki chiih tutim uyaayiu. Aan maak aayimuuwin kaa wiihtimaatikuch aakutih waahchipiyich anitih ahchaahkuuhch kiyaah pimaatisiiwin aan chaa chii aayaayaakw.
64 Pisch maak utih aa tishiyaakw nimui chitaapwaayihtaanaawaau.” Shaash chii chischaayihtim Jesus maauch uskich awaayiuh aahaakaa chaa uhchi taapwaahtimiyich kiyaah chii chischaayimaau aniyaayiuh awaayiuh chaa maamishimikut.
65 Aakw iyaat maak, “Aaukw maak waahchi iitikuch nimui awaan niki chii paachi naatikw paatish uhtaawiimaau miyikuchaa chaa chii naasit.”
66 Iishpih maak kaah iyit uyaayiu mihchaatu aniyaayiu kaa nuushuushkaakut chii nikitikuu kiyaah nimui uhchi wiih wiichaaukuu shaash.
67 Aakw Jesus kaa kukwaachimaat aniyaayiu niishushaap uchischinihamuwaakinh aah iitaat, “Kiyaah aa chiiyiwaau chiwii nikisinaawaau?”
68 Kaa nishkwaaushihiikut Simon Peter aatikut, “Tipaayihchichaayin, awaan maak chaa nitiwaapimichiht? Chitiyimuwinihch aakutaah waahchi tikuhch kaachich pimaatisiiwin.
69 Nitaapwaahtaanaan maak kiyaah nichischaayihtaanaan chiiyi aah aawiyin kaa piyaahchisiit, an kaa paachi iitishihukut Chishaaminituu.”
70 Aakw Jesus aataat, “Nimui aa niiyi kuuhchi uwaayaapimitinaawaau aa niishushaapuyaakw, paayikw maak anitih aa tishiyaakw michiminituwiu.”
71 Judas, Simon Iscariot ukusiyiuh, aayiukun aniyaayiu kaah aayimuumaath waash aaukw an paayikw anitih aa niishushaapuuch chaa maamishimaakupinaa aniyaayiu Jesus.