Jesus kaa miiniwaachihaat naapaau naauush aa chii aahkusiiyich
5
1 Chii utihchipiyiu chaak anitih kaa chii mikushaach Jew iiyiyiuch anitaah Jerusalemihch, paatimaa maak aakutaah anitaah kaa iituhtaat Jesus.
2 Anitaah maak Jerusalemihch chiih tikun anitaah aa uhchi piihchaaniwiyich maanishchaanishishkwaahtaam aa ishinihkaataach paashuch maak anitih chii tikun aa pikaashimunaaniwich, Bethesda chii ishinihkaataau Hebrew aa iishi ayiminaaniwich. Niyaayu chii tihtin piihtuskwaau aahtikuhch anitih.
3 Mihchaatu iiyiyiuch kaah aahkusich aakutaah anitaah piihtuskwaach kaa pimishihch, anichii aakaa kaa waapihtihch, anichii aakaa kaa chii pimuhtaach kiyaah anichii aakaa kaa nistuusich wiiyaawaahch, aa ashiniwaataahch aniyaayiu nipiiyiu chaa ishpish aahtaakimipiyiyich.
4 Waash Chishaaminituu chii paachi iitishihwaau utaanchinimh chaa chii iyaataakimihiimiyich aniyaayiu nipiiyiu. Uyaayiu maak aah iispiyiyich aniyaayiu nipiiyiu, an awaan taan mikw aah iitaaspinaakwaa niishtim aa pikishtuwaahtaat chii miiniwaachihaakiniu.
5 Chiih taau maak naapaau nishtumitiniu niyaanaanaaushaap tihtu pipun aa chii ishpish aahkusit.
6 Iishpih Jesus wiyaapimaat aniyaayiu naapaau anitih aa pimishiniiyich, chii chischaayimaau shaash waashkich aa chii aahkusiiyich, aakw kaa kukwaachimaat aah iitaat, “Chiwiih miiniwaachihiikusiin aa?”
7 Aakw aniyaayiu naapaau kaah aahkusiiyich aatikut, “Nimui taau awaan chaa chii paachi iituhtihiit anitaah maakwaach aah aahtaakimipiyiyich aniyaayiu nipiiyiu. Maakwaach aa ishpishiihkaasuyaan anitaah aa wiih iituhtaayaan shaash taau maan awaan aa paachi aatiskiwit.”
8 Aakw Jesus aataat aniyaayiu naapaau, “pisikuuh, utin chitishpishimuns chaa pimuhtaayin.”
9 Tiiwaahch maak chii uhchi miiniwaatisiiu an naapaau. Chii utinim utishpishimuns aakw kaa chistuhtaat. Chii Jew ayimihaauchiishikaau maak uu kaa iispiyich.
10 Aakw anichii Jew kaa niikaanishkiwaach aataach aniyaayiu naapaau kaa miiniwaachihiimaakiniwiyich, “Ayimihaauchiishikaau anuuhch, iitishtaau wiishuwaawinihch chaa aahaakaa chii tihkunimin chitishpishimuns aa ayimihaauchiishikaach.”
11 Aakw aniyaayiu naapaau kaa miiniwaachihiimaakinuuwich aatikuch, “An awaan kaa paachi miiniwaachihiit, aaukw an kaa paachi iishit, utinh chitishpishimuns kiyaah pimuhtaah.”
12 Anichii maak Jew kaa niikaanishkiwaach chii kukwaachimaauch aniyaayiu naapaau aah iitaach, “chaakw naapaau uu kaa iitisk chaa chii utinimut chitishpishimuwinisiiyiu kiyaah chaa chii pimuhtaaut?”
13 Aakw an naapaau nimui uhchi chischaayimaau awaayiuh aniyaayiu kaa miiniwaachihiikut waash shaash chii chistuhtaayiu Jesus waash aa chii mihchaatinaaniwiyich anitih.
14 Paatimaa maak anitaah chishaaayimihaaukimikuhch Jesus chii mishkuwaau aniyaayiu naapaau kaa miiniwaachihaat aakw aataat maak, “nituuhtih, shaash chii miiniwaatisiin. Akaawii miin michituut, aakaa naatiwaayihtimuunaa austaa aa maayaatihch chaakwaan chaa chii ishpiyihiikuyin.”
15 An maak naapaau kaa miiniwaachihaakinuut chii chistuhtaau aa nituuwiihtimuwaat aniyaayiu Jew kaa niikaanishkiwaayich Jesus aa chii miiniwaachihiikut.
16 Anichii maak Jew kaa niikaanishkiwaach aakutaah kaa uhchi chihchipiyiyich aa wiimimichipiihaach Jesus aniyaayiu uhchi aa chii miiniwaachihaayich aniyaayiu naapaau aa Jew ayimihaauchiishikaayich.
17 Mikw maak kaah iitikuch Jesus, “Nuuhtaawii muush aapitisiiu, kiyaah niiyi aaukw chaa tiyaan.”
18 Anichii kaa niikaanishkiwaach aaukw maak waahchi atitiu chii nitiwaayimaach chaa chii nipihiimaakiniwiiyich Jesus, ishpish kaah paahtuuwaach aniyaayiu kaahiich. Waash nimui chistaayihtim aa Jew ayimihaauchiishikaayich aakw miin kaah iyit Chishaaminituu aa uhtaawiit. Kiyaah muyaam taan aa ishpish chistaayihtaakusiiyich Chishaaminituu aah iitaachimiisut.
Jesus kaah aayimuumaat uhtaawiih
19 Aakw Jesus aatikuch, “Taapwaah chiwiihtimaatinaawaau, ukusisimaau nimui mikw wiiyi tipiyiwaa chiki chiih tutim chaakwaayiu. Uhtaawiimaau aa ishiniwaat chaakwaayiu aa iiyihtiyich kiyaah wiiyi aayuwikw aati ihtik. Mikw taan aa iiyihtiyich uhtaawiimaau aayuwikw aahtik kiyaah wiiyi ukusisimaau.
20 Waash uhtaawiimaau saachihaau ukusisimaau kiyaah waapihtiyaau misiwaa taan aahtik. Chiki wiichihaau atitiu chaa chii maamishkaach aah tiyich. Aakw maak chaa maamishkaataayihtimaakw.
21 Uhtaawiimaau winishkaanaau awaayiuh nipiwinihch uhchi aakw maak maayaat pimaatisiiwiniyiu, aaukw kiyaah nihaau aahtik ukusisimaau, miyaau awaayiuh pimaatisiiwiniyiu aniyaayiu waah miyaat.
22 Uhtaawiimaau nimui tipaaskunaau awaayiuh. Wiiyi mitun chii miyaau ukusisimaau chaa chii tipaaskunichaayich.
23 Aakw maak misiwaa awaan chaa chishtaayimaat ukusisimaau muyaam aa iishi chishtaayimaat uhtaawiimaau. An awaan aakaa kaa chishtaayimaat ukusisimaau nimui chishtaayimaau kiyaah uhtaawiimaau aniyaayiu kaa paachi iitishihukuyich.”
24 “Taapwaah chiwiihtimaatinaawaau, an awaan chaa paachi nituuhtimukwaa taan aah iyiuch kiyaah taapwaahtiwaachaa aniyaayiu kaa paachi iitishihuyich kaachich kiti pimaatisiiu. Nimui kiti uhchi tipaaskunaakiniu waash nipiwinihch chii uhchi utinaakiniu aakw pimaatisiiwinihch kaa iishi pichistinaakinuut.
25 Taapwaah chiwiihtimaatinaawaau shaash aa utihchipiyihch an aahchinikwaanihtaat uu chaa iispiyich, shaash maak iispiyiu, anichii kaa puunipimaatisiiyich kiti paahtimwaauch Chishaaminituu ukusiyiuh upaahtaakusiwiniyiu. Anichii maak kaa paahtiwaach kiti pimaatisiiwich.
26 Waash wiiyi uhtaawiimaau aah taat uhchipiyiu pimaatisiiwin, miyaau maak ukusisimaau kiyaah wiiyi aah taayich chaa chii uhchipiyiyich pimaatisiiwiniyiu.
27 Chii miyaau kiyaah ukusisimaau tipaayihchichaawiniyiu chaa chii tipaaskunichaayich waash wiiyi aaukw iiyiyiukusisaan.
28 Akaawii kushkwaayitimukw, waash shaash paashunaakun misiwaa anichii kaa nihiikiwaakiniwich chaa chii paahtimwaach ukusisimaau upaahtaakusiwiniyiu,
29 Aakw maak chaa winishkaach nipiwinihch uhchi. Aakw anichii kuiskw kaa tutaachaach kaachich kiti pimaatisiiwich. Aakw anichii kaa michaatisich chiki winishkaanaakiniwich nipiwinihch uhchi chaa chii tipaaskunaakiniwich nisuunaatisiwinich.”
Jesus atitiu aa iishi aayimuumiisut
30 “Niiyi maak, taapaa nichiih tutaan chaakwaan mikw niiyi aa paayikuhkimaan. Nitipaaskunichaan aa iishi wiihtimaakuuyaan, kuiskunaakun, waash taapaa niiyi niwii nihaayihtimihiisuun, mikw an kaa paachi iitishuhut aaukw an waanihaayihtimihiik.”
31 “Niiyi maak mikw tipaachimisuyaan aa iyaan aah aawiyaan Christ nimui nipih uhchi taapwaahtaakiwin.
32 Kutik awaan taau aa paachi tipaachimit aah iyit aah aauwich Christ, nichischaayihtaan maak aa taapwaamikiniiyich aniyaayiu kaa iitaachimit.
33 Chichii iitishihwaawaauch iiyiyiuch anitaah John aah taayich chaa chii nituuchischaayimich taapwaah iyaawaauchaa Christ. Chii taapwaau maak aniyaa kaa iishi tipaachimit John.
34 Nimui nitiwaaiihtaakun chaa chii paachi wiihtimuut awaan niiyi aah aawiyaan Christ, waash nichischaayimiisun awaan niiyi iyaawiyaan. Mikw aaukw uu waahchi waawiihtimaan chaa chii pimaachihuyaakw.
35 Muyaam waashtaanimaakin aa chiihkaayaashtaach aaukw kaa isinaakusit John kaa tipaachimit. Chichii nihaayihtaanaawaau mikw waaipishchiish chaa chii muuchichaayihtimaakw anitaah uwaashtaawinihch.
36 Chii taapwaau John aniyaa kaa iitaachimit, mikw maak aniyaayiu waachihch aapitisiiwiniyiu kaa nitiwaayimit uhtaawiimaau chaa chiihstutimuuch, aayuwikun paamiihkimuuch, aakutih waahchi nuukuhch taapwaah taapwaawin wiih nuuhtaawii aa chii paachi iitishuhut.
37 Uhtaawiimaau an kaa paachi iitishuhut kiyaah wiiyi ni paachi tipaachimikw. Nimui maak nihtaa kuuhchi paahtimwaanaawaau upaahtaakusiwin kiyaah nimui nihtaa kuuhchi waapimaawaau.
38 Aniyaayiu utiyimuwin nimui chiwiih kiniwaayihtimwaanaawaau chitaahiiwaahch waash nimui chitaapwaahtaanaawaau wiiyi aa chii paachi iitishuhut.
39 Yaakwaah chii naanituchischaayihtaanaawaau aatistaayich chihchimisinaahiikinihch aa iitaayihtimaakw aati chaa chii uhchi chischaayihtimaakw taanitaah chaa chii uhchi iyaayaakw kaachich pimaatisiiwin, aakutaah misinaataach aa taapaachimikiwiyaan chihchimisinaahiikinihch.
40 Iiyaapich maak nimi chiwiipaachinaasinaawaau anitih chaa chii uhchi iyaayaakw pimaatisiiwin.”
41 “Nimui nitihtutaan chaakwaan naapaau chaa chii uhchi paachi maamihchimit.
42 Waash chichischaayimitinaawaau taan aa iitaayihtaakusiyaakw. Nimui chisaachihaawaau Chishaaminituu anitaah chitaahiiwaahch.
43 Nichiitikushin utih aschiihch nuuhtaawii aa chii paachi iitishuhut ayaapich maak nimui chiwiiutininaawaau. Kutik awaan chii tikushihk aahaakaa Chishaaminituu uhchi paachi iitishihukut chipih utinaawaau wiiyi.
44 Taanitaah chaa chii uhchi taapwaahtimaakw mikw naapaau aa chistaachimitaakw, aahaakaa wii maachimw wiihpikuuhtaayaakw chistaachimikusiiun aan mikw aa paayikusit Chishaaminituu aah taat aa uhchipiyich?
45 Akaawii iitaayihtimukw chaa maamishimitikuch anitaah uhtaawiimaau aah taat. Moses aaukw chaa maamishimitaakw aa iitaayihtimaakw kuuiskw aaihtiyaakw aa ninihiihtaamwaakw aniyaayiu uwiishuwaawin.
46 Taapwaah tiyaapwaahtiwaawaakwaa Moses, niiyi chipih paachi taapwaahtuunaawaau waash aniyaayiu niiyi nichii paachi tipaachimikw umisinihiikinihch kaa misinihiichaakupinaa.
47 Aakw maak aakaa tiyaapwaahtimuwaakwaa aniyaayiu Moses kaa iitisinihiichaat, taanitaah chaa chii uhchi taapwaahtimaakw niiyi nitiyimuwin?”