Okwaan̄ eyi ugwem
22
Ogwu osat ya onenijeen̄ emi okwaan̄ eyi mun̄ ugwem ya.
Mun̄ ya ìkpọkpọ igen kubọk umọọn̄,
mè ikigbuk inan̄a me ogboon̄ ubọọn̄ eyi Awaji,
mè eyi Gwun̄ Arọọn̄ ya isibi,
2 mè ikigbuk iniraka me eden̄ oniin̄ ama ya.
Uti òkito mfut eyi òkinyi ene ugwem otitibi me agba lek okwaan̄ ya me agan̄ iba,
mè ikito mfut kan̄ akọp mè mgbọ iba me acha,
mgbọ ge me onyan̄ geelek.
Inwan̄ uti ya ke ekisa igwa otutuuk ebi linyọn̄.
3 Inu geelek Awaji ofieekbe otu inyi ìkpokup me emen ama ya.
Ogboon̄ ubọọn̄ eyi Awaji mè eyi Gwun̄ Arọọn̄ môkup me emen ama ya,
ebi ikwaan̄ kan̄ mêkekitọbọ ebum inyi ọmọ me ere ya.
4 Ema mêmun̄ Awaji isi mè isi.
Mêge si erieen̄ Awaji me inyọn̄ okwut isi kiban̄.
5 Eririeen̄ ìkpoyaka ikup,
ebi ene kpebeyaka iweek utoon̄ mkpukan̄,
mè ìre utoon̄ ura,
mije,
Okumugwem Awaji me lek kan̄ môre utoon̄ inyi ema.
Ema mêkikpulu mege ire mgbọ ikakaan̄ge itata.
6 Ogwu osat ya onenitumu inyi emi ibe,
“Ikọ chi ìre atikọ,
mè igbe ibe etoon̄ ejit me lek.
Okumugwem Awaji kiji,
ogwu òkinyi ebi nriran Ekwukwu kan̄,
ọmọ oria ogwu osat kan̄ ibe inijeen̄ ebi ikwaan̄ kan̄ inu echi òbomọnọ irek me ikafiin̄ge mgbọ.
Jisọs môkpọk inu
7 “Ìkpọ,
emi gwa ǹkinu ugwat ugwat!
Uga ubelejit okup inyi ebi ìkirọ otutuuk ikọ nriran egebe me ikpa yi.”
8 Emi Jọn me lek n̄a nsa utọn̄ n̄a inọ ikọ chi,
mè isa chieen̄ n̄a imun̄ si inu chi.
Mgbọ nnọbe ikọ chi,
mè imun̄ inu chi,
nrọrọn̄ me ukot ogwu osat Awaji ya ogwu òjejeen̄ emi inu chi,
mè ibatọbọ ebum inyi ọmọ.
9 Ire,
ọmọ otutumu inyi emi ibe,
“In̄-in̄,
karọ!
Emi ìre ogwu ikwaan̄ Awaji kubọk owu mè bọn Nte kwun̄,
ìrere ebi nriran,
mè otutuuk ebi geelek ìkirọ inu egebe me emen ikpa yi,
erebe.
Tọbọ ebum nyi Awaji!”
10 Ogwu osat ya onenitumu inyi emi ibe,
“Kachit ikọ nriran egebe me emen ikpa yi,
chili jeen̄ ebi ene,
mije,
ìkpofiin̄ mgbọ inu chi geelek môrọbe iso.
11 Ogwu òkirọ ijo inu,
ikpọkpọ ikirọ ijo inu kan̄ ifo isi.
Ogwu òkirọ inu ikpak,
ikpọkpọ ikirọ inu ikpak kan̄ ifo isi.
Ikeya si,
ogwu òkirọ ata inu,
itet lek inye ikirọ ata inu kan̄ ifo isi.
Ogwu òsusun̄ lek kan̄ me mbuban inyi Awaji,
ikpọkpọ ikisun̄ lek kan̄ me mbuban inyi Awaji ifo isi.”
12 “Ìkpọ,
emi gwa ǹkinu ugwat ugwat!
Mkpukpe n̄a mbasa ikpe ebi ene me ubọk ikwaan̄ kiban̄,
òwa me ubọk n̄a.
M̀bakpe ene geelek mkpukpe igọọk me ubọk ikwaan̄ kan̄.
13 Emi ìre Alifa mè Omega,
òrere Adasi mè Òta,
Ibebene mè Itata otutuuk inu geelek.
14 Uga ubelejit okup inyi ebi ìgwọgwọk ofọnti kiban̄ itana.
Îre ema ke enyi unye ibe erie mfut ònan̄a me lek uti eyi òkinyi ene ugwem ya,
mè eje etibi me otunchit cha enin̄ emen ama ya.
15 Ire,
otutuuk ebi ìkifiat lek kiban̄ kubọk ibo,
mè ebi ìkirọ ugwem ibọk ibọk mè iwot iwot,
mè ebi barabat,
mè ebi ìkikpan̄ ene me agam,
mè ebi ìkiriaak mkpọmfaka,
mè ebi geelek ìkima ofiaan̄ mè ikikan̄ ataak,
ebibi otutuuk ebekup me udun̄ ama ya,
kpebenin̄ emen ama ya.
16 “Emi Jisọs nria ogwu osat n̄a inu me lek kinyi ibe inu inilook enyi otutuuk inu chi òkukup inyi ntitiin̄ Awaji geelek.
Emi nre Ugwun̄-ijọn̄ ya,
òrere Gwun̄ Owot Iman kè Debit ya,
mè ire si Ntoronyan̄ Otu Ewelegwe ya eyi òkitoon̄ enenen.”
17 Ekwukwu Awaji,
mè ayaya nwa Gwun̄ Arọọn̄ ya ekekibe,
“Na!”
Ene geelek ònọnọ ikọ chi itumu si ibe,
“Na!”
Ogwu geelek ebek mun̄ ugwem orakbe,
ene ya inu inibọkọ mun̄ eyi ugwem ya inwọ me ikike.
Òta Ikọ
18 Emi Jọn nkitaba otutuuk ebi geelek ìnọnọ ikọ nriran chi egebe me emen ikpa yi ubọk me utọn̄.
Ene geelek òtatap ofifi inu isọkọ me lek inu egebe me emen ikpa yi,
Awaji môsa otutuuk ufialek echi egebe inu ofolek me emen ikpa yi itap isọkọ me lek osusut ìbosulu ene ya.
19 Ene geelek òsasan̄a inu me lek ikọ nriran egebe me emen ikpa yi,
Awaji môsan̄a ubọk ene ya isan̄a me lek uti òkinyi ene ugwem ya,
inyi ikakaan̄ uche me lek mfut ònan̄a me lek uti ya.
Mêsan̄a ọmọ isibi ito me oyet,
inyi ikakaan̄ irek geege me emen Ama Mbuban ya eyi egebe inu ofolek me emen ikpa yi.
20 Ogwu òkekeke ata-ikọ ibe ke ikọ chi ìre atikọ ìkitumu ibe,
“Iin̄,
emi gwa ǹkinu ugwat ugwat!”
Ikup ikeya!
Okaan̄-ene Jisọs,
na!
21 Atata nnwọn eyi Okaan̄-ene Jisọs ikup melek otutuuk ebi eyi Awaji.
Ikup ikeya!