Ayaya isinyọn̄ mè ayaya linyọn̄
21
Nnenimun̄ ayaya isinyọn̄ mè ayaya linyọn̄.
Adasi isinyọn̄ mè adasi linyọn̄ îchep,
okwaan̄ ìkayaka ìkup.
2 Nnenimun̄ Ama Mbuban ya,
òrere ayaya Jeruselem ya okinan̄a me emen inyọn̄,
ere Awaji okupbe,
ikisibi inu.
Ebabala ọmọ isan̄a kubọk ekibala ayaya nwa inyi ogwu enerieen̄ òbododo me usen ijọk ido-nwa.
3 Nnọnọ ida ge okitaan̄ ukpo me ere ogboon̄ ubọọn̄ ya okupbe ikitumu ibe,
“Mgbọ keyi,
ere iluluk eyi Awaji ìkup me etete ebilene.
Awaji môluk melek kiban̄,
ema mêre ebi kan̄.
Awaji me lek kan̄ môkup melek kiban̄,
mè ire Awaji kiban̄.
4 Ọmọ môtuku ema mun̄ ito geelek isan̄a me chieen̄.
Mkpa ìkpoyaka ikup.
Ufieejit,
mè ito,
mè unan geege ìkpoyaka ikup ofifi.
Mije,
ukot oka inu cha geelek îraka isan̄a kpai.”
5 Ogwu òkwekweek irek me inyọn̄ ogboon̄ ubọọn̄ ya onenitumu inyi emi ibe,
“Kpọ mânirọ inyi otutuuk inu ikana ayaya,”
mè itumu si inyi emi ibe,
“Ge ikọ chi tap me ikpa,
mije,
ikọ chi ìre ikọ ògbegbe ibe etoon̄ ejit me lek,
mè ire si atikọ.”
6 Inenitumu inyi emi ibe,
“Îta!
Mîrọ isan̄a!
Emi nre Alifa mè Omega ya,
òrere Ibebene mè Itata.
Ene geelek ebek orakbe,
mânyi mun̄ eyi ònan̄a me ogbuuruk ere mun̄ òkinyi ene ugwem okigbuk inan̄a isibi.
7 Ene geelek òtitim ikpan̄ môbọkọ otutuuk inu chi.
Emi mâre Awaji kan̄,
ọmọ môrere gwun̄ n̄a.
8 “Ire,
ebi ìkitet ukpook igọgọọk emi,
mè ebi kpechieek me lek Awaji,
mè ebi ìchachaka mbuban,
mè ebi ìkpan̄ ene,
mè ebi barabat,
mè ebi ìkaan̄ ugwem ibọk ibọk,
mè ebi iwot,
mè ebi ìkitọbọ ebum inyi mkpọmfaka,
mè otutuuk ebi geelek ìkikan̄ ataak,
irek kiban̄ ìbore emen udọn̄ ukan̄ biridọni ya.
Eyiyi ore mkpa eyi òso mgbọ iba ya.”
9 Ge me lek ebi osat jaaba cha,
ebi ìkaan̄ okwa jaaba echi òta uyọrọlek cha okupbe me emen,
onunu inibe emi,
“Na,
mâjeen̄ owu ayaya nwa òbat olom ya,
òrere nwa Gwun̄ Arọọn̄ ya.”
10 Ekwukwu Awaji okakana ichit emi,
ogwu osat ya obeben emi isa isi inyọn̄ ikpele ubene ogoon̄ ge,
mè ijeen̄ emi Ama Mbuban ya,
òrere Jeruselem,
mgbọ îkinan̄a me ubọk Awaji me emen inyọn̄ ikisibi inu.
11 Ama ya okekitoon̄ mije ujamgbugbo Awaji,
mè ikimumen kubọk atalek unye otu ewe ewuuk ekigwen jasipa,
mè igen kubọk umọọn̄ mêkọtbe imọọn̄ inu itibi.
12 Mînama ikpele mgban òbebene ikana ama ya.
Mgban ya ìkaan̄ akọp mè otunchit iba me lek.
Akọp mè ebi osat iba ekekeke ikibem otunchit cha.
Mîge si erieen̄ akọp mè otoko iba ebi Ijeren me lek akọp mè otunchit iba cha.
13 Me lek mgban ama ya,
otunchit ita okup me agan̄ mbum-ura,
otunchit ita okup me agan̄ inyọn̄,
otunchit ita okup me agan̄ osiki,
otunchit ita si okukup me agan̄ ichep-ura.
14 Enama ama ya itoon̄ me inyọn̄ akọp mè ewuuk irak ijọn̄ iba echi egebe erieen̄ akọp mè ebi otuchieen̄ iba eyi Gwun̄ Arọọn̄ ya okaan̄be,
me lek.
15 Ogwu osat ya òtutumu ikọ melek n̄a onenikaan̄ uti itọ-inu esabe alata araran̄ irom me ubọk ibosa itọ ama ya,
mè mgban ama ya,
mè otunchit cha.
16 Ama ya ìkaan̄ isi ini,
isi ini cha ìre ìkike,
ge ìkajọn̄ọ ìgak ge.
Ujọn̄ọ kan̄ ìre obop ewuuk ije iba mè efit ini.
Ikeya si ke uwele kan̄ mè ubene kan̄ okeke,
mije,
ujọn̄ọ kan̄,
mè uwele kan̄,
mè ubene kan̄ ìre ìkike.
17 Ogwu osat ya onenisa ubọk ebilene ekisa itọ inu itọ ulobo akpọk mgban ya,
isisibi akọp ejit jaaba mè iba.
18 Esa ewuuk unye otu ewe ekigwen jasipa inama mgban ama ya,
mè isa alata araran̄ inama otutuuk ama ya me lek kan̄.
Alata araran̄ esabe inama ama ya,
kpunu okpa geege me lek,
ìkpọkpọ igen kubọk umọọn̄.
19 Esa owuwa esese ewuuk unye otu ewe ibala ewuuk irak ijọn̄ mgban ama ya.
Adasi ewuuk irak ijọn̄ ya ìre ewuuk unye otu ewe òtatana mè igen eyi ekigwen jasipa.
Eyi òso iba ore ewuuk òkup oluku oluku eyi ekigwen safaya.
Eyi òso ita ore ewuuk okuket mè eje eje eyi ekigwen kalisidoni.
Eyi òso ini ore ewuuk òkup njijoon̄ inwan̄ njijoon̄ inwan̄ eyi ekigwen emeran.
20 Eyi òso go ore ewuuk òkup chieen̄ nwen̄enwen̄e eyi ekigwen sadonikis.
Eyi òso gweregwen ore ewuuk araran̄ eyi ekigwen kanelian.
Eyi òso jaaba ore ewuuk òkup unwan unwan eyi ekigwen karasolet.
Eyi òso jeeta ore ewuuk òkup lek ge njijoon̄ inwan̄,
lek ge oluku oluku eyi ekigwen berin.
Eyi òso onaan̄ge ore ofifi ewuuk òkup si unwan unwan eyi ekigwen topaji.
Eyi òso akọp ore ewuuk òkup chieen̄ oduku oduku eyi ekigwen karasoperes.
Eyi òso akọp mè ge ore ewuuk òkup lek ge oluku oluku,
lek ge njijoon̄ inwan̄ eyi ekigwen jasinti.
Sà eyi òso akọp mè iba ore ewuuk òkup irio irio eyi ekigwen ametis.
21 Esa ewuuk unye otu ewe ònan̄a me okwaan̄ irọ otutuuk akọp mè otunchit iba cha.
Otunchit ge ìre ototuuk ewuuk ge,
kpebum,
kpegba isọk.
Oniin̄ òkup me emen ama ya,
esa alata araran̄ kpunube okpa geege me lek,
eyi ògegen kubọk umọọn̄,
irọ.
22 Ǹkamun̄ Uwu Mbuban geege me emen ama ya,
mije,
Okumugwem Awaji Ogwu Òkaan̄ Unye Geelek mè Gwun̄ Arọọn̄ ya ere Uwu Mbuban òkup me ama ya.
23 Kpeweek utoon̄ eyi ura,
mè eyi onyan̄ me ama ya,
mije,
ujamgbugbo Awaji okinyi utoon̄ me emen ama ya,
sà Gwun̄ Arọọn̄ ya ore mkpukan̄ òkitoon̄ me ama ya.
24 Ebi ido geelek eyi linyọn̄ keyi mêkisa utoon̄ kan̄ imọọn̄ inu ikijijen̄e,
ebi ubọọn̄ linyọn̄ mêsa si inu ubọọn̄ kiban̄ inu me emen ama ya.
25 Kpebechit otunchit ama ya kubọk usen geege,
ebegwugwuku otutuuk otunchit cha ibook mgbọ geelek,
mije,
eririeen̄ ìkpokup me ama ya.
26 Mêsa otutuuk uja inu ubọọn̄ mè umin eyi linyọn̄ keyi inu me emen ama ya.
27 Ire,
inu geelek ikatanage ìkponin̄ emen ama ya.
Ene geelek òkirọ inu òkisa esip inu,
mè ìre ogwu ofiaan̄,
ìkponin̄ emen ama ya.
Îtata ebi geelek egebe erieen̄ kiban̄ me emen ikpa ugwem eyi Gwun̄ Arọọn̄ ya gaalek ebenin̄ emen ama ya.