9
Òso ogwu osat go oneniwut otita kan̄.
Iwuwut isan̄a,
mmumun̄ ntoronyan̄ ge òwuwuuk lek inan̄a me isinyọn̄ irọn̄ me ijọn̄,
enyinyi ntoronyan̄ ya atafi ekisa ichili isotu otu udọn̄ ya eyi ikakaan̄ge okputut.
2 Mgbọ ntoronyan̄ ya ochilibe otu udọn̄ ya,
oduku okekibumu isibi me emen kubọk oduku ukan̄ emen aka oron,
mè ichit ura mè otutuuk isinyọn̄ bùk.
3 Ogbogbo akaka ituuk onanan̄a me emen oduku ya,
mè inikana ichit otutuuk inyọn̄ ijọn̄,
enyinyi ema unye òkup kubọk iwot otu eferen̄.
4 Mîtumu inyi ema ibe ekataka mbubet geege,
mè uti geege,
mè ekafiat inu geege òkaan̄ inwan̄ me lek me linyọn̄,
ire,
mè ema eloon̄ otutuuk ebilene ebi kpekaan̄ iman̄ òriọọn̄ eyi Awaji me inyọn̄ okwut isi kiban̄.
5 Kpenyi ema unye ibe ekpakpan̄ ene.
Ire,
enyi ema unye ibe erọ inyi ebi ife cha emun̄ ujaralek otuuk kè onyan̄ go.
Ujaralek ife cha emun̄be ìjat ikup kubọk mgbọ eferen̄ okisook ene.
6 Me otutuuk onyan̄ go cha,
ebilene mêweek mkpa,
ire,
kpebemun̄.
Mêweek ikwukwu,
ire,
mkpa môlibi itele ema.
7 Akaka ituuk cha ebet lek inyinya eneen̄be isun̄ ibesa isi akọn̄.
Me ibot kiban̄,
ema mîkwuun̄ inu ge òkup kubọk okpibot ubọọn̄ esabe alata araran̄ irom.
Sà isi kiban̄ onibet lek isi ebilene.
8 Ijeek òkup ema me ibot ìbet lek ijeek ibot ebibaan̄.
Sà ejeek òkup ema me otu onireke kubọk ejeek otu egbe àtat.
9 Ukwek-ejit ema esabe ikwek isi ejit kiban̄ ìkup kubọk echi esabe okwukwut irom.
Ema isikiwulu,
ida uwop kiban̄ ìkitaan̄ kubọk mgbọ ogbogbo inyinya okitaba owuwa uji akọn̄ ilibi isi isi akọn̄.
10 Edim kiban̄,
mè inu ema ekisa isook ene ìkup kubọk echi eferen̄.
Iwot òkup ema me edim ìkifiak ene otuuk kè onyan̄ go.
11 Ogwu ubọọn̄ òkikpulu ema ìre ogwu osat òkikpọ chieen̄ me lek udọn̄ ikakaan̄ge okputut ya.
Erieen̄ kan̄ eyi usem Iburu ìre Abadọn,
sà eyi usem Giris ore Apoliọn.
(Abadọn mè Apoliọn ìsibi “ogwu òfiat inu.”)
12 Adasi uyọrọlek înu mè iraka!
Ìyaka inisik uyọrọlek iba òbonu me isi.
13 Ogwu osat òso gweregwen oneniwut otita kan̄.
Nnọnọ inu ini òsọsọọk isibi me lek ntook alata araran̄ ya òkup me isi Awaji,
okisan̄a amọn,
14 mè ikitumu inyi ogwu osat òso gweregwen,
ogwu otita ya okupbe me ubọk ibe,
“Tọn̄ọ ebi osat ini cha tele,
ebi ebọpbe isun̄ me agba lek okwaan̄ ile Yuferetis.”
15 Etọtọn̄ọ ebi osat ini cha itele,
ebi esun̄be me mbem-lek ikpọ mbubak mgbọ keyi,
me usen chereyi,
me onyan̄ keyi,
me acha keyi,
kubọk Awaji osun̄be,
inyi ema enekpan̄ irek ge me etete irek ita me lek otutuuk ebilene me linyọn̄.
16 Ebi osat cha etọn̄ọbe itele,
enenisa ogbogbo urum ebi akọn̄ ìkilibi me inyọn̄ inyinya inu.
Otu ifuk ebi akọn̄ cha ebakbe inyi emi ǹnọ ìre efit efie iba.
17 Inyinya cha,
mè ebi akọn̄ ìkilibi me inyọn̄ inyinya cha,
kubọk mmun̄be me ilaak ọkpọchieen̄ n̄a ekup ikeyi:
Ukwek-ejit kiban̄ ìkup araran̄ kubọk alọm ukan̄,
mè ikup si oluku oluku kubọk ewuuk safaya,
mè ikup si unwan unwan kubọk biridọni.
Ibot inyinya cha ìkup kubọk ibot egbe àtat.
Ukan̄ mè oduku mè biridọni okekinan̄a me otu kiban̄ isibi.
18 Inu ufialek ita cha,
òrere ukan̄ mè oduku mè biridọni,
òkinan̄a me otu inyinya cha isibi,
okpakpan̄ irek ge me etete irek ita me lek otutuuk ebilene ìkup me linyọn̄.
19 Unye inyinya cha ìkup me otu kiban̄ mè edim kiban̄.
Edim kiban̄ ìkup kubọk ijijinu,
mè ikaan̄ si ibot me lek.
Ibot chi òkup me edim kiban̄ ke ema ekisa itọk ebilene itap unan me lek.
20 Ire,
ebilene ebi ìsisik me ugwem,
ebi uyọrọlek chi ikakpan̄ge,
kpechieek si igwugwu ikom,
mè itele orọmijọn̄ kiban̄.
Ema kpechieek itetele itọtọbọ ebum inyi ijo erumun̄,
mè mkpọmfaka esabe alata araran̄ itọkọ,
mè echi alata okuket,
mè echi ekwe,
mè echi ewuuk,
mè echi esabe uti ikọ.
Otutuuk mkpọmfaka chi kpekikọt imọọn̄ inu,
kpekikọt inọ ikọ,
kpekikọt ije ije si.
21 Ife cha si kpegwu ikom itele ikpakpan̄ ene,
mè ugwem ibọk ibọk mè iwot,
mè ugwem barabat,
mè ichichiin̄ inọ kiban̄ cha.