Gwun̄ Arọọn̄ ya îkama òso irek agba jaaba
8
Gwun̄ Arọọn̄ ya onenikama òso irek agba jaaba esabe igọm ikpa ekakat ya ichit.
Mgbọ îkamabe,
otutuuk emen inyọn̄ okpọkpọ ikup yiràk,
kpunu amọn geege,
mege iso inu òkup kubọk akọp nkikek mgbọ ita.
2 Nnenimun̄ ebi osat jaaba cha ìkikeke me isi Awaji.
Eneninyi ema otita jaaba.
3 Ofifi ogwu osat ge onunu inikeke me agba lek ntook,
mè ikaan̄ ngigọ alata araran̄ ekisa iwọp nsensi me ubọk.
Mînyi ọmọ owuwa nsensi ibe iwọp me inyọn̄ ntook alata araran̄ ya òkup me isi ogboon̄ ubọọn̄ ya,
inyi utop olu nsensi cha ikigbaan̄ ifuku melek uriaak otutuuk bọn Awaji eriaakbe.
4 Oduku nsensi cha ekiwọp,
melek uriaak bọn Awaji cha okekigbaan̄ inan̄a me ubọk ogwu osat ya ikibumu ifo inyọn̄ me isi Awaji.
5 Ogwu osat ya onenilọbọ ukan̄ me inyọn̄ ntook ya itap ijot ngigọ alata araran̄ ekisa iwọp nsensi ya,
mè iben ngigọ ya,
mè ukan̄ me emen,
itọp ito me linyọn̄.
Mgbọ yaage,
isinyọn̄ okekisook,
mè ikigbugbut,
mè ikikebe mèrèmèrèp.
Ijọn̄ okekisisik.
Ebi osat cha mîbene ikiwut otita jaaba cha
6 Ebi osat jaaba cha ìkakaan̄ otita jaaba cha enenibem lek iwuwut otita kiban̄.
7 Adasi ogwu osat iwuwut otita kan̄,
mgbọ yaage,
ibot mgbọlọ,
mè ukan̄,
mè eje ogbagbaan̄ ikirep igwook me linyọn̄,
mè itaka irek ge me etete irek ita me linyọn̄ isan̄a,
mè itaka si irek ge me etete irek ita me lek otutuuk uti òkup me linyọn̄ isan̄a,
mè itaka si otutuuk njijoon̄ mbubet isan̄a kpai me linyọn̄.
8 Òso ogwu osat iba oneniwut otita kan̄,
ebeben inu ge òkup kubọk ikpele ogoon̄ ukan̄ okisak me lek itọp itap me emen awaji.
Irek ge me etete irek ita me lek otutuuk emen awaji okakana eje.
9 Irek ge me etete irek ita me lek otutuuk inu geelek òkaan̄ ugwem me emen,
mè iluk me emen awaji,
okwakwaan̄ ita.
Irek ge me etete irek ita me lek otutuuk uji ile geelek òkikọp me emen awaji ojijijaka ita si.
10 Òso ogwu osat ita oneniwut otita kan̄.
Mgbọ îwutbe,
ikpele ntoronyan̄ òkibeen̄ kubọk ibot ukan̄ owawaka inan̄a me isinyọn̄ irọn̄ inin̄ emen irek ge me etete irek ita me lek otutuuk asabọn okwaan̄ mè emen mudim geelek òkup me linyọn̄.
11 Erieen̄ ntoronyan̄ ya ire Ujat.
Irek ge me etete irek ita me lek otutuuk mun̄ òkup me linyọn̄ obebene ikijat.
Owuwa ebi ene ekwakwaan̄ mije ema enwọbe mun̄ ya òjajat.
12 Ogwu osat òso ini oneniwut otita kan̄.
Mgbọ îwutbe,
inenikup kubọk inu ge onan̄a itọbọ irek ge me etete irek ita me lek ura,
mè irek ge me etete irek ita me lek onyan̄,
mè irek ge me etete irek ita me lek ntoronyan̄.
Mije keya,
irek ge me etete irek ita me lek utoon̄ kiban̄ okakana udun.
Sa me ikeya,
irek ge me etete irek ita me lek ikarek okakana udun.
Irek ge me etete irek ita me lek eririeen̄ si okakana udun.
13 Nnenibene chieen̄ ikpọ,
mè inọ igo ge okiwulu me akpabin inyọn̄,
mè ikitaan̄ ukpo itumu ibe,
“Jei,
môfieek!
Môfieek!
Môfieek enenen inyi ebi ìluk me linyọn̄,
mije ida otita ita echi ebi osat ita kechilọ ebewut!”