Ichichili
Eyi Jisọs Ochilibe Inu Ijeen̄ Jọn
1
Echichi ìre inu echi Jisọs Karais ochilibe ijeen̄ ebi ikwaan̄ Awaji.
Îre Awaji onyi Jisọs Karais inu chi ibe isa ijeen̄ ebi kan̄,
inyi ema eriọọn̄ inu òborọrọ me sọntiik mgbọ òkup me isi.
Jisọs Karais oraria ogwu osat kan̄ ibe inichili inu cha ijeen̄ Jọn ogwu ikwaan̄ kan̄.
2 Jọn oneniben otutuuk inu cha îmun̄be itumu isibi,
mè isa me ikeya ikirọ inye ibe ke ikọ Awaji eyi Jisọs Karais ochilibe ijeen̄ ọmọ ìre atikọ.
3 Uga ubelejit okup inyi ene geelek òfufuk ikọ nriran egebe me ikpa yi.
Uga ubelejit okup si inyi ebi geelek ìnọnọ etip chi,
mè ikirọ inu etumube,
mije,
mgbọ inu chi oborọ iso îgbet enenen.
Jọn îtọp ntitiin̄ Awaji jaaba òkup me agan̄ Esia amọn
4 Îre emi Jọn nkige ikpa yi ijet enyi ebi ntitiin̄ Awaji jaaba òkup me agan̄ Esia.
Atata nnwọn mè esuuk ikup inyi enyi inan̄a me ubọk Awaji ogwu òkukup karake akat,
mè ikup si me mgbọ keyi,
ogwu òbokup ire mgbọ geelek.
Atata nnwọn mè esuuk ikup si inyi enyi inan̄a me ubọk ekwukwu jaaba òkekeke me isi ogboon̄ ubọọn̄ Awaji,
5 mè ubọk kè Jisọs Karais,
ogwu ata-ikọ ògbegbe utoon̄-ejit,
ogwu Awaji odasi ijomo me mkpa.
Ọmọ si ore ogwu òkikpulu otutuuk ebi ubọọn̄ linyọn̄ keyi.
Ọmọ îmun̄ eji me chieen̄.
Sa me mkpa kan̄ ke înyan̄a eji isibi me emen ijo kiji.
6 Îkpulu eji isa irọ ebi Awaji okikpulu,
mè isa eji irọ ebi ngwugwa,
inyi eji ekesi ikwaan̄ enyi Awaji ogwu òrere Nte kan̄.
Itọn̄ mè mkpulu ikup inyi Jisọs ire mgbọ ikakaan̄ge itata!
Ikup ikeya!
7 Ìkpọ,
òkinu!
Ìboje melek oduku inyọn̄ inu.
Chieen̄ geelek mômun̄ ọmọ,
ìrere ebi ìsasa otunwa ichim ọmọ,
ema si mêmun̄ ọmọ.
Otutuuk ebi ido geelek òkup me linyọn̄
keyi mêto ito ufieejit mije kan̄.
Iin̄,
ikeya ke îbokup!
Ikup ikeya!
8 Okumugwem Awaji Ogwu Òkaan̄ Unye Geelek,
ogwu òkukup karake akat,
mè ikup me mgbọ keyi,
ogwu òbokup ire mgbọ geelek,
ìtumu ibe,
“Emi nre Ibebene mè Itata inu geelek.”
Jisọs Karais îsa lek kan̄ ijeen̄ Jọn
9 Emi Jọn nkige ikpa yi ijet enyi.
Emi ìre gwun̄ Nte kinyi,
ogwu melek kinyi ekigbaan̄ ibọkọ ufialek,
mè igbaan̄ ikup me mkpulu kè Jisọs Karais,
mè ikigbaan̄ ikat ejit ikime ufialek òkukup inyi eji mije kè Jisọs.
Îre mije nkitumu ikọ Awaji,
eyi Jisọs orọbe inye ibe ke îre atikọ,
eya orọ etetbe emi inito me inyọn̄ achọ Patimọs.
10 Mgbọ nkupbe me inyọn̄ achọ ya,
me Usen Okaan̄-ene ge,
Ekwukwu Awaji okakana ichit emi,
nnọnọ ida ge okitaan̄ unye unye me udun̄ n̄a kubọk ida otita,
11 mè ikitumu ibe,
“Ge otutuuk inu omun̄be tap me ikpa,
mè ria jet ntitiin̄ Awaji jaaba òkup me Efesọs,
mè Simaina,
mè Pegamọm,
mè Tiyatira,
mè Sadis,
mè Filadefia,
mè Lawodisia.”
12 Nraraan̄ chieen̄ ikana iweek imumun̄ ogwu òkitumu ikọ ya inyi emi.
Mgbọ ngwube isi ikana,
ǹyaka inimun̄ ngugọọn̄ mkpukan̄ jaaba esabe alata araran̄ irom,
13 mè imun̄ ene ge “òbet lek Gwun̄ Ebilene”a okekebe me etete ngugọọn̄ mkpukan̄ cha,
mè itap ujọn̄ọ ofọnti okuket igwook ire ijọn̄ ukot,
mè isa fanti alata araran̄ ikana me otu ejit,
mè ibọp ikaan̄.
14 Ibot kan̄ mè ijeek òkup ọmọ me ibot ìkitana jai kubọk eri akpọọn̄,
mè ikitana si kubọk abalara,
sà chieen̄ kan̄ okisak kubọk alọm ukan̄.
15 Ukot iba kan̄ ìkimumen kubọk ekwe òkikala me emen ukan̄,
sà ida kan̄ okitaan̄ woii kubọk ida owuwa agbugbuk.
16 Ọmọ okakaan̄ ntoronyan̄ jaaba me ubọk kan̄ agan̄ ulom.
Oge akọn̄ isi iba òrereke,
owọwọọk isibi ikeke ikeya me otu kan̄.
Isi kan̄ okekitoon̄ ikeya miai kubọk unye ura ejit ikarek.
17 Mgbọ mmun̄be ene ya,
nrọrọn̄ inyana me ukot kan̄ kubọk ogwu òkwukwu.
Ọmọ onyanyana ubọk agan̄ ulom kan̄ ichak emi me lek,
mè itumu inyi emi ibe,
“Katet ukpook!
Emi ìre Adasi mè Òta!
18 Emi ìre Ogwu Òkup Me Ugwem.
Nkwu me mgbọ òraraka.
Ire,
kpọ,
me mgbọ keyi,
emi òwa me ugwem mege ire mgbọ ikakaan̄ge itata!
Mkpa mè ama ekwukwu ìkup emi me ubọk.
Otutuuk atafi isotu kiban̄ ìkup emi me ubọk.
19 “Eya orọ,
ge inu chi geelek omun̄be tap me ikpa.
Ge echi òkukup me mgbọ keyi,
mè ge si echi òborọ me mgbọ òkup me isi.
20 Ke omun̄ ntoronyan̄ jaaba chi òkup me ubọk n̄a agan̄ ulom,
melek ngugọọn̄ mkpukan̄ jaaba cha esabe alata araran̄ irom?
Nlelet inu òkup me lek kiban̄ ìre ikeyi:
Ntoronyan̄ jaaba chi ìkeke inyi ebi osat Awaji jaaba ìkikpulu ntitiin̄ Awaji jaaba cha.
Sà ngugọọn̄ mkpukan̄ jaaba chi okeke inyi ntitiin̄ Awaji jaaba cha me lek kiban̄.”