Ubọk ògbegbe ibe bọn Awaji ekeluk ugwem
13
Ìkimun̄ lek kinyi me chieen̄ kubọk ngwan̄ mè ngwan̄,
mije,
enyi ìre bọn Ute ge.
2 Ikawuuk ikekibọkọ ebi ichen itap,
mije,
usini ene mîsa me ikeya iriak ebi osat Awaji ichen me ekariọọn̄ge.
3 Ìkikeek ebi ìkup me mkpọn kubọk ìre enyi melek kiban̄ ekup me mkpọn.
Ìkikeek si ebi ekitutuku kubọk ìre enyi melek kiban̄ ekigbaan̄ imun̄ ufialek.
4 Otutuuk ene ekenyi irek ibat-olom umin.
Ene geege ikafifila inyọn̄ mkpilaak olom mè nwa,
mije,
Awaji môsibi oyerebet me ibot ebi ugan-nwa,
mè ebi barabat geelek.
5 Ìsan̄a lek kinyi me lek ulọk ebek ikpoko,
mè ìtele inyi inu enyi ekaan̄be ijot enyi chieen̄.
Mije Awaji îtumu ibe,
“Emi m̀kpasan̄a enyi chieen̄ me lek,
m̀kpajijit si enyi itele mgbọ geege.”a
6 Eya orọ eji ekinye ejit itumu ibe,
“Ogwukaan̄-ene ore ogwu òkitap ubọk inyi emi,
ukpook ìkpotet emi!
Ìre keke ke ogwu ebilene ene
obokọt irọ emi?”b
Ìtele oka orọmijọn̄, mè ìtet ijejeen̄ ebi ibot kinyi ekijeen̄ enyi ìnye
7 Ìkikeek ebi ibot kinyi cha,
ebi ìtutumu ikọ Awaji inyi enyi.
Ìkeek ata inu ònanan̄a me ugwem kiban̄ isibi,
mè ìkaan̄ ojelek ichechieek ema ekaan̄be.
8 Jisọs Karais ìkakinwene,
ubọk îkupbe me iyakwut ke îkup me cherekeyi,
môkup si ikeya ire mgbọ ikakaan̄ge itata.
9 Ikagọọk uyeke uyeke ijejeen̄ geelek,
mè ìje ìlọ oniin̄.
Mije,
îre atata nnwọn Awaji okirọ inyi ejit kiji ikeke inye,
ìkare mfaka eyi ikan inorie,
eyi ikakaan̄ge oruru geege ìnyi ebi ìkisusun̄.
10 Ntook ngwugwa eyi eji ekaan̄be,
ebi ngwugwa ebi Ju ìkisi ikwaan̄ me emen Atanga Chinichini kpekaan̄ unye imọmọnọ inu me inyọn̄ irie.
11 Ogwu òban Awaji ebi Ju ìkiben eje anam me ubọk isa itibi iraka inin̄ Ere Òkup Mbuban Ichit isi igwa ngwugwa mije ijo inu otutuuk ebi ene,
ire,
mîra ikisa akpalek anam cha isibi udun̄ ere m̀gba-ǹgwele ukan̄ ya ema elukbe isi iwọp.
12 Ikeya si ke Jisọs Karais omun̄ ufialek,
mè ikwu mkpa me udun̄ otunchit ama Jeruselem,
inyi ọmọ isa eje kan̄ igwọk ijo ebilene isan̄a,
inyi ema ekup me mbuban.
13 Eya orọ,
eji enesibi egọọk ọmọ me udun̄ ere m̀gba-ǹgwele ukan̄ ya,
mè ebọkọ si ojelek esip eyi ọmọ obọkọbe.
14 Mije,
eji kpekaan̄ ama geege me linyọn̄ keyi ere eji ebekọt iluk ire mgbọ ikakaan̄ge itata.
Eji ekiweek ama ya eyi òbonunu me isi.
15 Eya orọ,
sa me lek kè Jisọs,
eji ekesa otu kiji etọn̄ Awaji mgbọ geelek,
kubọk ìre ngwugwa ke eji ekigwa inyi ọmọ.
Eyi môre mfut ònan̄a me otu ebi ìkitumu erieen̄ kan̄ isibi.
16 Ikawuuk ikekirọ ata inu,
mè ikekiche inu inyi ebi ekakaan̄ge.
Mije,
îre ngwugwa òkup ikeyi okibele Awaji ejit.
17 Ìkisiki ibot ìnyi ebi ibot kinyi,
mè ìkirọ inu ema ekitumu inyi enyi.
Îre ema ekikpọ chieen̄ me lek kinyi,
mije,
ema mêrọ ifuk ofolek kinyi inyi Awaji.
Ìkigban̄ utọn̄ ìnyi ema,
inyi ema ekesa ubelejit esi ikwaan̄ kiban̄,
mè ikwaan̄ ya ikakana ufialek ìnyi ema.
Mije,
eya ìkposibi oruru geege inyi enyi.
Òta uriaak, mè amọn
18 Ìkiriaak uriaak ìnyi eji mgbọ geelek.
Inu eji eriọọn̄be ìre ke ejit kiji ìkafieek eji ikọ,
mije,
eji ekiweek irọrọ inu òtatat me mgbọ geelek.
19 Ògak ge,
ǹkibeek ibe enyi otutuuk ene eriaak Awaji me ibot n̄a,
inyi ǹgwat lek ǹkaan̄ irek ǹgwu ǹkom ǹnu me lek kinyi.
20 Awaji,
ogwu ibot esuuk,
îjomo Okaan̄-ene Jisọs,
òrere ikpele Ogwu Òkpukpo Arọọn̄ ya,
me mkpa,
sa me lek eje eyi inyan̄a-ibot òkukup ire mgbọ ikakaan̄ge itata.
21 Kè Awaji,
ogwu ibot esuuk yi,
inyi enyi otutuuk ata inu geelek enyi mêweekbe isasa ikọt irọ inu ọmọ okiweek.
Kè Awaji irọ inu òneme ọmọ me emen kiji,
sa me lek kè Jisọs Karais,
ogwu itọn̄ okupbe inyi ire mgbọ ikakaan̄ge itata.
Ikup ikeya!
22 Bọn Nte n̄a,
nriaak enyi,
soso,
ìkat ejit ìbọkọ nteme n̄a,
mije,
ikpa keyi ngebe ijet enyi ìkajọn̄ọ.
23 Ǹkiweek irọrọ inyi enyi eriọọn̄ ibe ke mîsan̄a gwun̄ Nte kiji Timọti isibi me mkpọn.
Ire igwat lek inu,
mâsa ọmọ igbaalek inu inimun̄ enyi.
24 Ìtọp otutuuk ebi ibot kinyi,
mè otutuuk ebi eyi Awaji amọn ìnyi emi.
Bọn Nte kiji ebi ìnan̄a me Itali si mîtọp enyi amọn.
25 Atata nnwọn eyi Awaji ikup melek kinyi otutuuk ene!
Ikup ikeya!