12
Eya orọ,
eyi ogbogbo ebi ata-ikọ ewabe ikana eji ikeyi,
eji esan̄a otutuuk inu geelek òkigbugbana eji,
mè ijo inu ya eyi òkigwat lek igugọbọ eji ikam me ikafiatge mgbọ,
etọp efiin̄,
mè ekat ejit elibi ekot yi òkup eji me isi ililibi.
2 Eji eben chieen̄ kiji egwuun̄ me lek kè Jisọs,
ogwu ichechieek kiji onan̄abe me ubọk,
mè ogwu òkirọ ichechieek kiji ijot.
Ọmọ îkat ejit ibọkọ ujaralek me inyọn̄ uti nkwurieen̄,
ìkasa esip mkpa inyọn̄ uti nkwurieen̄ ìgwen inu geege,
mije,
îriọọn̄ ibe ke ọmọ môkaan̄ unwọọn̄ me mgburudun̄ mgbọ.
Mgbọ îbọkọbe ujaralek ya isan̄a,
ikwekweek irek me agan̄ ubọk ulom ogboon̄ ubọọn̄ eyi Awaji,
ere îkupbe ire mgbọ keyi.
3 Ikachieek ibe lek kinyi iwọ,
ikachieek si ibe efuuk ita enyi me emen.
Ìkikeek ujaralek eyi Jisọs obọkọbe me ubọk ebi ijo ife,
mè irọrọ ikeme eyi erọbe ikeme ọmọ.
4 Akọn̄ eyi enyi ekitim ikeme ijo inu,
enyi kpetitim-nu ire lek eyi ekpan̄be enyi.
Awaji ìkekisa osusut itaba bọn kan̄ ubọk me utọn̄
5 Ikawuuk ikọ ukarajit Awaji otumube inyi enyi kubọk bọn kan̄,
ibe,
“Gwun̄ n̄a,
kamọnọ osusut
eyi Okaan̄-ene okisulu owu kubọk inu ifit ifit;
kachieek si ibe efuuk ita owu
me emen mgbọ isikigana ere inyi owu.
6 Mije,
ebi Okaan̄-ene omabe,
ebiba ke îkinyi osusut;
ebi geelek îbọkọbe itap kubọk bọn kan̄,
ebiba ke îkisulu me njijan̄.”a
7 Eya orọ,
ìkikat ejit ìbọkọ ufialek chi geelek kubọk ìre osusut eyi ute okisulu ogwu gwun̄.
Mije,
ufialek chi enyi ekibọkọ ìkijeen̄ ibe ke Awaji ìkirọ enyi me lek kubọk ute okirọ melek ebi bọn.
Ìkeek-nu,
ìre kpasi gwun̄ okup,
ogwu ogwu ute ìkakisulu me njijan̄?
8 Me atikọ,
ire Awaji ìkasulu enyi njijan̄ kubọk îkisulu otutuuk ebi bọn,
ìsibi ibe ke enyi kpere atata bọn;
ke enyi ìre bọn ugan.
9 Ògak ge,
ebi nte kiji me linyọn̄ keyi mîkisulu eji,
eji ekekinyi ema ulibi si.
Ire ikeya,
ìre ìkafat ìgbe ibe eji esiki ibot egak ikeya enyi Awaji,
òrere Nte kiji,
ogwu òkaan̄ ekwukwu kiji,
inyi eji egat ata ugwem?
10 Ebi nte kiji ebilene esulu eji sọntiik mgbidim mgbọ gaalek ubọk ema ekeekbe ibe ke îtat.
Ire,
Awaji ìkisulu eji,
inyi inwọn inyi eji,
inyi eji ekup me mbuban kubọk ọmọ okupbe me mbuban.
11 Kpunu osusut geege òkitotop mgbọ ekisulu ene.
Kpan̄asi ikeya,
ìkinanaan̄ ene.
Ire,
me mgburudun̄ mgbọ,
ebi geelek ìkwekween̄ inu inan̄a me lek osusut cha mîkikaan̄ mkpukpe eyi ugwem ata irọrọ,
mè esuuk.
12 Eya orọ,
ìnyana ubọk kinyi cha òwọwọ ìsa ìtet inu,
mè ìnyana akpatukot kinyi cha òmemem ìsa ìjak ukot me ijọn̄.
13 Ìrọ oniin̄ enyi etapbe ukot ilibi ìkike,b
inyi ukot òwọwọ inye,
mè ikakana akọọk.
Ìluk ugwem òkup me mbuban, ikatele Awaji
14 Ubọk geelek enyi eriọọn̄be,
ìmun̄ ibe ke enyi mîluk me esuuk melek otutuuk ene,
mè ikup me mbuban.
Mije,
ire ene ìkakup me mbuban,
ìkpomun̄ Okaan̄-ene.
15 Ìmun̄ ibe ke otutuuk ene mîbọkọ atata nnwọn Awaji iso.
Ìmun̄ si ibe ke ene geege me etete kinyi ìkakana ujat mfut eyi òbotibi isibi,
mè inisa ujat kan̄ itap ufialek,
mè irọ inyi owuwa ene ekatana me isi Awaji.
16 Ìmun̄ ibe ke kpunu ene geege òrere barabat;
ke kpunu si ene geege ikariọọn̄ge Awaji,
kubọk Isọ ogwu òsasa irek adasi gwun̄ enerieen̄ eyi ọmọ orebe inwene alala inorie ge gaalek.
17 Kubọk enyi eriọọn̄be,
me mgburudun̄,
mgbọ ọmọ obonibọkọ ugbana me ubọk ogwu ute,
ogwu ute îjit igbagbana ọmọ.
Ọmọ ototo ito iweek ugbana ya,
ire,
ìkakọt ìnwene ejit ogwu ute.
18 Ìkare inu eyi mêkọtbe ichak ubọk me lek ke enyi eje igba me lek,
kubọk ebi Ijeren ejebe isi ikeke me agba ogoon̄ Saina eyi ukan̄ okisook isibi me inyọn̄,
udun okakana ichit bùk,
urimi oninin̄,
egwijo okekijibi,
19 ida otita okekitaan̄,
ida ge okekitumu ikọ.
Mgbọ ebi Ijeren cha enọbe ida ya,
ema erariaak ibe,
soso,
mè ida ya ikayaka ìtumu ikọ ìnyi ema,
20 mije,
ke ema kpebekọt ibeme ikan eyi ida ya okinyi ibe,
“Ìrere anam ikike ochak lek me lek ogoon̄ ya,
esa ewuuk etọbọ ekpan̄!”c
21 Inu ema emun̄be me ere ya îtet ema ukpook enenen ire lek Mosis me lek kan̄ otumube ibe,
“Ǹkiraran mije ukpook.”d
22 Ìkare ojelek ogoon̄ Saina ya ke enyi enu me lek.
Kpan̄asi ikeya,
enyi enu me lek ogoon̄ Sayọn,
òrere Jeruselem eyi òkup me emen inyọn̄,
ama Awaji òkup me ugwem,
ere obop obop ebi osat ekariọọn̄ge otu ifuk egbaan̄be ititiin̄ ikirie ijọk.
23 Enyi enu me emen ntitiin̄ ebi adasi bọn eyi Awaji,
ebi egebe erieen̄ kiban̄ itap me ikpa me emen inyọn̄.
Enyi enu me lek Awaji ogwu òkifieek oyerebet inyi otutuuk ebi ene,
mè inu si me lek ekwukwu ebi ata irọrọ,
ebi Awaji orọbe ijot.
24 Enyi enu me lek kè Jisọs ogwu ayaya inyan̄a-ibot ojebe me ubọk inu.
Enyi enu si me lek eje ya eyi enyanbe,
eyi òkitumu ikọ ofolek inu ònwọnwọn igak inu eje kè Eben otumube ikọ ofolek,
eyi òrere irọrọ useen̄ inu erọbe ọmọ.
25 Eya orọ,
ìmun̄ ibe ke enyi kpejit ogwu òkitumu ikọ ya inyi enyi.
Ire ebi Ijeren kpenwọnọ mgbọ ema ejitbe igbagban̄ utọn̄ inyi ogwu òtataba ema ubọk me utọn̄ me linyọn̄ keyi,
ìre enyi ekikeek ibe ke eji mêkọt inwọnọ,
ire eji ijit igbagban̄ utọn̄ inyi ogwu ònan̄a me emen inyọn̄ initaba eji ubọk me utọn̄?
26 Me mgbọ ya,
ida kan̄ îsisik ijọn̄.
Ire,
me mgbọ keyi,
ọmọ îra ichieek use ibe,
“Ofifi mgbọ,
ìkare linyọn̄ gaalek ke mâsisik,
mâsisik emen inyọn̄ si igbaalek.”e
27 Usem ya îtumube ibe,
“Ofifi mgbọ,”
ìsibi ibe ke mêsan̄a inu mêkọtbe isisik isan̄a,
òrere inu echi erorom,
inyi echi kpebekọt isisik ibia.