Ogwukaan̄-ene ìkiweek unen oyerebet mè nsan, ìkare ijin-otu
7
Etip Okumugwem oneninu inyi Jekaraya me òso acha ini me lek mkpulu kè Dariọs ogwu ubọọn̄, me òso egwe ini me òso onyan̄ onaan̄ge, òrere onyan̄ Kisilep.a 2 Ebi Beten mîria Sareja mè Regem-Melek, mè ebi melek kiban̄, ibe esi Uwu Mbuban esi ebeek ntap-ubọk me ubọk Okumugwem. 3 Ebe ema edo-nu ebi ngwugwa mè ebi nriran ìkup me Uwu Mbuban Okumugwem Ogwukaan̄ Inyọn̄ mè Ijọn̄ ibe, “Ìre eji efieek ejit mè ejin otu me onyan̄ go, ubọk eji ewuukbe lek ikirọ owuwa acha isa ikikeek mgbọ egwakbe Uwu Mbuban?” 4 Etip Okumugwem Ogwukaan̄ Inyọn̄ mè Ijọn̄ oneninu inyi emi ibe: 5 “Do-nu otutuuk ebi ama mè ebi ngwugwa ibe, ‘Otutuuk akọp acha jaaba cha òraraka echi enyi ejinbe otu mè ifieek ejit me òso onyan̄ go mè òso onyan̄ jaaba cha, ìtumu-nu, ìre emi keyi ke enyi ekijin otu inyi me atikọ? 6 Mgbọ enyi ekirie mè ikinwọ cha, ìre ìkare lek kinyi ke enyi ekirie mè ikinwọ inyi? 7 Ìre ìkare etip kechi ke Okumugwem olook inan̄a me otu ebi nriran mgbọ kechilọ cha ni, mgbọ Jeruselem mè ama cha geelek òkakana ọmọ okokop ojotbe, mè ibọọn̄ ubọọn̄, mgbọ ebi ene elukbe si me emen èwê agan̄ osiki mè orioon̄ isi ogoon̄ agan̄ ichep-ura cha?’ ”8 Etip Okumugwem oneninu inyi Jekaraya ibe: 9 “Okumugwem Ogwukaan̄ Inyọn̄ mè Ijọn̄ ìtumu ibe ikeyi: ‘Ìsibi unen oyerebet, mè ìkaan̄ ejit nsan mè njijin me lek ebi melek kinyi. 10 Ikafeen̄ ebi nwakpa mè ebi kpà-nte, melek ebi ichen mè ebi ugbọọn̄. Ene geege ikakeek ijo inu me ejit kan̄ ìbak ogwu melek kan̄.’
11 “Ire, ema ejijit igbagban̄ utọn̄, mè ikana ebi unye-ibot, mè isa ubọk inwaan̄ utọn̄ kiban̄ ichit, mè ijit inọnọ. 12 Ema etetet ejit kiban̄ inye kubọk ewuuk unye isi, mè ijit igbagban̄ ikan mè ikọ echi Okumugwem Ogwukaan̄ Inyọn̄ mè Ijọn̄ oriabe sa me Ekwukwu kan̄ inan̄a me otu ebi nriran mgbọ kechilọ cha. Eya orọ, Okumugwem Ogwukaan̄ Inyọn̄ mè Ijọn̄ onanaan̄ ejit enenen.
13 “Okumugwem Ogwukaan̄ Inyọn̄ mè Ijọn̄ onenibe, ‘Mgbọ emi ngwenbe ema, ema kpegban̄ utọn̄. Ikeya si, ema isigwen emi, emi si m̀kpagban̄ utọn̄. 14 Emi ǹsasa egwijo iniyiyala ema itọọn̄ ikana itap me etete ido cha ebi kperiọọn̄ ema. Me udun̄ kiban̄, ijọn̄ kiban̄ okakana ukpọk ukpọk, kpunu ogwu òkọkọt ije itibi lek ijọn̄ ya, kpunu ogwu òkọkọt igwu ikom inu si lek. Ijọn̄ mgbọ òjajaan̄ ya, ìyaka inikana ukpọk ukpọk.’ ”