Ilaak ọkpọchieen̄ òso jeeta: Uji akọn̄ ini
6
Nnenikpọk ibene chieen̄ ikpọ, mè imun̄ uji akọn̄ ini okinan̄a me agbagba ogoon̄ iba ikinu, ogoon̄ cha ìre ogoon̄ ekwe. 2 Inyinya araran̄ okitaba uji akọn̄ eyi adasi, inyinya ofifit okitaba uji òso iba, 3 inyinya okuket okitaba uji òso ita, sà inyinya ngwugwat lek okitaba uji òso ini. Otutuuk kiban̄ enyenye lek iso. 4 Nnenido ogwu osat òkitumu ikọ melek n̄a ibe, “Ogwukaan̄ n̄a, echichi ìre keke ni?”5 Ogwu osat ya ofọfọọk emi ibe, “Ebibi ìre ekwukwu ini echi emen inyọn̄. Ema enan̄a me ere ema ekikeke me isi Ogwukaan̄ otutuuk linyọn̄ isibi inu. 6 Uji akọn̄ eyi inyinya ofifit cha okitaba ije ìkisi ido agan̄ inyọn̄, eyi inyinya okuket okitaba ije okisi agan̄ ichep-ura,a eyi inyinya ngwugwat lek okitaba ije okinin̄ agan̄ osiki.”
7 Inyinya cha ònyenye lek enan̄a isibi melek ikpele ulọk ijijijen̄e ikana otutuuk linyọn̄ iso. Okumugwem obebe ema, “Ìsibi, ìsi ìje ìkana otutuuk linyọn̄!” Ikeya ke ema esi ije ikana otutuuk linyọn̄. 8 Mgbọ ya, Okumugwem onenigwen emi, mè ibe, “Kpọ, ebi ìsisi ido agan̄ inyọn̄ ya mîrọ inyi Ekwukwu n̄a isiki efuuk me ido agan̄ inyọn̄ ya.”
Josuwa îbọkọ okpibot ubọọn̄
9 Ofifi etip Okumugwem onunu si inyi emi ibe: 10 “Bọkọ uche alata okuket mè alata araran̄ me ubọk ebi usun̄ akọn̄ cha, ìrere Elidai mè Tobija mè Jedaya, ebi ìnan̄a me Babilọn ika. Me usen yaage, owu môsa uche cha isi uwu kè Josaya gwun̄ kè Jefanaya. 11 Sa alata okuket mè alata araran̄ cha rom okpibot ubọọn̄, mè sa kwuun̄ me ibot kè Josuwa ogwu òban Awaji, gwun̄ kè Jeyosadak. 12 Tumu nyi ọmọ ibe ke Okumugwem Ogwukaan̄ Inyọn̄ mè Ijọn̄ ìtumu ibe ikeyi: ‘Kpọ enerieen̄ ge ire eyi, erieen̄ kan̄ ìre Agọọk. Ọmọ môtibi isibi me ere ọmọ okupbe, mè ininama Uwu Mbuban Okumugwem. 13 Îre ọmọ obonama Uwu Mbuban Okumugwem. Ọmọ môkaan̄ umin ogwu ubọọn̄, mè ikup me inyọn̄ ogboon̄ ubọọn̄ ikikpulu. Ọmọ môre ogwu ngwugwa me inyọn̄ ogboon̄ ubọọn̄ kan̄. Irek iba cha môgbaan̄ ikup ijaan̄ me esuuk.’b 14 Mêsun̄ okpibot ubọọn̄ ya me Uwu Mbuban Okumugwem inyi mêkisa ikeek Elem,c mè Tobija, mè Jedaya, melek Yend gwun̄ kè Jefanaya. 15 Ebi ìkup me ujọn̄ọ ere mênu, mè inigọọk inama Uwu Mbuban Okumugwem. Mgbọ ya, enyi mêneniriọọn̄ ibe ke îre Okumugwem Ogwukaan̄ Inyọn̄ mè Ijọn̄ oria emi inu me lek kinyi. Inu kechi môrọ iso ire enyi isiki chieen̄ irọ inu Okumugwem Awaji kinyi obe enyi erọ.”