Emi mfọfọọk ibe, “Mmun̄ ngugọọn̄ mkpukan̄ esabe alata araran̄ irom otutuuk lek, melek ngigọ itap aran̄ me ibot ngugọọn̄ ya. Mkpukan̄ jaaba otoon̄ me inyọn̄ ngigọ ya, mkpukan̄ cha geelek îkaan̄ ujọn̄ọ ebek ere ekitap ekwut mkpukan̄ me inyọn̄ kan̄. 3 Îkaan̄ si uti olifu iba òkup me agba lek ngugọọn̄ mkpukan̄ ya, ge me agan̄ ulom, ge me agan̄ ujit.”

4 Nnenido ogwu osat ya òkitumu ikọ melek n̄a ibe, “Ogwukaan̄ n̄a, inu chi ìsibi keke?”

5 Ifọfọọk emi ibe, “Ìre òkariọọn̄ inu inu chi osibibe ni?”

Mfọfọọk ọmọ ibe, “In̄-in̄, Ogwukaan̄ n̄a, ǹkariọọn̄.”

6 Inenifọọk emi ibe, “Eyiyi ìre ikọ Okumugwem otumube inyi Jerubaben ibe ke ọmọ Okumugwem Ogwukaan̄ Inyọn̄ mè Ijọn̄ ìbe, ‘Ìkabore me unye eyi urum ene, ìkaborere si me unye oguga ebilene, ire, ìbore sa me Ekwukwu n̄a.’

7 “Kpasi ikpele ogoon̄ ke owu ore me isi kè Jerubaben? Owu môkana òla ijọn̄ ilaak akpakpa! Mgbọ ya, Jerubaben mônenitoon̄ òta ewuuk ebek uwu me lek Uwu Mbuban, ebi ene mêkekitaan̄ ukpo itumu ibe, ‘Jei, îjaan̄-o! Îjaan̄-o!’ ”

8 Ofifi etip Okumugwem onunu si inyi emi ibe: 9 “Îre Jerubaben osa ubọk kan̄ itọbọ ọdọ Uwu Mbuban yi, ubọk kan̄ si obonama isan̄a. Mgbọ ya, enyi mêneniriọọn̄ ibe ke îre Okumugwem Ogwukaan̄ Inyọn̄ mè Ijọn̄ oria emi inu me lek kinyi.

10 “Ibebene inu ikekukup kwọkọkwọkọkwọkọ, kakpọ ìlọ chieen̄. Ebi ene mênwọọn̄ unwọọn̄ mgbọ ema isimun̄ otitọ itọ-inu-itat me ubọk kè Jerubaben.

“Mkpukan̄ jaaba kechi ìre chieen̄ Okumugwem echi òkisak ikana ikikpọ otutuuk linyọn̄.”

11 Emi nnenido ogwu osat ya ibe, “Uti olifu iba òkup me agan̄ ulom mè agan̄ ujit me agba lek ngugọọn̄ ya ìsibi keke?”

12 Mkpọkpọk ido si ibe, “Agọọk uti olifu iba chi òkigwook aran̄ òbet lek alata araran̄ itap me ebek mkpukan̄ alata araran̄ iba chi ìsibi keke?”

13 Ifọfọọk ibe, “Ìre òkariọọn̄ inu inu chi osibibe ni?”

Mfọfọọk ibe, “In̄-in̄, Ogwukaan̄ n̄a, ǹkariọọn̄.”

14 Ikeya ke înibe, “Ebibi ìre ene iba etọkọbe aran̄ me ibot, ebi ìkisi ikwaan̄ inyi Ogwukaan̄ otutuuk linyọn̄.”