Ilaak ọkpọchieen̄ òso ini: Òban Awaji îbọkọ aya ofọnti
3
Ogwu osat ya onenijeen̄ emi Josuwa, ogwu òban Awaji, okekebe me isi ogwu osat Okumugwem, mè Setana me agan̄ ubọk ulom kan̄ okekebe ikitoon̄ ọmọ uraamọn. 2 Okumugwem otutumu inyi Setan ibe, “Setan, Okumugwem îgana ere inyi owu! Okumugwem ogwu ògogobo Jeruselem, îgana ere inyi owu! Me atikọ, ene yi ìkup kubọk ibot uti ukan̄ okilomo me lek eyi ejọkbe isibi me emen ukan̄.”3 Ofọnti Josuwa otapbe me lek ikeke me isi ogwu osat ya me mgbọ ya ìkup okpa okpa. 4 Ogwu osat ya obebe ebi ìkekeke me isi kan̄ cha, “Ìwọọk ofọnti okpa okpa kan̄ cha ìsan̄a.”
Inenitumu inyi Josuwa ibe, “Kpọ, mben ijo kwun̄ isan̄a, mâtap owu atalek ujuja ofọnti.”
5 Emi nnenibe, “Ìkwuun̄ ọmọ okpibot ogwu ngwugwa òtatana me ibot.” Ekwukwuun̄ ọmọ okpibot ogwu ngwugwa eyi òtatana me ibot, mè itap ọmọ ofọnti. Ogwu osat Okumugwem ya ọmọ òwa me ere ya okekebe.
6 Ogwu osat Okumugwem oneniteme Josuwa nteme ibe: 7 “Okumugwem Ogwukaan̄ Inyọn̄ mè Ijọn̄ ìtumu ibe ikeyi: ‘Ire owu môje me oniin̄ n̄a, mè ikirọ inu cha ntọbe, îre owu obokikpulu uwu n̄a, mè ikikpọ chieen̄ me lek oyet egep n̄a. Emi mâneninyi owu irek, inyi owu òkoje òkana melek ebi ìkekeke me ere yi.
8 “ ‘Josuwa, ogwu òban Awaji, gban̄ utọn̄, owu melek ebi melek kwun̄, ebi ìkwekweek irek me isi kwun̄, ìrere ebi ìkup kubọk inu ijejeen̄ eyi òbonu mgbọ òkup me isi: Ìkpọ, emi mânisa ogwu ikwaan̄ n̄a inu, ọmọ ore Agọọk ya. 9 Kpọ, omun̄ ewuuk ntobe me isi kè Josuwa! Chieen̄ jaaba okup me lek ewuuk ge ya. Mârọkọ ngwugwat me lek. Mâsa egwe ge gaalek iben ijo inu ebi lek ijọn̄ yi isan̄a. Emi Okumugwem ntumu.
10 “ ‘Me usen ya, ogwu ikup, môgwen ogwu melek kan̄ ibe inigọọk ọmọ ikweek irek me irak olik gerep kan̄ mè irak uti figi kan̄, mije, esuuk mè utelelek môkup. Emi Okumugwem ntumu.’ ”