3 Me Babilọn, mkpọmfaka ge òwa ekigwen Belu. Usen geelek ekisa akọp mè okwa akpa ekọkọk iba eyi atata kan̄, mè akọp arọọn̄ ini, mè efit iko miin̄ iba igwa ngwugwa inyi Belu. 4 Ogwu ubọọn̄ ya me lek kan̄ îmin mkpọmfaka ya, mè ikitọbọ ebum inyi usen geelek. Ire, Danien okekitọbọ ebum inyi Awaji eyi kan̄.

5 Usen ge, ogwu ubọọn̄ onenido Danien ibe, “Keke orọ òkakitọbọ ebum ìnyi Belu?”

Danien ofọfọọk ibe, “Ǹkakitọbọ ebum ìnyi mkpọmfaka ubọk ene orombe. Ǹkitọbọ ebum inyi Awaji ogwu òkup me ugwem, ogwu òrorom inyọn̄ mè ijọn̄, mè ikaan̄ unye me lek inu geelek òkup me ugwem.”

6 Ogwu ubọọn̄ obebe, “Ìre òkachieek ibe ke Belu ìre awaji òkup me ugwem ni? Ìre òkamun̄ ìkeke inu îkirie, mè ikinwọ usen geelek?”

7 Danien ochachak, mè ibe, “Jei, ogwu ubọọn̄, kachieek ibe efiaan̄ owu. Inu ya ìre ibat me agan̄ emen, mè ire ekwe me agan̄ udun̄. Ìkakirie inu geege, ìkakinwọnwọ si inu geege.”

8 Ogwu ubọọn̄ onanaan̄ ejit enenen, mè igween̄ ebi ngwugwa Belu, mè ibe ema, “Ire enyi kpetumu inyi emi ogwu òkirie otutuuk inorie chi, enyi mêkwaan̄. 9 Ire, ire enyi ijeen̄ emi ibe ke ìre Belu okirie inorie cha me atikọ, mâbe ekpan̄ Danien, mije, ìkitọ Belu ubọk me isi.”

Danien obebe, “Nchieek ubọk otumube.”

10 Ema ebi ngwugwa Belu ìre akọp ene jaaba, kpefuk ebi nwa mè ebi bọn igbaalek kiban̄. Ogwu ubọọn̄ osasa Danien isi emen uwu Belu. 11 Ebi ngwugwa Belu etutumu inyi ọmọ ibe, “Ogwu ubọọn̄, kpọ, eji mênan̄a isibi itele owu. Sa ubọk kwun̄ gaalek yik inorie, mè neen̄ miin̄ sun̄, mè tele ibe ikup. Osirọ isan̄a, owu gwuk isotu, mè gon, mè sa iman̄ òriọọn̄ kwun̄ gon kam me lek. 12 Osigwu ikom inu me ewelegwe, ire òkanimun̄ Belu oriebe otutuuk inorie cha isan̄a, ekpan̄ eji. Ire irie, Danien, ogwu òkan̄ ataak itoon̄ eji, môkwu.”

13 Ejit ebi ngwugwa cha înye, mije, ema mîsan̄a nlelet isotu ge me irak ikasi me emen uwu yọk ya. Ere keya ke ema ekije iraka inin̄ usen geelek inikirie inorie cha.

14 Mgbọ ema esibibe isan̄a, ogwu ubọọn̄ oneniyik inorie inyi Belu. Danien oraria ebi ikwaan̄ kan̄ ibe esa ntọn̄ enu. Me chieen̄ ogwu ubọọn̄, eneniben ntọn̄ cha igigen̄e igwook ichit otutuuk ijọn̄ uwu Belu ya. Ilọ me lek ogwu ubọọn̄, ofifi ene ìkamun̄ ntọn̄ ya egwookbe. Ema enenisibi me uwu ya, mè igwuk isotu, mè isa iman̄ òriọọn̄ ogwu ubọọn̄ igon ikam me lek, mè ije ifon.

15 Me eririeen̄ usen ya, ebi ngwugwa cha enunu, ike ema ekinu usen geelek, ema melek ebi nwa mè ebi bọn, mè inirie inorie cha, mè inwọ miin̄ cha geelek irak.

16 Ofit iwele kan̄, me mbat mbat egwe, ogwu ubọọn̄ onanan̄a ikeke, ọmọ melek Danien ejeje inu uwu yọk ya. 17 Ogwu ubọọn̄ obebe, “Danien, ìre iman̄ òriọọn̄ ya îbum?”

Danien ofọfọọk ibe, “Ogwu ubọọn̄, iman̄ òriọọn̄ òwa ubọk îkupbe.”

18 Igwugwuku isotu, ogwu ubọọn̄ obebene chieen̄ itoon̄ me lek ikasi ya, mè itaan̄ ukpo ibe, “Belu, owu mîmin! Owu òkakaan̄ ofiaan̄ me lek kubọk ge!”

19 Danien ochachak, mè ikwek ogwu ubọọn̄ ibe ikanin̄-nu emen uwu ya, mè ibe, “Kpọ-nu ijọn̄, mè kpọ-nu akpat ukot kechi. Ìre echi kè ekene?”

20 Ogwu ubọọn̄ obebe, “Mmun̄ akpat ukot ebirieen̄, mè echi ebibaan̄, mè echi nsabọn.” 21 Ogwu ubọọn̄ onanaan̄ ejit, mè ibe etet ebi ngwugwa cha, mè ebi nwa melek ebi bọn. Ife cha ejejeen̄ ọmọ nlelet isotu ya eyi ema ekije inin̄ emen uwu ya inirie inu òkup me inyọn̄ ikasi ya. 22 Ogwu ubọọn̄ osasa ema inyi ekpan̄, mè iyaka Belu inyi Danien. Danien ojijijaka mkpọmfaka ya, mè ijijaka si uwu kan̄.

23 Îkaan̄ mgbugbo anam ukpook ile ge me Babilọn eyi ekitọbọ ebum inyi.

24 Ogwu ubọọn̄ onenibe Danien, “Owu òkpotumu inyi emi ibe ke awaji keyi ìkakup me ugwem. Eya orọ, tọbọ ebum nyi.”

25 Danien obebe, “Ǹkitọbọ ebum inyi Okumugwem Awaji n̄a, ọmọ ore Awaji òkup me ugwem. 26 Ogwu ubọọn̄, ire onyi emi unye, mâkpan̄ ijijinu yi, m̀kpasa oge akọn̄ mè ìre m̀gbele ikpan̄.”

Ogwu ubọọn̄ obebe, “Nnyi owu unye.”

27 Danien onenimọnọ ulobo agba ofifit, mè okpọn̄, mè ijeek, igbaan̄ item, mè ibot me owut me owut isa inyi anam ukpook ya irie. Anam ya orerie, mè iwuku, mè irama ibum. Danien obebe, “Ìkpọ ma, eyi ore inu enyi ekiriaak!”

28 Mgbọ ebi Babilọn enọbe inu ya òrọrọ, ema enanaan̄ ejit enenen, mè itaka otọt ikeme ogwu ubọọn̄ ikibe, “Ogwu ubọọn̄ îkana ogwu Ju. Îjijaka Belu, mè ikpan̄ anam ukpook, mè ikpan̄ ebi ngwugwa isan̄a.” 29 Ema enenifan̄a isi lek ogwu ubọọn̄, mè ibe, “Yaka Danien tap eji me ubọk. Ire ìkare ikeya, eji mêkpan̄ owu melek otutuuk ebi uwu kwun̄ isan̄a kpai.”

30 Mgbọ ogwu ubọọn̄ omun̄be ibe ke mîtap ọmọ ikam enenen, mè itet ọmọ me unye ubọk, iyayaka Danien inyi ema.

31 Ema ebeben Danien isi itọp itap me emen okpot egbe àtat, ikukup me ere ya usen gweregwen.

32 Egbe àtat jaaba okup me emen okpot ya. Ekinyi ema ene iba mè arọọn̄ iba usen geelek etaka. Ire, kpenyi ema inu geege me emen usen gweregwen ya, inyi ema ekalọlọ itataka Danien.

33 Me ike mgbọ ya, ogwu nriran Abakuk ọmọ òwa me Judia. Îkala ngọdi, mè isek fituru itaak me efeek usun̄, mè isa ikije ibosa ijet ebi ìkirọkọ uko kan̄.

34 Ire, ogwu osat Okumugwem ge onenitumu inyi ọmọ ibe, “Sa inorie obenbe ya si Babilọn, sa si nyi Danien me emen okpot egbe àtat.”

35 Abakuk obebe, “Ogwu nte, ǹkararak ìmun̄ Babilọn, ǹkariọọn̄ si inu geege ofolek okpot egbe àtat.”

36 Ogwu osat ya otetet ọmọ me lek ijeek me eden̄ ibot, mè iben ọmọ isa isi Babilọn, sa me ikpele unye efet, mè isa ọmọ isi iyik me agba otu okpot egbe àtat ya. 37 Abakuk otataan̄ ukpo igwen Danien ibe, “Danien, Danien! Bọkọ inorie Awaji oriabe ijet owu.”

38 Danien onenibe, “Jei Awaji, owu okeek emi. Owu òkakitele ebi ìmama owu.” 39 Inanan̄a ikeke, mè irie inorie ya. Ogwu osat Awaji ya oyayaka iben Abakuk mgbọ yaage isa ifo ere înan̄abe.

40 Me òso usen jaaba, ogwu ubọọn̄ onunu ibonito ito inyi Danien. Ire, mgbọ îrebe, mè itaak chieen̄ ikpọ emen okpot ya, imumun̄ Danien okweekbe irek. 41 Itataan̄ ukpo ibe, “Jei Okumugwem, Awaji kè Danien, owu omin enenen! Kpunu ofifi awaji, ilọ me lek kwun̄!”

42 Isasan̄a Danien isibi me emen okpot ya, mè itọọn̄ ebi ife cha, ebi ìweweek ikpakpan̄ Danien, itaak me emen okpot egbe àtat ya me useen̄. Mgbọ yaage, me isi kan̄, ogwu ubọọn̄, ebi kè egbe àtat cha egwagwak ife cha itaka isan̄a kpai.