4 Jowakim ogwu olom îbọọn̄ ubọọn̄ enenen, mè ikaan̄ uko me agba lek uwu kan̄. Ebi Ju ekekinu lek kan̄ mgbọ geelek, mije, ọmọ ìre ogwu ekimin enenen igak otutuuk ebi Ju me ama ya.

5 Me acha ya, enenigobo ebi ugane iba me etete ebi Ju isa irọ ebi oyerebet. Okumugwem îwuuk lek itumu ikọ ofolek kiban̄ ibe, “Irọrọ ikpak înin̄ me Babilọn, ìje me lek ebi ugane ebi oyerebet ebi ekikpọ chieen̄ ibe mêkikpulu ebi ene me unen oniin̄.”

6 Owuwa mgbọ ife chi ekikup me uwu kè Jowakim, otutuuk ebi geelek ìkakaan̄ oyerebet mîra ikisa inu me lek kiban̄. 7 Ebi ene isifon isan̄a me ikarek, Susana îra isi emen uko ogwu olom isi ikije ikana. 8 Ebi ugane iba chi ekekimun̄ ọmọ usen geelek okije ikana me emen uko ya, mè ibene ikikaan̄ ulọk me lek kan̄. 9 Ejit kiban̄ ofififila, ema kpeyaka ikitap lek ibene chieen̄ ikpọ inyọn̄ iriaak uriaak, kpeyaka ikikekeek si unen oyerebet eyi ikwaan̄ kiban̄ odobe. 10 Ema ene iba ebebene ikikaan̄ ikpele ulọk me lek kan̄, ire, ge ìkakpa ufiak òkifiak ọmọ ìnyi ge. 11 Mije, îtet ema esip ikpakpa ulọk ilaak ema ekaan̄be me lek ogwu enenwaan̄ ya isibi. 12 Ema ekekichieek mkpa ikigwuun̄ chieen̄ ikikpọ ọmọ usen geelek.

13 Usen ge, me ejit ikarek, ema enenibe, “Eji enefo uwu kiji, ke mgbọ inorie ikarek îkem.” 14 Ema ejeje ifon inin̄ esese esese oniin̄ kiban̄. Ire, ema ene iba egwugwu ikom, kpa ogwu me esese oniin̄ kan̄, mè iyaka ikpọk inu emen uko ya, mè inigbaan̄ ichichini. Ene ge ododo ogwulọ ibe ìre keke osa ogwa igwu ikom inu, ogwa si ododo ogwu melek kan̄ ikọ yaage. Ema ekpọkpọ ikido lek kiban̄ ikọ ya, mege, iyọyọt igak ema itutumu. Me òta kan̄, ema enenikpọk mbum inyi lek kiban̄ ibe ke ìre ulọk ilaak melek ogwu enenwaan̄ ya osa ema igwu ikom inu. Mije keya, ema enenigbaan̄ itọt otitọt ikpọ mgbọ ogwu enenwaan̄ ya môkupbe ọmọ gaalek.

15 Ema ekekikup ikpọ mgbọ môtatbe. Usen ge, Susana onunu kubọk îkinu, mè isa ebi usun̄ ebibaan̄ kan̄ iba gaalek igbaalek inu. Ere îyok me lek usen ya, ibebe ke ọmọ môken mun̄. 16 Kpunu ene geege me ere ya, ilọ me lek ebi ugane iba cha ìlelet, mè inween̄ lek ikikpọ ọmọ. 17 Inenibe ebi usun̄ kan̄ cha, “Ìsa aran̄ ikeken, mè echi utop olu ìjet emi, mè ìgwuk isotu uko, inyi ǹken mun̄.” 18 Nsabọn ibaan̄ cha erọrọ ike ibe ema erọ. Ema egwugwuk isotu uko ya, mè ije itibi me gwun̄ oniin̄ ge òkup me agba isibi ifo uwu, ibesi isa inu îdobe cha inu. Ema kpemun̄ ebi ugane cha, mije, ife cha elelet.

19 Mgbọ yaage ebi usun̄ ebibaan̄ cha erakbe ukot inan̄a isibi, ebi ugane iba cha enanan̄a isibi ilibi inin̄ lek kè Susana, 20 mè ibe ọmọ, “Kpọ, mîgwuk isotu uko, kpunu ogwu òbomun̄ eji. Îlọk eji enenen igọgọọk owu ilaak. Chieek, mè gọọk eji laak. 21 Ire ojit, eji mêkeke ata-ikọ ikeme owu, ibe ke gwun̄ enerieen̄ ge melek kwun̄ ekup, ke eya ke obak me lek ibe ebi usun̄ kwun̄ ebibaan̄ enan̄a esibi.”

22 Susana ogwugwuku mfi igwook, mè ibe, “Nnin̄ emen ufe. Ire nchieek, mkpa okup inyi emi. Ire njit, m̀kpanwọnwọnọ si me ubọk kinyi. 23 Eya orọ, mma ijijit enyi, mè irọn̄ inin̄ ubọk kinyi me nkarọge inu geege ìlọ, igak irọrọ ijo inu me isi Okumugwem.” 24 Ibebene ikitaan̄ ukpo unye unye. Ebi ugane iba cha ebebene ikitaan̄ si ukpo ikitumu ikọ itoon̄ ọmọ. 25 Ene ge me lek kiban̄ olilibi isi igwuku isotu uko ya.

26 Mgbọ yaage ebi ikwaan̄ uwu kan̄ enọbe ida ukpo ya me emen uko ya, ema elilibi itibi gwun̄ oniin̄ ya okup me agba ibenikpọ inu òrọrọ ọmọ. 27 Ebi ugane iba cha ebeben ukpatu kiban̄ ikpa ijeen̄ ebi ikwaan̄ cha. Mgbọ ebi ikwaan̄ cha enọbe ikọ ya, îyọt me lek kiban̄ enenen, mije, kperarak itumu ojelek ikọ òkup ikeyi ibak Susana.

28 Ofit iwele kan̄, ebi ene etititiin̄ me uwu kè Jowakim ogwu olom. Ebi ugane iba cha enunu, mè iben me ejit isasa Susana inyi ekpan̄ me useen̄ ikachieekge ilaak ìnyi ema. 29 Me isi ebi ene cha, ema ebebe, “Ìria ene ibe esa Susana gwun̄ kè Ilikiya, òrere nwa kè Jowakim enu.” Mgbọ etip orebe lek, 30 inunu, ọmọ melek nte kan̄ mè nga kan̄, mè bọn kan̄, mè otutuuk bọn ulọk kan̄.

31 Susana ìre enenwaan̄ òriọọn̄ lek, mè ijaan̄ uja enenen. 32 Îsa ekwut ichit-isi ichit isi kan̄. Ire, ebi ikpak chi ebebe esan̄a ekwut ya esan̄a me isi kan̄. Erọ ikeya, inyi ema ekpọ uja kan̄ ejot. 33 Otutuuk ebi kan̄ mè ebi unene kan̄, mè ebi geelek ìmumun̄ ọmọ, ekekito ito.

34 Ebi ugane iba cha enanan̄a ikeke me isi otutuuk ene, mè itoon̄ ubọk kiban̄ me ibot kan̄. 35 Susana osasa ito me chieen̄ ibene chieen̄ ikpọ inyọn̄, mije, ìsa Okumugwem itoon̄ ejit. 36 Ebi ugane cha ebebene ikitumu ibe, “Mgbọ eji gaalek ekije me emen uko, ogwu enenwaan̄ yi onunu, ọmọ mè ebi usun̄ kan̄ ebibaan̄ iba. Inenigon isotu uko ya, mè ibe ebi ikwaan̄ cha esibi. 37 Gwun̄ enerieen̄ ge òlelet me ere ya, onanan̄a isibi, mè ije inu, mè inigọọk ọmọ ilaak. 38 Eji ekukup me agba agan̄ ge me emen uko ya imun̄ inu ikpak ya, mè ilibi inin̄ lek kiban̄. 39 Eji mîtoon̄ me lek kiban̄ me irek, ire, eji kpekọt itet ogwu enerieen̄ ya, mije înyebe lek igak eji. Igwugwuku isotu, mè ilibi inwọnọ. 40 Ire, eji ekọkọt itet ogwu enenwaan̄ yi, mè ido ọmọ ogwu gwun̄ enerieen̄ ya orebe. Ijijit itutumu inyi eji. Ata-ikọ eji ekekebe ire ya.”

41 Mije ema erebe ebi ugane ama, mè ire si ebi oyerebet, ebi ìtititiin̄ me ere ya echechieek ikọ kiban̄, mè itip Susana oyerebet mkpa.

42 Susana otataan̄ ukpo ibene ida enenen itumu ibe “Jei, Awaji ogwu òkukup ire mgbọ geelek, owu oriọọn̄ otutuuk nlelet inu geelek, owu oriọọn̄ si inu geelek òborọrọ, sabum inu ya ònorọ. 43 Owu oriọọn̄ ibe ke ife chi ekeke ata-ikọ ataak ikeme emi. Mgbọ keyi, mânikwu mkpa! Ire, otutuuk inu ikpak chi ema etumube itoon̄ emi, kpunu eyi nrọbe!”

44 Okumugwem onọnọ ida ito kan̄. 45 Mgbọ ekisa ọmọ ije ibe si ikpan̄, Awaji ojijibi Ekwukwu Mbuban ibene me emen sọn̄ gwun̄ enerieen̄ ge, ekigwen Danien. 46 Gwun̄ enerieen̄ ya otataan̄ ukpo ibe, “Ubọk n̄a kpunu me lek mkpa ogwu enenwaan̄ yi-o!”

47 Otutuuk ene ekakana isi ikpọ Danien, mè ibe, “Keke ke okitutumu?”

48 Danien okekeke me eden̄ urum ene ya ifọọk ibe, “Bọn ebi Ijeren, ìre enyi ebubut ikeyi? Enyi ekpọkpọ itip enenwaan̄ Ijeren oyerebet, enyi kpedodo otu kan̄, kpeweweek emen ikọ imun̄! 49 Ìgwu ìkom ìfo ere oyerebet. Ife chi mîkeke ata-ikọ ataak ikeme ogwu enenwaan̄ yi.”

50 Otutuuk ene egwagwat lek igwu ikom. Ebi ugane ebebe Danien, “Na gọọk eji kweek irek, mè bak ibot ikọ kwun̄ nyi eji, mije, Awaji înyi owu unen ibe owu òkweek irek me etete ebi ugane.”

51 Danien obebe, “Ìsun̄ ebi ugane iba cha esese, ìda ge ìbọkọ me lek ge, inyi ǹdo ema ikọ.” 52 Mgbọ esun̄be ema ida ibọkọ, Danien ogwegwen ene ge kiban̄ inu me lek kan̄, mè ibe, “Owu òkup me emen inu ikpak inin̄ ugane. Mgbọ keyi, ijo inu cha orọbe mgbọ òraraka îsibi owu me lek. 53 Owu òkisibi nlilọ oyerebet, ogwu ìkarọ ìlọ ke owu okitip oyerebet, mè ikifieek oyerebet inwọn ogwu òrọrọ ilọ, inyi ije ifo me utelelek, me ere Okumugwem obe, ‘Kafieek oyerebet ibe ekpan̄ ogwu ìkalọ ikan mè ogwu ata irọrọ.’ 54 Mgbọ yi, ire owu omun̄ enenwaan̄ yi melek gwun̄ enerieen̄ ya ekilaak me atikọ, tumu-nu nyi emi, ìre irak uti eyi owa ke otet ema ekilaak?”

Ifọfọọk ibe, “Me irak uti mgbugbe.”

55 Danien obebe ọmọ, “Ọmọ ire eya! Ataak kwun̄ îkana itoon̄ owu me ibot. Ogwu osat Awaji îbọkọ itip-oyerebet kwun̄ me ubọk Awaji, ìbokekep owu ifieek iba.”

56 Ibebe esa ogwa eje, mè esa ogwulọ enu. Inenibe ogwa, “Owu gwun̄ owot iman ebi Kenan keyi, owu òkare ogwu owot iman ebi Juda! Uja îfiat owu ibot, ulọk ilaak îtọp ejit kwun̄ ifiin̄! 57 Ubọk enyi ene iba ekirọ ire eyi me lek ebibaan̄ Ijeren, ema mîra ikifieek owot, mè ikichieek inyi enyi. Ire, ogwu enenwaan̄ Juda ìkpokọt ibọkọ inu ikpak kinyi itap. 58 Mgbọ keyi, tumu nyi emi-nu, ìre irak uti eyi owa ke otet ema ekigbaan̄ ilaak?”

Ifọfọọk ibe, “Me irak uti ilip ile ge.”

59 Danien obebe ọmọ, “Ọmọ ire eya! Owu si, ataak kwun̄ îkana itoon̄ owu me ibot. Mije, ogwu osat Awaji ìkikukup iban owu, melek oge akọn̄ me ubọk, ìbofefieek owu irek iba, mè igbaan̄ enyi ene iba ijijaka.”

60 Otutuuk ebi ìtititiin̄ me ere ya etataan̄ ukpo itọn̄ Awaji, ogwu òkinyan̄a ebi ìtotoon̄ ọmọ ejit me lek. 61 Ema eyayaka isi kiban̄ ida ebi ugane iba cha, ebi Danien osabe me otu kiban̄ gaalek itip ema oyerebet mije ata-ikọ ataak ema ekekebe. 62 Erọrọ ema inu ikpak ya, eyi ema etọtbe irọrọ ogwu melek kiban̄, igọọk me lek Ikan Mosis onyibe. Ekpakpan̄ ema, mè isa me ikeya inyan̄a ugwem ogwu enenwaan̄ ikalọge ikan me usen ya.

63 Ilikiya mè ogwu nwa etọtọn̄ Awaji me ibot kè Susana gwun̄ kiban̄ enenwaan̄. Ikeya si ke Jowakim mè otutuuk bọn ulọk kè Susana etọn̄ Awaji, mije, mîmun̄ ibe ke Susana ìkarọ inu esip ya.

64 Bene me usen ya nyi isi, Danien okekitaan̄ etip me etete ebi ene.