4 Ogwu òkilook etip onenisa unye ida ikilook otutuuk ene ibe, “Enyi otutuuk ebi ife geelek, mè ebi otutuuk ido geelek, mè ebi otutuuk otu usem geelek, ìgban̄ utọn̄, mè ìtet ibot me lek ikan ogwu ubọọn̄! 5 Mgbọ geelek enyi isinọ ida otita, mè odu, mè uneen̄ isi ita, mè uneen̄ ile, mè uneen̄ ija, mè oduk, mè esese ida nkwukwak ekigbaan̄ itaan̄, enyi otutuuk ene mêgele igwook me ijọn̄, mè itọbọ ebum inyi mkpọmfaka alata araran̄ yi ogwu ubọọn̄ Nebukadineja orombe. 6 Ene geelek ogwu ìkagele ìgwook me ijọn̄, mè ìtọbọ ebum ìnyi mkpọmfaka yi, ebetọtọp ene ya mgbọ yaage itap me emen orioon̄ ukan̄, eyi unye ukan̄ okisak me emen.”

7 Eya orọ, mgbọ yaage otutuuk ene enọbe ida otita, mè odu, mè uneen̄ isi ita, mè uneen̄ ile, mè uneen̄ ija, mè esese ida nkwukwak ekigbaan̄ itaan̄, otutuuk ebi ife geelek, mè ido geelek, mè ebi otu usem geelek, egegele igwook me ijọn̄, mè itọbọ ebum inyi mkpọmfaka alata araran̄ ya ogwu ubọọn̄ Nebukadineja orombe.

8 Me ike mgbọ ya, usini ebi ìkisa ntoronyan̄ ido ido-inu enunu ibenitumu ikọ ikeme ebi Ju. 9 Ema enenitumu inyi ogwu ubọọn̄ Nebukadineja ibe, “Ogwu ubọọn̄ luk ujọn̄ọ ugwem! 10 Ogwu ubọọn̄, îre owu otap ikan ibe, ogwu geelek ònọnọ ida otita, mè odu, mè uneen̄ isi ita, mè uneen̄ ile, mè uneen̄ ija, mè oduk, mè esese ida nkwukwak ekigbaan̄ itaan̄, ene ya igele igwook me ijọn̄, mè itọbọ ebum inyi mkpọmfaka alata araran̄ ya, 11 ogwu geelek ikagelege ìgwook me ijọn̄, mè ìtọbọ ebum ìnyi, ke ebetọtọp ene ya mgbọ yaage itap me emen orioon̄ ukan̄, eyi unye ukan̄ okisak me emen. 12 Ire, îkaan̄ usini ebi Ju ebi owu otobe me ibot ikwaan̄ me agan̄ Babilọn, ebi ìkikpọ owu, ogwu ubọọn̄, isiki chieen̄. Ema kpekisi ikwaan̄ inyi ebi kè awaji kwun̄ geege, kpekitọtọbọ si ebum inyi mkpọmfaka ya owu orombe. Ema ìre Sedarak mè Mesak mè Abedinego.”

13 Ogwu ubọọn̄ Nebukadineja onanaan̄ ejit enenen, mè iria etip igwen Sedarak mè Mesak mè Abedinego. Esasa ebirieen̄ ita chi inu me isi ogwu ubọọn̄. 14 Nebukadineja onenido ema ibe, “Sedarak mè Mesak mè Abedinego, ìre atikọ ibe ke enyi kpekisi ikwaan̄ inyi ebi kè awaji n̄a, ke enyi kpekitọbọ si ebum inyi mkpọmfaka alata araran̄ ya nrombe? 15 Mgbọ keyi, enyi isinọ ida otita, mè odu, mè uneen̄ isi ita, mè uneen̄ ile, mè uneen̄ ija, mè oduk, mè esese ida nkwukwak ekigbaan̄ itaan̄, ire enyi ichieek igegele igwook me ijọn̄ itọbọ ebum inyi mkpọmfaka ya nrọbe, mônwọn. Ire, ire enyi kpetọbọ ebum inyi mkpọmfaka ya, ebetọtọọn̄ enyi mgbọ yaage igwook me emen orioon̄ ukan̄, eyi unye ukan̄ okisak me emen. Mgbọ ya, mâkpọ-nu, mè ìre kpasi awaji obokọt inyan̄a enyi isibi me ubọk n̄a.”

16 Sedarak mè Mesak mè Abedinego efọfọọk ogwu ubọọn̄ ibe, “Ogwu ubọọn̄ Nebukadineja, ire me lek ikọ keyi, ìkakup me uyọt ibe eji etumu ikọ geege esa enyan̄a lek kiji me isi kwun̄. 17 Ire owu otọọn̄ eji igwook me emen orioon̄ ukan̄, eyi unye ukan̄ okisak me emen, Awaji ogwu eji ekisi ikwaan̄ inyi môkọt inyan̄a eji isibi me emen, mè inyan̄a si eji isibi me ubọk kwun̄. 18 Ire, ikerere ibe ke Awaji kiji ìkanyan̄a eji ìsibi, eji ekiweek ibe owu ogwu ubọọn̄ òriọọn̄ ibe ke eji kpebesi ikwaan̄ inyi ebi kè awaji kwun̄ cha, eji kpebetọtọbọ si ebum inyi mkpọmfaka alata araran̄ ya owu orombe.”

19 Nebukadineja onanaan̄ ejit enenen inyi Sedarak mè Mesak mè Abedinego, mè inwene ejit me lek kiban̄, mè ininyi ida ibe erọ inyi ukan̄ emen orioon̄ ya iyok mgbọ jaaba igak ike îwuukbe lek ikup. 20 Ineninyi ida ibe usini me lek ebi akọn̄ kan̄ ebi ìnyenye lek etet Sedarak mè Mesak mè Abedinego ebọp, mè eben ema etọọn̄ egwook me emen orioon̄ ukan̄ ya, eyi unye ukan̄ okisak me emen. 21 Mgbọ yaage, etetet ebirieen̄ ita cha ibọp, melek ofọnti me lek, mè ekwut edim ujọn̄ọ ukot, mè ekwut ifiaka ibot, mè ofifi inu nken ema esabe ibala lek, mè iben ema itọọn̄ igwook me emen orioon̄ ukan̄ ya, eyi unye ukan̄ okisak me emen. 22 Mije ikan ogwu ubọọn̄ ya okupbe ugwat ugwat, melek ukan̄ ya omabe lek iyok enenen, alọm ukan̄ ònan̄a me emen orioon̄ ukan̄ ya okpakpam itaka ebi akọn̄ cha ebi ìbeben Sedarak mè Mesak mè Abedinego ikpan̄ isan̄a. 23 Ikeya ke etọọn̄ Sedarak mè Mesak mè Abedinego igwook me emen orioon̄ ukan̄ ya, eyi unye ukan̄ okisak me emen. Ike ebọpbe ema ikam, ikeya ke ema erurọn̄ọ me emen ukan̄ ya.

24 Ananiya mè Misayen mè Ajariya ekekije ikana emen ukan̄ ya, mè ikikọt okwa inyi Awaji, mè ikitọn̄ Okumugwem. 25 Ajariya onenikeke me ejit ukan̄ ya, mè ibene uriaak ikibe: 26 “Jei Okumugwem, Awaji ebi nte nte kiji, otutuuk umin mè itọn̄ ikup inyi owu, kè erieen̄ kwun̄ ikup me mgbugbo ire mgbọ geelek. 27 Inu geelek orọbe eji, ìnenen. Otutuuk ikwaan̄ kwun̄ geelek ìre ikwaan̄ atikọ, otutuuk oniin̄ kwun̄ geelek ìtatat, otutuuk oyerebet kwun̄ geelek ìkikekeke. 28 Oyerebet kwun̄ ìnenen me lek otutuuk ùrioon̄ osabe initoon̄ eji, mè itoon̄ Jeruselem, ama mbuban ebi nte nte kiji. Mije, inu chi owu orọbe eji bak me lek ijo inu kiji, îre me atikọ, mè unen. 29 Iin̄, eji mîrọ ilọ, mè irọn̄ ikan sa me itetele owu. Eji mîrọ ijo inu òfefieek lek enenen. Eji kpesun̄ Ikan kwun̄. 30 Eji kperọ orọmijọn̄ onyibe eji me ikan, eji kpesusun̄ si ikan cha geege, kubọk obe eji erọ, ufuna inu inwọn eji me lek. 31 Eya orọ, ùrioon̄ geelek osabe initoon̄ eji, otutuuk inu geelek orọbe eji, ìnenen ubọk owu orọbe. 32 Owu oyaka eji itap me ubọk ebi ochicha kiji, ebi kperọriọọn̄ ikan, ebi ìfefieek ichit me lek ebi kperiọọn̄ owu. Owu osa eji inyi ijo ogwu ubọọn̄, ogwu òfefieek ichit me otutuuk linyọn̄. 33 Mgbọ keyi, eji kpeyaka ikọt ikama otu. Eji ebi ikwaan̄ kwun̄ ìkitọbọ ebum inyi owu, mîkana ebi esip mè ochak.

34 “Bak me lek erieen̄ kwun̄, soso, kajit eji ìtele ìre mgbọ geelek, kachaka inyan̄a-ibot kwun̄ onyan̄abe melek kiji. 35 Kasan̄a ejit nsan kwun̄ me lek kiji, bak me lek kè Ebereyam, ogwu owu omabe, mè Ajiki, gwun̄ ikwaan̄ kwun̄, melek kè Ijeren ogwu eyi kwun̄ òkup mbuban, 36 ebi owu ochieekbe use ibe ke owot iman kiban̄ môwa kubọk ntoronyan̄ me akpa inyọn̄, mè nkwukwuuk achiaan̄ me agba awaji. 37 Jei Okumugwem, mgbọ keyi, eji ese ichit me etete otutuuk ido me linyọn̄, mîgele eji isiki me otutuuk linyọn̄ chereyi, mije ijo inu kiji. 38 Mgbọ keyi, eji kpekaan̄ ubọọn̄, mè ogwu nriran, mè ogwu isi. Kpunu ngwugwa ewọwọp, mè ngwugwa kechilọ, mè inyinyi ata ejit, mè ngwugwa nsensi, kpunu ere ebegwa ngwugwa geege isa ikaan̄ nsan kwun̄. 39 Ire, ejit ogwu ijo kan̄ otetbe lek, ogwu ekwukwu kan̄ ogelebe igwook inyi owu, soso, bọkọ tap, kubọk ìre ngwugwa orie arọọn̄ mè orie eriembuuk ewọwọp, kubọk obop obop bọn arọọn̄ egwookbe imiin̄. 40 Tele ibe ngwugwa kiji ikup ikeya chereyi me isi kwun̄, inyi eji esa me otutuuk ejit kiji egọọk owu, mije, ebi geelek ìtotoon̄ owu ejit me lek kpekibọkọ esip. 41 Mgbọ keyi, eji ekisa otutuuk ejit kiji igọọk owu, mè ikitet ukpook kwun̄, mè ikiweek owu. 42 Kachieek ibe esip itet eji. Ire, rọ eji inu me lek ususuk, mè rọ kpọ me ubọk nsan kwun̄ ominbe. 43 Jei Okumugwem, rọ uyeke inu kwun̄ sa nyan̄a eji, mè bọkọ itọn̄ nyi erieen̄ kwun̄. 44 Tap esip me isi ebi ìtap ebi ikwaan̄ kwun̄ unan me lek. Rọ ema inu ochak, mè bọkọ otutuuk unye san̄a ema me ubọk, mè faan̄ ema otu ukwuuk kiban̄. 45 Rọ inyi ema eriọọn̄ ibe ke owu ore Okumugwem, ke owu gaalek ore Awaji, ogwu ujamgbugbo kan̄ osobe otutuuk linyọn̄.”

46 Otutuuk mgbọ ya, ebi ikwaan̄ ogwu ubọọn̄, ebi ìtọtọp ebirieen̄ ita cha itap me emen ukan̄ ya, ekpọkpọ ikitaak aran̄, mè agba, mè uti fàlâs, mè nkirika, me emen unye ukan̄ ya. 47 Ukan̄ ya îlomo ibene iso akọp mè ejit iba mè mgbidim ibene isaba iraka inyọn̄ orioon̄ ukan̄ ya, 48 mè ilomo iyat isibi, mè itaka ebi Kalidia ìkekeke ikana lek orioon̄ ukan̄ ya ikpan̄.

49 Ire, ogwu osat Okumugwem ge ogegele isibi inu me emen ukan̄ ya inikup melek kè Ajariya mè ebi melek kan̄, mè ibieen̄ alọm ukan̄ ya isan̄a isibi me emen orioon̄ ukan̄ ya, 50 mè inirọ ibe emen orioon̄ ukan̄ ya itọọk ikup kubọk ofiik òbet lek eyi efet mè mbat. Sa me ikeya, ukan̄ ya ìkare ema lek kubọk ge, ìkasak ema unan geege me lek, ìkatatap si ema ufialek geege me lek.

51 Ema ene ita enenikigbaan̄ ikọt okwa isa ikitọn̄ Awaji, mè ikisa imin ọmọ me emen ukan̄ ikibe:

91 (24)^a Ire, me ekakpọge chieen̄, ogwu ubọọn̄ Nebukadineja oririki, mè inan̄a ikeke jîp, mè ikido ebi nteme kan̄ ibe, “Ìre ìkare ebirieen̄ ita ke ebọp ikam, mè iben itọọn̄ igwook me emen ukan̄?”

Ema efọfọọk ibe, “Ogwu ubọọn̄, me atikọ, îre ene ita.”

92 (25) Nebukadineja obebe ema, “Ìkpọ! Ǹkimun̄ ebirieen̄ ini ekije ikana me emen ukan̄ ya, kpebọbọp, unan geege si ìkasak ema me lek. Ògak ge, ogwu òso ene ini ya ìyaka inibet lek gwun̄ ebi kè awaji.”

93 (26) Nebukadineja ojeje isi otu isotu orioon̄ ukan̄ ya, eyi unye ukan̄ okisak me emen, mè itaan̄ ukpo igwen, “Sedarak mè Mesak mè Abedinego, ebi ikwaan̄ Awaji Ogwu Òbebene Ichit, ìnan̄a ìsibi! Ìje ìsibi ìna!”

Sedarak mè Mesak mè Abedinego enanan̄a me emen ukan̄ ya ije isibi inu. 94 (27) Mgbọ yaage, ebi ibot mkpulu ido, mè ebi ibot mkpulu agan̄, mè ebi ibot otu agọọk, mè ebi nteme ogwu ubọọn̄ enunu inigban ikana ema. Emumun̄ ibe ke ukan̄ ya ìkatap ema unan geege me akpalek. Ijeek ibot kiban̄, ukut ge ikeyi, ukan̄ ìkare lek. Ofọnti òkup ema me lek, ukan̄ ìkare lek kubọk ge. Olu oduku geege ìkadun̄u me lek kiban̄.

95 (28) Nebukadineja onenitumu ibe ikeyi, “Itọn̄ ikup inyi Awaji kè Sedarak mè Mesak mè Abedinego, ogwu òraria ogwu osat kan̄ ibe ininyan̄a ebi ikwaan̄ kan̄ isibi! Ema mîtoon̄ ejit me lek kan̄, mè ikpaka ibot me lek ikan ogwu ubọọn̄. Ema mîchieek ikwakwaan̄ mkpa, kpan̄asi ema ebesi ikwaan̄ mè itọbọ ebum inyi ofifi awaji geelek, ilọ me lek Awaji kiban̄ gaalek. 96 (29) Eya orọ, emi ogwu ubọọn̄ nkinyi ikan ibe, ebi ido geelek, mè ìre ebi otu usem geelek ìtutumu ijo ikọ ge ikeyi ibak Awaji kè Sedarak mè Mesak mè Abedinego, ebabak ife cha okpọkọ okpọkọ, mè egbugbọ uwu kiban̄ egwook me ijọn̄, inyi ikana ǹrioon̄, mije, kpunu ofifi awaji geege òbokọt inyan̄a ene ikeyi.”

97 (30) Ogwu ubọọn̄ onenibene Sedarak mè Mesak mè Abedinego ito me ubene ubene irek me agan̄ Babilọn.

98 (31) Îre emi ogwu ubọọn̄ Nebukadineja nkige ikpa keyi ijet otutuuk ebi ife geelek, mè ebi ido geelek, mè ebi otu usem geelek, ebi ìluk me ere geelek me linyọn̄:

Esuuk mè ibọbọọn̄ ubọọn̄ ikup inyi enyi otutuuk!