4 Ebi ìkisa ntoronyan̄ ido ido-inu cha enenifọọk me usem Aram ibe, “Ogwu ubọọn̄, luk ujọn̄ọ ugwem! Kpa ilaak omun̄be nyi eji ebi usun̄ kwun̄, ke eji mêbum ibot inyi owu.”

5 Ogwu ubọọn̄ ofọfọọk ebi ìkisa ntoronyan̄ ido ido-inu cha ibe, “In̄-in̄, nra itumu ifieek me ejit n̄a. Ire enyi kpekpa ilaak ya mmun̄be, mè ìbum ibot ìnyi emi, m̀banyinyi ida ibe etet enyi me ògat ugwem egwak okpọkọ okpọkọ, mè egbugbọ uwu kinyi egwook, inyi ikana ǹrioon̄. 6 Ire, ire enyi ikpa ilaak ya inyi emi, mè ibum ibot inu îsibibe, mânyi enyi owuwa inyinyi, mè inyi enyi ikpele umin. Eya orọ, ìkpa ilaak ya mmun̄be ìnyi emi, mè ìbum ibot kan̄ si ìnyi emi.”

7 Ema ekpọkpọk ifọọk si ibe, “Ogwu ubọọn̄, nye lek kpa ilaak ya omun̄be nyi eji ebi usun̄ kwun̄, ke eji mêbum ibot.”

8 Ogwu ubọọn̄ onenibe ema, “Mgbọ keyi, îbook emi chieen̄ ibe ke enyi ekiweek inyi mgbọ ikije, mije, enyi mîriọọn̄ ibe ke m̀barọrọ ekiket n̄a. 9 Ire enyi kpekpa ilaak ya inyi emi, itip-oyerebet gaalek okup inyi enyi. Enyi mîtọt isan̄a itutumu ataak ataak ikọ mè wọlọwọlọ ikọ inyi emi, mè ikikeek ibe, sọnja mgbọ, ke inu mônwene. Eya orọ, ìkpa ilaak mmun̄be ìnyi emi, inyi mâsa me ikeya iriọọn̄ ibe ke enyi mêkọt ibum ibot ilaak ya inyi emi.”

10 Ebi ìkisa ntoronyan̄ ido ido-inu cha enenifọọk ogwu ubọọn̄ ibe, “Kpunu ogwu ebilene geege me otutuuk linyọn̄ òbokọt irọ inu yi ogwu ubọọn̄ okido ibe eji erọ! Ikeya si, kpunu ogwu ubọọn̄ geege òrarak ido ebi ìkiroon̄ nriroon̄, mè ebi ìkitet ǹcha, mè ebi ìkisa ntoronyan̄ ido ido-inu ibe erọ ojelek inu òkup ikeyi, ike geelek ogwu ubọọn̄ keya osabe imin me irek mè ikaan̄ unye iyaka. 11 Inu yi ogwu ubọọn̄ okido îyọt enenen. Kpunu ogwu ebilene geege òbokọt ikpọk mbum inu yi inyi ogwu ubọọn̄, îtata ebi kè awaji gaalek. Ebi kè awaji cha si kpekiluk me etete ebilene.”

12 Mije ufọọk-otu kiban̄, ogwu ubọọn̄ onanaan̄ ejit enenen, mè inyi ida, ibe ekpan̄ otutuuk ebi ìriọọn̄ inu ìkup me ido Babilọn. 13 Egege ida ikan ya itap me ikpa, mè ichon ikana ere, ibe ekpan̄ ebi ìriọọn̄ inu, mè iniria ebi ene isibi si ibe esi eweek Danien mè ebi unene kan̄, mè ekpan̄ si ema.

14 Mgbọ Ariọk ogwu ibot ebi ìkibem ogwu ubọọn̄ onan̄abe ije ibosi ikpan̄ ebi ìriọọn̄ inu me Babilọn, Danien onenitumu ikọ melek kan̄ me iriọọn̄-inu mè iriọọn̄-lek. 15 Danien ododo Ariọk ogwu ibot ikwaan̄ ogwu ubọọn̄ ibe, “Ìre keke orọ mè ogwu ubọọn̄ igwat lek itap ojelek ikan òkup gban̄n̄ ikeyi?” Ariọk onenikpa inu ya òrọrọ inyi Danien. 16 Danien inọnọ ibot ikọ ya, ininin̄ isi lek ogwu ubọọn̄, mè isi ibeek ibe inye lek inyi ọmọ mgbọ, ke ọmọ môbum ibot ilaak ya inyi ogwugwu.

17 Danien ogwugwu ikom ifo uwu kan̄, mè iben inu ya ikpa inyi ebi unene kan̄ Ananiya, mè Misayen, mè Ajariya, 18 mè ibe ema etet lek enye ebeek nsan me ubọk Awaji òkup me inyọn̄, inyi ichili nlelet inu yi ijeen̄ ema, inyi ekakpan̄ ọmọ melek ebi unene kan̄ ìgbaalek ebi ìriọọn̄ inu Babilọn kechilọ. 19 Me ejit eririeen̄, enenichili nlelet inu ya ijeen̄ Danien me emen ilaak ọkpọchieen̄. Danien otọtọn̄ Awaji òkup me inyọn̄, 20 ibe,

24 Danien onenisi imun̄ Ariọk, ogwu ogwu ubọọn̄ otobe ibe ikpan̄ ebi ìriọọn̄ inu Babilọn, mè initumu inyi ibe, “Kakpan̄ ene geege me lek ebi ìriọọn̄ inu Babilọn. Sa emi si me isi ogwu ubọọn̄, ke mâbum ibot ilaak kan̄ inyi.”

25 Mgbọ yaage, Ariọk osasa Danien isi me isi ogwu ubọọn̄, mè itumu inyi ibe, “Nra iweek ogwu enerieen̄ ge imun̄ me etete ebi usun̄ akọn̄ Juda, ogwu òbokọt ibum ibot ilaak ogwu ubọọn̄.”

26 Ogwu ubọọn̄ ododo Danien (ogwu ekebe erieen̄ ikigwen Belitisaja) ibe, “Ìre owu môkọt ikpa inu mmun̄be me emen ilaak n̄a, mè ibum ibot igbaalek inyi emi?”

27 Danien ofọfọọk ibe, “Kpunu ogwu òriọọn̄ inu, mè ìre ogwu òkitet ǹcha, mè ìre ogwu òkiroon̄ nriroon̄, mè ìre ogwu òkido ido-inu geege òbokọt ikpa nlelet udọk udọk inu chi owu ogwu ubọọn̄ okido. 28 Ire, îkaan̄ Awaji ge òkup me emen inyọn̄, ogwu òkichili udọk udọk inu geelek ijeen̄ ene. Awaji yi îra ijeen̄ ogwu ubọọn̄ Nebukadineja inu òborọrọ me mgbọ òkup me isi. Ilaak cha omumun̄be mè ilaak ọkpọchieen̄ kwun̄ cha omun̄be mgbọ olaakbe me inyọn̄ mkpilaak kwun̄ ìre ikeyi:

29 “Ogwu ubọọn̄, mgbọ owu olaakbe me inyọn̄ mkpilaak kwun̄, ejit kwun̄ onenikikeek inu òborọ mgbọ òkup me isi. Mgbọ ya, ogwu òkikpọk mbum udọk udọk nlelet inu onenichili inu òbomọnọ irek me mgbọ òkup me isi ijeen̄ owu. 30 Ire me lek n̄a, ìkare mije ke emi nriọọn̄ inu igak ofifi ene geelek òkup me ugwem, ke Awaji obak me lek ichili inu yi ijeen̄ emi. Ire, Awaji ìchili inu yi ijeen̄ emi, inyi owu, ogwu ubọọn̄, òsa me ikeyi òriọọn̄ ibot ilaak kwun̄, mè owu òkọt òtet ibot me lek ekiket cha òjojot owu ejit.

31 “Ogwu ubọọn̄, ike owu okikpọ, owu omun̄ inu ge ebotbe kubọk ebilene okekebe me isi kwun̄, inu ya ìkpọkpọ imin mè ikeke godòi, mè ikimumen inin̄ ene chieen̄, mè ikaan̄ ukpook. 32 Esa atalek alata araran̄ irom ibot kan̄, isi ejit kan̄ mè ubọk iba kan̄ ke esa alata okuket irom, owot kan̄ melek owut-ukot kan̄ ke esa ekwe irom, 33 ukot iba kan̄ ke esa okwukwut irom, sà ijọn̄ ukot kan̄ ke esa okwukwut melek abọt ewọpbe me ukan̄ igbaan̄ irom. 34 Ike owu ogwuun̄be chieen̄ ikikpọ, enenikpọkọ ewuuk ge, ire, ìkare ubọk ebilene okpọkọ. Ewuuk ya onanan̄a initọbọ inu ebotbe ya me ijọn̄ ukot kan̄ cha echi esabe okwukwut melek abọt ewọpbe igbaan̄ irom, mè ikpukpuku ijọn̄ ukot kan̄ igwook. 35 Otutuuk okwukwut cha, mè abọt, mè ekwe, mè alata okuket, mè alata araran̄ esabe irom inu ebotbe ya ogbugbugbọ igwook, mè ikpọk isan mgbọ yaage, mè ikana ikup kubọk mfufe òkup me ere igen̄ akpa me mgbọ ura. Efet obeben otutuuk iwut ichieen̄ isan̄a, inu geege ìkayaka ìsik. Ire, ewuuk ya òtọtọbọ inu ebobot ya ikpọk isan onenimin ikana ikpele ogoon̄ òwewele ichit otutuuk linyọn̄.

36 “Ilaak owu omun̄be ire eya. Mgbọ keyi, mânibum ibot ilaak ya inyi owu ogwu ubọọn̄. 37 Ogwu ubọọn̄, owu ore ogwu ubọọn̄ otutuuk ebi ubọọn̄. Awaji òkup me inyọn̄ înyi owu mkpulu, mè unye eyi isasa ikpulu, mè efuuk, mè umin mè uja. 38 Awaji ya îtap otutuuk ebilene ìkup me linyọn̄, mè ebi kè anam òkup me oron, mè ebi kè ofut òwulu me inyọn̄, me ubọk kwun̄. Ere geelek ema elukbe, Awaji îrọ owu ogwu ibot inyi ema otutuuk. Owu ore ibot ya esabe alata araran̄ irom.

39 “Ukot mkpulu kwun̄ isiraka, ofifi ukot mkpulu mônu, ire, ìkpomin, ìkpokaan̄ si unye kubọk eyi kwun̄. Ukot mkpulu keya isiraka, mkpulu eyi òso ita, òrere eyi ekwe, mônikpulu otutuuk linyọn̄. 40 Òta kan̄, ukot mkpulu eyi òso ini môgọgọọk eyi keya. Mkpulu keyi ìbonye kubọk okwukwut, mije, okwukwut ìkijijijaka inu, mè okpukpuku inu geelek ogwook. Ike okwukwut okikpukpuku inu igwook, ikeya ke mkpulu keyi obonikpukpuku, mè ijijaka echi òdadasi ikup cha. 41 Me emen ilaak kwun̄, owu omun̄ ibe ke ijọn̄ ukot mè otukot cha, ke esa abọt irom usini agan̄, mè isa okwukwut irom usini agan̄. Ikeya si, mkpulu keyi ìbokup okpọkọ okpọkọ. Ire, môkaan̄ sọnja unye kubọk okwukwut okikaan̄, mije, egbagbaan̄ okwukwut melek abọt ifuku. 42 Ike egbaan̄be okwukwut mè abọt ifuku isa irom otukot, ìsibi ibe ke usini agan̄ mkpulu keyi mônye, sà usini agan̄ obokup kpukukpukukpuku. 43 Ike owu omun̄be ibe ke esa okwukwut mè abọt ewọpbe irom otukot cha, ikeya si, ebi ama ubọọn̄ ya ebere ife ìnan̄a me esese ere esese ere. Ema kpebekọt igbaan̄ ire ge, mije, okwukwut melek abọt kpekigbaan̄ igọm.

44 “Me ukot mkpulu ebi ubọọn̄ cha, Awaji òkup me inyọn̄ môsan̄a ama ubọọn̄ ge isibi eyi kpebekọt ijijaka, kpebekọkọt si itim ikpan̄. Aya ama ubọọn̄ yi môjijaka otutuuk ama ubọọn̄ kechilọ cha geelek igwook, kpebeyaka ikup. Ire, aya ama ubọọn̄ yi me lek kan̄ môkeke inye ire mgbọ geelek. 45 Eyi ore ibot ilaak ọkpọchieen̄ ya eyi owu omun̄be, eyi ewuuk okpọkọbe inan̄a me lek orioon̄, me ikarege ubọk ebilene okpọkọ, mè inan̄a irọn̄, mè ikpukpuku okwukwut, mè ekwe, mè abọt, mè alata okuket, mè alata araran̄ igwook.

“Ogwu ubọọn̄, Awaji ogwu òmimin ichit îra ijeen̄ owu inu òbomọnọ irek me mgbọ òkup me isi. Ilaak owu omun̄be ìre atikọ, ibot ilaak yi si ìkpolọlọ irọrọ iso.”

46 Ogwu ubọọn̄ Nebukadineja orọrọn̄ inyana me ijọn̄ me isi kè Danien, mè inyi ọmọ umin, mè inyi ida ibe enegwa ngwugwa, mè ewọp si nsensi enyi Danien. 47 Ogwu ubọọn̄ onenitumu inyi Danien ibe, “Me atikọ, Awaji kwun̄ ore Awaji otutuuk ebi kè awaji geelek, mè Ogwukaan̄ otutuuk ebi ubọọn̄ geelek, mè ogwu òkikpọk mbum nlelet udọk udọk inu geelek, mije owu okọtbe ibum ibot nlelet udọk udọk inu yi.”

48 Ogwu ubọọn̄ onenibene Danien ifo inyọn̄ me irek, mè inyi ọmọ owuwa inyinyi, mè isa Danien irọ ogwu ibot me otutuuk agan̄ Babilọn, mè isa si irọ ogwu ibot me lek otutuuk ebi ìriọọn̄ inu me Babilọn. 49 Ògak ge, Danien obebeek ogwu ubọọn̄ mbeek me ibot kè Sedarak mè Mesak mè Abedinego. Ogwu ubọọn̄ osasa Sedarak mè Mesak mè Abedinego irọ ebi ibot mkpulu otutuuk agan̄ Babilọn. Danien me lek kan̄ okekisi ikwaan̄ me uwu ogwu ubọọn̄.