3 “Eya orọ, gwun̄ ebilene, kpulu nroon̄ uwu kwun̄ eyi owu môsabe isi inin̄ me usun̄ akọn̄, mè je me chieen̄ ikarek, inyi otutuuk ene emun̄ owu, si nin̄ me usun̄ akọn̄. Me chieen̄ kiban̄, owu mônan̄a me ere okupbe ije isi ofifi ere isi inin̄ me usun̄ akọn̄. Usini mgbọ, ubọk geelek ema erebe ebi uwu unye-ibot, ema mêgobo inu orọbe ya itet. 4 Me ikarek, owu môkpulu nroon̄ uwu kwun̄ isibi igwook, kubọk ogwu òbosi inin̄ me usun̄ akọn̄, inyi ema emun̄. Isire ikakwun̄, owu mônan̄a ije, me isi kiban̄, kubọk ebi ìbesi inin̄ me usun̄ akọn̄. 5 Me chieen̄ kiban̄, bum agba uwu tibi, mè kpulu nroon̄ uwu kwun̄ cha sa gwọt tibi me ere obumbe ya. 6 Kpulu nroon̄ kwun̄ cha toon̄ me oguga, inyi ema ekemun̄ owu, mè sa je sibi me ikakwun̄. Chit isi kwun̄, inyi okamun̄ ijọn̄ okije me lek, mije, ǹsa owu irọ inu ijejeen̄ inyi ebi uwu kè Ijeren.”

7 Nrọrọ si ike Okumugwem onyibe ida ibe emi ǹrọ. Me ikarek, mkpukpulu nroon̄ uwu n̄a isibi igwook kubọk m̀basi inin̄ me usun̄ akọn̄. Me ikakwun̄, nsasa ubọk n̄a ibum agba uwu itibi, mè isan̄a nroon̄ uwu n̄a isibi me ikakwun̄ ya igwook, mè ikpulu itoon̄ me oguga, ema ekekikpọ emi.

8 Me ewelegwe ofit iwele kan̄, Okumugwem otutumu inyi emi ibe: 9 “Gwun̄ ebilene, ìre ebi uwu kè Ijeren, uwu unye-ibot ya, kpedo owu ibe, ‘Keke ke okirọ?’

10 “Tumu nyi ema ibe: ‘Ogwukaan̄-ene Okumugwem ìtumu ibe ikeyi: Etip nriran keyi ìgbaan̄ me lek ogwu ibot mkpulu òkup me Jeruselem mè otutuuk ebi uwu kè Ijeren ìkup me ere ya.’ 11 Tumu nyi ema ibe, ‘Emi ìre inu ijejeen̄ inyi enyi.’

“Ike nrọbe, ikeya ke eberọ ema. Ema otutuuk mêyiyala inin̄ me usun̄ akọn̄. 12 Ogwu ibot mkpulu me etete kiban̄ môben inu kan̄ me oguga, mè inan̄a isibi me ikakwun̄. Mêbum ere me agba uwu itibi inyi ọmọ iraka isibi. Môchit isi kan̄, inyi ọmọ ikakọt ìmun̄ ijọn̄ ere ọmọ okije. 13 Emi mâtọp njin n̄a ichit ọmọ, mônwanwaan̄ me lek ufe n̄a. Mânenisa ọmọ inu me Babilọn, ido ebi Kalidia. Ire, ìkpomun̄ ido ya, ìbokwu si me ere ya. 14 Mâyiyala otutuuk ebi ìkukup ikana ọmọ, òrere ebi ìkitap ubọk inyi ọmọ mè otutuuk ebi urum akọn̄ kan̄, itap me agan̄ geelek me linyọn̄. Mâsa si oge akọn̄ ililaba ema.

15 “Mgbọ nsichon ema itap me etete ebi ife geelek, mè iyiyala ema igwook me ido geelek, ema mêneniriọọn̄ ibe ke emi nre Okumugwem. 16 Ire, mâtele ibe ema ene inen mè inen enwọnọ me otu oge akọn̄ mè akan̄ mè ijo orukan̄, inyi ema ekup me ido cha ema esibe ekpa otutuuk òchichaka inu cha ema erọbe esibi. Ema mêtotolek iniriọọn̄ ibe ke emi nre Okumugwem.”

17 Okumugwem onenitumu inyi emi ibe: 18 “Gwun̄ ebilene, owu môkirie inorie kwun̄ me uran-lek, mè ikinwọ mudim kwun̄ me ukpook. 19 Tumu nyi ebi ìkup me lek ijọn̄ yi ibe: ‘Ogwukaan̄-ene Okumugwem ìtumu inyi ebi ìkiluk me Jeruselem mè lek ijọn̄ Ijeren ibe ikeyi: Ema ebekirie inorie kiban̄ me ukpook, mè ikinwọ mudim kiban̄ me nriki. Mije, ebechachiaan̄ otutuuk inu geelek òkup me lek ijọn̄ kiban̄ isan̄a, bak me lek inu afa otutuuk ebi ìluk me lek ijọn̄ ya ekirọ. 20 Ama ebi ene elukbe cha, mêjijaka igwook, lek ijọn̄ ya mônenilaak ukpọk. Enyi mêtotolek iniriọọn̄ ibe ke emi nre Okumugwem.’ ”

21 Okumugwem otutumu si inyi emi ibe: 22 “Gwun̄ ebilene, urọk keyi enyi ekito me ijọn̄ Ijeren ikibe: ‘Usen îje ijọn̄ọ me lek, ilaak ọkpọchieen̄ geelek îkana inu ikike?’ ìsibi keke? 23 Eya orọ, tumu nyi ema ibe, ‘Ogwukaan̄-ene Okumugwem ìtumu ibe ikeyi: Emi mânirọ ibe urọk yi ichep, kpebeyaka ikpọk ikito me Ijeren ofifi.’ Kpan̄asi keya, tumu nyi ema ibe, ‘Usen cha, mgbọ eberọ ilaak ọkpọchieen̄ geelek iso, îra igbet. 24 Mije, ataak ataak ilaak ọkpọchieen̄ mè ofiaan̄ ofiaan̄ nriran ìkpoyaka ikup me etete ebi Ijeren. 25 Mije, emi Okumugwem m̀batumu inu mweekbe itutumu. Inu geelek ntumube ìborọrọ iso me ikafiatge mgbọ. Enyi ebi uwu unye-ibot, ìkpọ, me ukot kinyi, m̀batutumu ikọ, mè irọ iso. Emi Ogwukaan̄-ene Okumugwem ntumu.’ ”

26 Okumugwem otutumu si inyi emi ibe: 27 “Gwun̄ ebilene, ebi uwu kè Ijeren ekibe, ‘Ilaak ọkpọchieen̄ cha ọmọ okimun̄ ìborọ iso me owuwa usen me isi. Ọmọ ìkiben nriran inu òborọ me ujọn̄ọ ujọn̄ọ mgbọ me isi.’

28 “Eya orọ, tumu nyi ema ibe: ‘Ogwukaan̄-ene Okumugwem ìtumu ibe ikeyi: Kpunu ikọ n̄a geege òbofiat mgbọ irọrọ iso, inu geelek ntumube ìborọrọ iso. Emi Okumugwem ntumu.’ ”