Mêjijaka isi-ijọn̄ me inyọn̄ ogoon̄ ido Ijeren
6
Okumugwem onenitumu inyi emi ibe ikeyi: 2 “Gwun̄ ebilene, kana isi kwun̄ da ogoon̄ ido Ijeren, mè ben nriran keme ema ibe, 3 ‘Jei, enyi ogoon̄ ido Ijeren, ìgban̄ ikọ Ogwukaan̄-ene Okumugwem otumube. Ogwukaan̄-ene Okumugwem ìkitumu inyi enyi ogoon̄ melek orioon̄ ido Ijeren, mè okolo melek iteke ijọn̄ ibe ikeyi: Emi gwa ǹkisa oge akọn̄ inu me lek kinyi, m̀bagwagwak isi-ijọn̄ kinyi cha igwook. 4 Mêgbugbọ ntook ngwugwa kinyi, mè ikpukpuku ntook nsensi kinyi cha. Emi mâkpan̄ ebi kinyi igwook me ijọn̄ me isi mkpọmfaka kinyi cha. 5 Mâkpulu nkwukwu kinyi ebi Ijeren imumaan̄ me isi mkpọmfaka kinyi, mè itọọn̄ ukwuuk kinyi iyiyala ikana lek ntook kinyi. 6 Ere geelek enyi elukbe, ama kinyi ìbokana ukpọk ukpọk. Mêgbugbọ isi-ijọn̄ kinyi cha igwook, inyi ntook kinyi cha ijijaka, mè ikana ǹrioon̄. Mêkpukpuku mkpọmfaka kinyi cha, inyi ìkayaka ìkup. Mêgwak ntook nsensi kinyi cha isan̄a, mè irọ inu cha enyi erọbe ichep dìp dìp. 7 Mêkpan̄ ebi kinyi igwook me eden̄ kinyi, enyi mêtotolek iniriọọn̄ ibe ke emi nre Okumugwem.8 “ ‘Ire, mâsik usini kinyi. Mâtele ibe usini kinyi enwọnọ otu oge akọn̄ me ubọk ebi ife cha mgbọ mâyiyalabe enyi itap me ido geelek. 9 Ebi ìnwọnwọnọ mkpa cha mênenikeek emi mgbọ ema mêkupbe me ido cha ere etetbe ema me usun̄ akọn̄ isa isi igwook. Ema mêkeek ubọk ejit n̄a ofieekbe mije ejit barabat ema ekaan̄be, eyi òrọrọ ibe ema esan̄a emi ejit me lek, melek chieen̄ kiban̄ echi òkakana igọọk mkpọmfaka kiban̄ cha. Ema mêjọ ejit me lek kiban̄ gaalek mije ijo inu cha ema erọbe, melek otutuuk mbuban orọmijọn̄ kiban̄ cha geelek. 10 Ema mêneniriọọn̄ ibe ke emi nre Okumugwem, mè iriọọn̄ si ibe ke ìkare me ikike ke ntumu ibe ke mâsa ùrioon̄ initoon̄ ema.
11 “ ‘Ogwukaan̄-ene Okumugwem ìtumu ibe ikeyi: Ìkwak ubọk kinyi, mè ìgon ukot kinyi me ijọn̄, mè ìtaan̄ ukpo ibe, “Jei!” mije otutuuk inu ikpak mè filafila inu ebi uwu kè Ijeren erọbe, bak me lek, ema mêkwaan̄ isan̄a me otu oge akọn̄, mè irak akan̄, mè ubọk ijo orukan̄. 12 Ogwu òkup me ujọn̄ọ ere môkwu me ubọk ijo orukan̄, ogwu òkup me mgbet ere môkwu me otu oge akọn̄, ogwu geelek ònwọnwọnọ, mè ìre ogwu geelek etelebe, môkwu me irak akan̄. Sa me ikeya, unaan̄-ejit n̄a môsoso ema lek. 13 Ema mêtolek iniriọọn̄ ibe ke emi nre Okumugwem, mgbọ ebi kiban̄ isikwaan̄ ilaak me etete mkpọmfaka kiban̄, mè ililam ikana me agba lek ntook kiban̄, mè inyọn̄ ubene ubene orioon̄ geelek, mè inyọn̄ ibot otutuuk ogoon̄ geelek, mè irak njijoon̄ uti geelek òsasan agọọk, mè irak ilip geelek inwan̄ ojotbe me inyọn̄, ere ema ekiwọp nsensi utop olu inyi mkpọmfaka kiban̄ cha. 14 Emi mânyana si ubọk n̄a itoon̄ ema me lek, mè ijijaka ijọn̄ kiban̄ isan̄a kpai, ibene me lek èwê isi ire ama Dibila, mè otutuuk ere geelek ema elukbe. Mgbọ ya, ema mêtolek iniriọọn̄ ibe ke emi nre Okumugwem.’ ”